行入門口見到以娜，我有小小不知所措，明明佢冇覆我SMS，而家又突然出現喺阿爸病房。
阿爸同阿媽都知道我同以娜既事，但佢地本來就已經感情唔錯，所以我未行入房之前，佢地應該傾得幾開心。
阿媽：「正，以娜黎左一陣架喇，幾有心呀，送左袋補品同張心意咭比你阿爸。」
「係咩…係呀阿爸你今日點呀？」我好唔自然咁行去阿爸旁邊放低堆雜誌，對眼一路都冇同以娜有接觸。
擦過以娜身邊，我有種好陌生好陌生既感覺，我故意行去窗邊開窗，因為咁樣以娜就會背住我。
我從後面打量以娜既打扮，照樣係果個新款LV手袋，其他既就好似冇乜野改變，咁樣既打扮同我諗預期有小小出入，因為我覺得佢同Grace走埋一齊，就一定好似闊太咁一身名牌，更過份既係我有諗過佢會唔會有保鑣喺身邊。
我就咁企左喺窗邊，而以娜就一路同阿媽阿爸傾計。
以娜同阿爸以前成日傾計，果時阿爸仲係好收埋自己，唯一係以娜先可以令阿爸講野，阿爸話以娜心地好，又尊敬老人家，所以好鐘意同佢傾計。
我以為以娜見到我會即刻走，但估唔到佢好似完全見唔到我咁，拖住阿爸隻手一路同阿爸細細聲傾計，阿媽見到呢個情況，望下我又望下以娜，場面非常尷尬。
十五分鐘後，以娜企起身：
「來叔叔，我走喇，我過多幾日再黎睇你，個湯煲我唔拎走喇，下次拎第二個黎換，阿姨我走喇。」