同我女講起「屯門啤酒小朋友」件事，佢叫我去申請領養，話屋企住多一個人都 OK。

我話，有父母唔可以領養。

晏啲再出新聞父母話「誤會」，小朋友話「自己 ok」。我女叫我申請「寄養」。我再解釋唔得。

佢：咁叫佢嚟住一星期？佢睇吓正常家庭係點，先會知道自己係唔OK，然後佢就會自己申請「open to 領養」。

完全唔知點同佢解釋。

「正常家庭小朋友」今日放假，同佢去咗近視複診、行過 city’super 話要買 Stanley 杯。聽日有小朋友嚟屋企做 project ，唔使睇價錢咁不停拎啲芝士火腿水果話同朋友一齊食。拎住一大袋嘢返屋企，怕佢重淨係叫佢拎住隻杯。返到屋企嘅煩惱，係唔知邊一支紫色筆漏墨整污糟另外兩支筆。

無同佢講啲咩「你睇你幾幸福」。感受幸福嘅本身，係唔應該向下或者向上比較去得到。無論咩出身，本身都有自己人生功課。

但，大家都 11 歲，個生活平行時空咁。
不禁想，有啲人嘅人生功課係咪真係太多……