話都冇咁快，我哋已經到咗圖書館，佢教咗我一輪點樣上Moddle下載份Powerpoint落嚟再Set成一張紙六個格再印，然後又要唔知點樣Set密碼再去印，聽落好似好複雜，但其實學咗一次就識，我整理咗份Note，跟住就打蛇隨棍上，問佢：「Candy，不如一齊食Lunch啦？」
「Eh……唔啦……我約咗其他人。」佢唔好意思咁拒絕咗我。
「哦，咁冇嘢啦，下次再一齊食囉，今日唔該晒你呀，教咗我咁多嘢。」我食咗個檸檬之後即刻轉話題，毒拎嚟講我轉數都算係幾快。
「不如你俾你電話我吖，下次再約。」佢好甜咁笑咗一吓。
呢一刻，我好似有少少俾佢電到，唔得！我唔可以沉船！
不過我都係乖乖咁同佢交換咗電話，跟住佢就朝Canteen方向走咗，佢教我印Note前前後後都搞咗三、四個字，我記得Kevin個時間表係遲我半個鐘放，於是我就打咗俾Kevin。
「喂喂，喺邊呀你？」我問。
「啱啱落堂，做乜勁？」Kevin講嘢永遠離唔開粗口。
「冇，想約你食個Lunch啫。」
「好，出出面食。」佢好有主見咁提議。
「時但，後門等？」
「Okay，拜。」
就係咁，我哋嘅對話完結咗。我行去後門時經過Canteen望咗入去，竟然見到Candy同一個幾高大嘅男仔一齊食緊飯，不過佢見我唔到。Me heart think：哇，咁高大都要叫雞？真係陰公豬。
不過我必須承認，果一刻我係有少少醋意夾葡萄加唔抵得。
大約等咗五分鐘，Kevin就到咗。