以娜叫我照顧以信，我推住以信既輪椅就行到去某一個角落。 「喂，薛可正，幾日唔見，點解你咁冇精神？」以信問我， 「係咩？可能訓得唔好。」 「二家姐喊得好厲害，要大家姐扶住佢。」 我：「點解你冇喊？」 以信：「我見過婆婆十次都冇，喊唔出。」 「以信，入去，我地屋企人最後同婆婆講一次再見。」以妮行埋黎，同我打個照面，跟住就接左以信入去婆婆病房度。 我覺得無聊，就走左出大門口透透氣，始終生離死別既氣氛實在令人太鬱悶。 走出大門，時運低，咁啱就見到Grace。 呢條八婆次次見到我就好似導航咁，一定要追住我黎咬，今次都唔例外，一見到我已經走埋黎我度。 「哈你個薛可正又會黎既？」 「人地屋企有白事，妳就出少句聲。」 「如果你知道自己比唔到幸福以娜，點解隔左咁耐仲要黎煩人？」 「喂你條八婆都幾煩架喎，有乜野可唔可以離開呢度先講呀？」 其實呢個問題我一直都係好糾結，我個人認為，百份之九十既女同性戀者都有一個怪癖，就係一條根咁往同一個地方不斷鑽。就好似Grace，以往次次見親我都會提起我照顧唔到以娜呢個重點，目的就係要話比我知佢有錢，佢可以照顧以娜。 當然，呢個都真真正正係我當初輸比佢既地方，至少我當日係咁認為。 所以當今次Grace不斷喺醫院外面話我照顧唔到以娜就唔好再搵以娜既時侯，唔知點解連我自己都估唔到我會講出一句我以前從來唔會講既說話： 「八婆妳聽住，我一定會喺妳手上搶番以娜返黎，再好好咁照顧佢。」 但估唔到，Grace答我果句說話令我更加震驚： 「我已經同以娜冇一齊好耐喇。」
訓啦 聽晚先有文呀!!! 因為要同d仔出街過平安夜好爸爸大家平安夜快樂!!