侍應悻悻然地幫我地落單，我好肯定我地會被加好多料....... 「咁樣衰，斬佢老母啦！」刀郎搭嗲， 「對唔住............一時忍唔住...」我為我嘅失態同女神道歉， 「哈哈哈哈哈哈哈！！」女神竟然爆笑左出黎， 侍應望住恥笑佢嘅古代女俠，屎忽不安地扭下扭下咁走開， 女神笑完回喘，輕輕用手抹走眼淚， 「死啦，一陣佢實會加好多料.....」女神同我諗到一樣嘅野， 我心中叫苦，精心安排嘅浪漫飯局竟然就咁收左皮。 「不如........我地去第二間囉！」女神細細聲講， 未等我點頭，女神就捉起我隻手行出去， 走時我地仲不忘向個侍能應揮手， 我地跳上的士，但又未諗到去邊， 「我知有間打冷好好食架！班師兄成日帶我去架！」女神提議， 於是我地由西餐轉左去食打冷， 到步時個天開始落雨，唔打緊，我隨身攜帶把遮嘛， 「又當我係遮.....使唔使唱首歌搞下氣氛呀.....」刀郎不滿地講， 為左唔好好似痴線佬，我全程冇理刀郎， 雨中女神捉住我臂彎，搞到我心神一盪。 「咦？阿妹黎左喎！」打冷店門口有班男人見到女神，大聲打招呼， HiHi，係佢班師兄弟， 如果大家仲記得，我同佢門派其實有少許牙齒印， 所以我同班佬一打個照面，兩邊都忍唔住面色一沉， 好彩，我同女神坐開自己食，大家都相安無事， 「對唔住呀，你特登book左間餐廳冇得食，要黎呢度食。」女神話， 「其實我......比較鍾意呢度。」我老實地說，然後我地相視而笑， 之後，我僵住左， 因為我見到，女神牙縫夾住左條菜...... 女神分享佢工作趣事，我完全無心機聽， 只係一路「係咩，真係架」咁虛應， 我嘅心神，完全被個條穩固地夾係女神兩隻門牙之間嘅青絲吸走左， HiHi.......我究竟應唔應該講俾女神知？Hi你,笑拎死我