「好！好刀法！」確定到我係堅野之後秋叔就即刻叫停， 光頭佬嚇到一身冷汗，仲要鬍鬚佬幫佢抹血， 呀男演員唔出聲，攞起佢身後嘅一把大關刀， 「熱完身就開始比武，等我黎領教！」男演員一揮關刀，唐樓天台上面傳黎好多閃光燈， 「好呀。」我握實刀柄，刀郎都準備好嘞， 男演員向我衝黎，仲用關刀開路， 佢把武器始終長過我，如果我一避開就會失去先機， 「九頭龍閃！」我大喝一聲， 聽上去好似好勁，但其實我只不過係好快咁係側面係咁拮對手， 關刀柄上俾刀郎刮到出現好多花痕， 男演員一驚，轉手改為橫劈，諗住用重量壓羸我把刀， 刀郎話哂打交打左幾百年，呢Ｄ招又點會難到佢， 我人向前衝，同時斬向佢攞關刀嘅手， 「叱！」男演員雙手快速舞動，用刀柄險險撞開刀郎， 「獅子挽歌！月牙天衝！勁頭龍閃！亢龍有悔！」我一口氣狂攻，同時大聲叫出招名， 一聽到亢龍有悔男演員震左一震，然後親一聲，關刀抵受唔住俾我劈開左， 我冇停手，刀光係男演員身上閃兩閃， 「你做咩呀！」女演員大驚喝止我， 然後，男演員無受傷， 只係佢身上嘅衫褲慢慢好似紙片咁散開，露出一條心型嘅孖煙通， 咔嚓咔嚓咔嚓， 記者不斷影相，男演員嚇到拔足狂奔落荒而逃。親
「後生仔，好刀法呀。」秋叔望實我， 「唔使望啦，人人有份。」我「份」字一出，人即閃動， 嗖嗖嗖嗖嗖， 刀過之處吋布不留，光頭佬、鬍鬚佬、秋叔全部俾我削剩條底褲， 三條麻甩佬搏命逃走，可惜唔及閃光燈快， 我知，你班高登仔實話做咩唔除埋條女Ｄ衫，冇圖冇真相呀嘛， 你要明白，殺人阿媽係唔及摸人阿媽咁衰格， 呢Ｄ傷風敗俗野真係唔做得架！ 女演員見我向佢留一手，臨走之前拋低左個感激嘅眼神。 「好！你今晚無丟武士嘅架！」刀郎都忍唔住讚我， 「哈哈，咁我問你，劈友流血過癮Ｄ定做武士過癮Ｄ？」我問， 刀郎諗左一陣， 「......做武士過癮Ｄ........」刀郎承認， 此事一揚，我更加Hit到成為城中熱話， 好彩個日無俾任何人見到我真面目，否則我真係街都唔使出， 係囉，原本我係咁諗嘅， 點知一開門...................... 「請問你係咪後巷武士？」 「曲街小太郎點解你會打擊黑社會犯罪？！」 「你點睇大力揮拳呢班手下敗將？」 閃光燈不停狂眨，我呆拎左， 然後當機立斷轉身跑返入屋， 「點解會咁架！！！」我不禁自問。peter仔