前文提要：
「留刀或留命。」座頭市說，
我第一次體會到萬人包圍嘅孤獨係咩一回事，
「曲仔！唔好打呀落返黎！」女演員大叫，
「刀郎，武士係呢一刻應該點做？」我問，
「作為朋友，我唔想話你知。」刀郎老實地說，
朋友呢兩個字實在夠重，亦都係提醒我而家唔係逞英雄嘅時候，
能夠同一把刀做朋友實在係一生人一次嘅奇遇，
於是我落左個一生人最好只做一次嘅反常決定，
「人在刀在！有本事過黎攞！」我答座頭市，
「刀郎，唔打唔得啦而家！」我同刀郎講，
「好，咁我地就打佢老母臭！」刀郎呢句廣東話特別熟，
「如果我贏左，」我斜眼望向女演員，「可唔可以陪我睇戲食飯？」
呢個時候，我需要一Ｄ原始嘅動力，
女演員知道講乜都冇用，用力地點左下頭，
「Hi 你！！！！」我用力一喝，雙眼尤如噴火，
「哼！」座頭市踏步，劍刺刀劈，
我雙手握刀，快速地劃了個圓，
錚！噹！
我勉強擋開，但已被震退幾步，虎口更是生痛，
「呢條友好大力，唔好硬拚！」刀郎提示，
我跟隨佢控制嘅發力方向，靈活地係場中左右跳動，
以下落黎，我就要施展另一招刀郎嘅絕技。
於刀郎只識其招不識其名，我同佢研究個時就幫堆招作左一堆名，
而呢一招，因為其左跳右跳令我諗起單線結他嘅激昂節奏，
我幫佢改左名叫－活著VIVA，
「活著VIVA！！」我大嗌招名，人影突然由左至右順序揮出５刀，
座頭市嚇一嚇，淨係擋到前四刀，最後一刀俾我斬中佢左邊膊頭，
我見得手，即刻彈下彈下咁跳開，
呢個座頭市力量驚人，不過速度並非太快，
座頭市有d燥底，突然將刀同劍交換手拎，
「吼！」
刀使劍技，劍如刀動！？
一時之間被擾亂嘅我疲於閃避，更唔好話反擊嘞，
呢條友用嘅武器肯定係刀郎嘅級數，因為我感覺到刀劍上面一股異樣嘅殺氣，
「破岩斬！」我唔可以俾佢咁壓住我打，
向頭頂嘅一招直劈未似預期般迫座頭市變招，只係令到佢分出左手擋格，
此時，空出黎嘅右手刺出，
「呀！！」