座頭市一劍刺穿我左臂，透心劇痛令我忍唔住慘叫一聲，
我錯啦，呢一刻我先知道自己幾咁天真，
可能之前對手太弱雞，令我產生一種可以做武士嘅錯覺，
真正能夠帶死亡威脅俾我嘅對手就係面前，我先明白自己只係一個ff嘅毒拎。
我冷汗直冒，戰意大減九成，座頭市一步步向我行黎，
「冷靜D！」刀郎都感覺到我淆底，
我無辦法雙手握刀，刀郎用唔到佢嘅絕招，
就係呢個時候，一個和尚跳左上台，
「夠啦，勝負已分！」和尚手執長木棍，
座頭市唔出聲，突然舉刀就劈，
和尚仿似早就預料到，長棍手中一轉，橫裡打向對方嘅刀背，
兩人渾身一震退開，座頭市下手毫不留情，和尚不禁怒睥對方，
另外兩個人亦跳上擂台，相信就係出左線嘅選手，
「應該把擂台還給我們了吧。」長髮及肩、手握長劍嘅男人話，
仲有個成兩米高嘅龐然大漢粒聲唔出，但已經企定座頭市身後準備隨時開拖，
「仲有我奔雷手文泰來！」連裁判都跳埋上黎，
座頭市冷哼一聲，收返武器，
「不把刀交出來，你會後悔。」佢講完之後就落台走左。
我坐係白車入面，面無血色地發呆，
頭先女演員唔知同我講乜，我咩都聽唔入耳，
明明好拎型咁約人去街，而家畢到係萬人面前俾幾個對手救返仲要幫我call埋白車，
「刀兄，我真係好無拎用。」
「唔，如果係古代我諗你要切兩次腹。」
「..........」
「不過係呢個年代，算係咁嘞，不過女就溝唔到架啦。」
「Hi，你真係好識安慰人。」
救護人員行埋黎望望我，
「check check有冇腦震盪。」佢擰轉同另一個救護人員講，
唔使講，場比賽我失去左資格，亦冇左揚名立萬嘅機會，
仲要背負隨時被呀刀劍雙絕隊冧嘅機會，
「朋友，你不如交我俾佢吧啦。」刀郎說，
我沉默，老實講我唔係無諗過，
問題係如果我放棄刀郎，呢個決定實在老正得不能再老正，
咁我係咪做返普通人，一個默默返工嘅好樣？
同埋咩都唔知，我條氣會順咩？
我已經受夠俾呢個社會擺佈，而家冇啦啦仲捲我入呢單野，一個唔該就捅我兩刀，
雖然我可能唔夠班做一個武士，但唔代表我咩都做唔到！
笑到gapgap聲,即刻諗起破壞之王條kelefe個樣