蔡楓華罕脫黑超揭遭黑社會圍毆視力永久受損　翁靜晶聞言心痛落淚

蘭尼斯特 17小時

翁靜晶的網上頻道《危險人物2.0》，在昨晚（10月7日）邀請年青時曾合作主持電視節目及影視劇的蔡楓華任嘉賓，二人40多年未見面，所以一碰面已甚激動，訪問過程中蔡楓華說話有條不紊，翁靜晶甚至稱蔡楓華記憶力比他更好。

二人回憶當年合作點滴外，蔡楓華並透露當年事業陷低潮，絕不是因為在《勁歌金曲》節目講「一剎那光輝唔代表永恆」導致，他強調從來沒有因為此句說話而被任何機構封殺，真正原因是唱片公司沒履行承諾，不出碟配合5場演唱會，令蔡楓華在1988年紅館演唱會泡湯。

蔡楓華近況︱為開騷得罪有勢力人士

多年後，張耀榮曾在電視公開承諾會再為蔡楓華開演唱會，結果卻得罪有勢力人士，蔡楓華稱：「香港有勢力人士就嚟搵我，你明白未？啲幫會人士嚟搵我，佢唔想呢件事發生，佢要保障佢轄下嘅人。」

翁靜晶追問原因：「即係其實有一班唱歌嘅歌星，就係黑社會所控制，如果有10場8場演唱會，就寧願佢哋去好過你去，係咪咁？」蔡楓華沒作評論，只稱：「你講到咁明顯，你驚唔驚呀？」翁靜晶回答：「我又唔使出去唱歌」蔡楓華表示：「我唔知，總之係咁。」

過去一直戴太陽眼鏡示人的他，在節目中罕有除下黑超展示眼部傷勢，他指一指自己右眼說2004年曾被打：「冇盲到，但係我做咗手術。」翁靜晶追問遭誰人毆打他，蔡楓華說：「黑社會囉，又係為咗紅館，因為我知小鳳姐唱唔晒，諗住搵張生（張耀榮），點知又俾人圍。（翁：有冇報警？）你真係問嚟都多餘。」

被封「四大癲王」影響深

翁靜晶指多年前的香港娛樂圈確實黑暗，蔡楓華再透露自己曾在美國被四支槍指住個頭，稱：「嗰次就唔係為咗錢，嗰次係有個女藝人唔知做乜鬼嘢，搞是搞非，煽動啲人、又蝕錢，就上嚟指住我話我有份，我話我冇份喎大佬！我嚟表演咋去大西洋城，就係咁囉，唔想講呢啲嘢喇。」翁靜晶疑問稱：「點解你成日俾人蝦？」蔡楓華表示因為自己是「斯文人」沒有「背景」。

另外，提到當年被傳媒封為「四大癲王」之一，甚至暗示他有不良嗜好，蔡楓華回應：「我唔埋班，但係唔代表我敵視你哋。每個人都有自己本身嘅嗜好，而家呢個蔡楓華真係，嫖賭飲蕩吹五樣都唔關我事。」

可是「四大癲王」此稱號對他影響甚大，蔡楓華甚至聲稱被打後報警求助卻不獲受理，他指當年遭30多人圍毆：「嗰時我住偏僻地方，佢哋搵個人嚟話：『蔡生，呢排有個男人嚟搵你，問你住喺邊。』」

他無奈續稱：「首先畀咗一個錯覺你，覺得屋企唔安全，嗰晚我喺澳門，去威尼斯人，唔係賭錢，係想去搵一個Entertainment manager，嗰晚我已經知道危險，因為我返嚟嘅時候，遇到啲的士司機架架都係嗰啲人，我上到去已經驚，就諗住上深圳避一避。」

蔡楓華再稱：「上嗰啲巴士，離開咗，後面有7、8個古惑仔喺度唱《絕對空虛》，跟住我一齊上，過咗關之後去到嗰個位，佢哋就響朵，話『我哋係邊度，你搵邊個同你做紅館呀？』我話『張耀榮先生，得唔得？』佢哋唔敢郁手，到我上咗的士，睇吓佢哋會唔會跟住我，冇吖，去一去桑拿地方，諗住睇吓有冇事，一出返嚟，30幾人等我！喺深圳出面等我，喺深圳打我！」

蘭尼斯特 17小時

右眼視力永久受損

他指因為這次事件令他有創傷性青光眼，導致右眼視力永久受損，因此長期戴太陽眼鏡，說：「用鐵蓮花插隻右眼，你知唔知？如果打低少少我呢度爆咗！」

翁靜晶問他當時有沒有立即去醫院，蔡楓華說自己先返香港再到屯門醫院縫針，稱：「我就即刻去咗醫院急救，嗰時啲CID擺明車馬，話蔡生唔適宜落口供，佢寫嘅全部都係大陸嗰一半，香港嗰一半佢冇嘅，跟住佢睇都唔睇，就俾返封信，我話係common assault（普通襲擊），我就寫返封信話唔係。」

蔡楓華表示因被當時被稱「四大癲王」，就算他述說自己遭遇也只被認為「你黐線㗎嘛！你講嘢我點會信？」他更透露曾去信保安局哭訴講自己經歷，案件才交到警務處，可是輾轉多輪，案件不了了之，說：「我要求佢重新開過，我話畀你聽我唔理嗰個係乜乜大哥，嗰班人有幾多勢力，我都要攞返個公道！」

翁靜晶聞言不禁心痛對方遭遇落淚，並承諾替他翻案，蔡楓華哽咽稱：「你都知我一定經過好多好多嘢，一定出過事，點會因為嗰啲咩剎那光輝永恆，點會係嗰啲咁嘅嘢？一定有事。」翁靜晶指他被黑社會逼害，他卻表示：「最好唔好搞，連累咗你……」並稱「呢班人惹唔過」。

錢7公 17小時