我未等秘書通傳就衝左入老細房，其他同事野都唔做聚精會神睇戲， 「老細，介唔介意話我知點解要炒我？」 老細一副明知故問嘅樣，其實大家都好清楚個原因，我只係好想聽下佢會講Ｄ咩， 「唔好意思，但我地覺得你唔適合團隊工作，我地比較想搵可以更加提高士氣嘅員工。」佢官腔地答， 「不如等我講啦，你唔肯減用係飲飲食食嘅大筆開支，反而要減我地搏命做野嘅人工，我有異議你就炒左我，咁樣管理間公司唔掂架。」我話， 「既然你咁唔鍾意公司方針，咁樣都係好事呀。」老細冷冷地望住我， 「我諗你一定成朝無check email啦，我已經將你嘅管治方針send左去董事長個邊。」我話， 董事長專注內地業務，所以將香港呢部份交左俾我老細管， 「咩......咩話！？」老細震驚，一掌拍落張檯度， 鏘！ 我拔出刀郎，同時拋出手上嘅大信封， 幾下手勢，封信係空中變成碎紙條， 「有你呢Ｄ上司，公司梗係蝕錢啦。」我說罷還刀入鞘， 老細愕然地望住我攞住把武士刀行出房間，同時我聽到身後傳黎一陣掌聲， 「拿，而家個眼神就似返個男人啦！」刀郎笑住講。 就係咁，我連份工都冇埋，正式做個雙失毒拎， 不過意外地，我心情頗為平靜，甚至有種解放左嘅感覺， 由於冇咩做，我連日黎不斷係淘寶尋找賣把刀俾我嘅人， 可惜屢尋不果，於是我改變方法，向其他賣刀鋪頭打探， 結果真係俾我問到一個有料到嘅賣家！ 「哦，那個刀，知道的親。」 「可唔可以話我聽呢？」 「哈哈，有點忙哦～」 「這樣啦，我即刻拍兩把絕世好劍同雪飲狂刀，你講我知。」 「好吧，」個賣家之後唔出聲左一陣，直到我真係買左兩把刀， 「我們行內有個傳說，有一把刀，是真的日本古刀，隔一段時候就會出現在淘寶找買家，不過淘寶根本沒有這件貨的記錄，也不是每個人都能夠看到這把刀。」 「那有沒有人知道這把刀的賣家在哪裡？」 「我只聽說那個賣家淘寶的名字叫膠刀肺豉脾。」 膠刀肺豉脾.....................？！Hi你巴打黎架？