我係後巷企定，轉身望向跟入黎嘅座頭市， 「今日我要你試下我真正嘅實力。」我係結他盒入面攞出刀， 「嘿，愚蠢。」座頭市好整以暇地拔出刀劍， 咁講可能好gay，但我握住刀郎個柄時感覺到一陣暖意， 座頭市慢慢向我步近，每一步殺氣便大多一倍， 後頸汗毛直豎，呢個係身體本能地發出嘅警號， 只要跨出一步，我就踏入左生死連接嘅境界， 我左腳踏出，右手緊握， 親！ 「叱！」 居合斬！ 噹！ 座頭市瞳孔一縮，感受到我手上傳黎前所未有嘅壓迫， 「哼！」座頭市雙手同時擋格，身體紋風不動， 我快速抽起刀，座頭市雙手立時一鬆， 然後我雙手握刀，垂直再劈下， 「咕！」身體來不及反應我閃電般嘅反擊，座頭市喉嚨發出一記悶響， 「Hi！」「Hi！」「Hi！！！」 我每一個Hi字就劈一刀，誓言打散座頭市固若金湯嘅防禦， 動了！座頭市退後一步！ 刀郎無估計錯，座頭市雖然招式非常精妙， 但只要堅持攻擊令佢施唔出刀劍絕技，防多必失， 好似踢波一樣，攻擊就係最好嘅防禦！