最近有食客大吐苦水，指早前光顧人氣連鎖扒房 時，點了一份五成熟的「美式慢燒安格斯肉眼牛扒」。豈料上菜時牛扒竟呈現如生肉般的「半透明鮮紅色」，事主形容「塊肉濕漉漉、全塊呈現生牛肉刺身」、「右下角舊肥膏，死白、硬邦邦，邊緣銳利，完全無被烤箱溫度感化過」、「直頭連切都切唔到落去」。事主坦言「食咗兩啖趙都趙唔落」，最終宣告投降！
事主指：「要（落單）時候，店員已經同我講係會比較熟，好似Menu咁樣，會有粉紅色，使唔使幫你兩邊煎一煎佢。我話唔洗」。
事主遂向店員再三確認牛扒是否「五成熟」，店員則回答「慢燒 Menu 寫明影出嚟就係咁粉紅色」。惟翻查餐牌圖片後，發現圖中的牛扒肉質纖維扎實，呈現不透明的粉紅色，肥膏亦有烤至微黃軟化的邊緣，與自己眼前的「生肉」大相徑庭。事主要求廚房重新處理牛扒至真正的五成熟。沒想到再次上桌時，牛扒竟進化成九成熟「柴皮肉乾」，事主坦言自己平時亦會食生牛肉他他，但這次的肉眼扒卻韌至無法咀嚼，不禁上網發問求教：「究竟係我對美式慢燒有誤解，定係我問題？」
事件隨即引起網民熱議，有人留言炮轟牛扒「生得離譜」：「有冇快啲拎去獸醫度，塊牛可能仲救得返」、「牛肉剌身嚟」、「會唔會聽錯咗唔使熟，唔係五成熟」、「呢個天氣擺到聽日應該都夠5成熟」、「報食環啦」、「5%熟就真」、「解凍解到五成」、「好似平時街市買個啲生肉」；亦有人指圖中牛排屬正常：「Prime rib 係咁嘅（low and slow 嘅做法 ) 佢去慢焗嘅時候，肌紅蛋白會變得額外粉紅」、「Slow roast 完呢個樣好正常，啲肥膏位會死白變硬只系因為佢咁樣出，佢扒好快會凍，所以難切啲同埋乾硬啲」。