「梗係唔係女朋友啦，我都冇女朋友！我個Friend打俾我咋嘛。」我立即澄清，表示自己冇女朋友。
「哦……係咩？」
「係……」
「……」Air已Dead，我哋亦減慢步速，果一剎那真係好很尷尬。
三秒之後，我打破沉默：「係呢，今日食咩好？」
「商場好似開咗間新舖，我想試吓呀。」
「好，就咁話。」我爽快答應。
喺呢九個字嘅Lunch time入面，時間一樣過得好快，我哋亦冇再Dead air，不過我哋心底亦有共識，就係唔可以太過觸及對方嘅私人生活，今日佢犯咗規，情況就會好似啱啱咁。
食完之後我送咗佢去上堂，之後自己返咗Hall上高登，盡量唔俾太多時間自己去諗佢，因為太多外在因素阻隔住我哋，雖然我有幻想過同佢一齊之後會點、其他人會點睇我哋等等……但始終我自己青頭毒拎一名，我當然接受唔到自己女朋友做呢行，只不過將來嘅嘢冇人知道，我只能夠見步行步。
時間過得好快，轉眼間夜晚已經來臨，就喺我沖完涼，十點幾鐘果陣，我部手提電腦旁邊叉緊電嘅手機傳嚟一吓提示聲，我心諗：「唉Hi，三台又Send啲垃圾廣告訊息嚟。」跟手拎起部電話一睇，原來係Whatsapp，邊個咁好興致搵我呀？九成都係問人哋電話或者問Assignment幾時Deadline。
我拉低條Bar一條，哇Hi你！Candy嚟嘅喂！