我由五歲開始發現自己有陰陽眼，十幾廿年黎睇盡正常人睇唔到嘅野，
有人問過我會唔會好驚，其實講真睇鬼片我仲驚，
因為真實嘅鬼就好似幻影咁，多數唔會成身血或者揸住把吊扇追殺你，
最重要嘅係，現實生活見鬼係唔會有配樂嘅。
大學時，我識左兩個同我一樣唔多正路嘅朋友，
畢業之後做左兩年野，三條友成日約出黎飲野吐苦水，
大家都唔想做打工仔一心諗住創業，呢幾晚我地成日出去飲野，
懶有計咁傾我地嘅創業理想。
「拿我諗過架啦，我地一於寫App，整隻傻豬game多人玩就發啦！」Patrick半杯落肚，最初面紅現在雙眼通紅，
Patrick，而家係銀行做緊Sales嘅佢自從政府出招打樓市之後，
佢嘅按揭生意跌左九成，於是創業變成佢而家嘅救命草，
「下嘛，咁冇人玩點先，本都蝕拎埋喎。」我冷靜地答，
「Hi咁投資係有風險架啦！」Patrick大力地將個杯拍落張檯度，
「第一步最好諗下我地有咩係人地冇嘅。」五伯娘酒量最好，個人仲好清醒，
唔好誤會，五伯娘絕對係男人，
我地叫佢五伯娘係因為佢真係叫伍伯良，
佢而家係間廣告公司做緊，日日喪做做到皺紋都開始出黎，
「我地有咩人地冇？我有陰影眼囉！」我答，
「我細個俾外星人綁架過。」Patrick打左個酒嗝，
「食屎啦，Auntie都話你個時發高燒有幻覺架啦！」五伯娘毫不客氣咁講，
「你識乜夠呀！你夠話你有超能力啦，又唔見你變五條煙黎睇下？」Patrick回擊，
「嘈乜拎呀，溝埋開間捉鬼公司呀笨！」我都開始有Ｄ酒意上腦，
然後，兩條友靜拎左，一齊擰過黎望住我。