https://www.mytvsuper.com/tc/scoopplus/entertainment/e-news/17886782060920/%E5%A4%AB%E5%A6%BB%E7%9A%84%E5%8D%9A%E5%BC%88-%E4%BD%95%E6%B2%9B%E7%8F%88%E4%B8%8D%E6%8D%A8%E7%B5%90%E5%B1%80%E6%9B%AC%E8%8A%B1%E7%B5%AE%E7%9B%B8-%E9%99%B3%E7%86%B9%E6%BD%BC%E6%94%B6%E7%8D%B2%E4%BA%BA%E6%B0%A3%E4%B8%80%E5%BA%A6%E8%BF%B7%E8%8C%AB


劇集《夫妻的博弈》日前播出大結局，喺劇中飾演高海寧閨密之一嘅 何沛珈 就喺社交平台分享多張花絮照分享感受，喺Roxanne分享嘅相片中，包括佢哋幾個女仔嘅搞鬼自拍同埋錫面相，仲有劇中閨密團相擁而泣嘅場面，可見劇裡劇外佢哋都係好姊妹。

https://www.instagram.com/p/Dc4tb5bE-wR/


Roxanne更感性撰文：「感恩遇上這幾位充滿愛的女孩子，無論係戲內戲外都感受到大家的互相支持，林美淇的故事完結，但很慶幸現實中和你們的故事仍在繼續。」令網民都話好開心見到佢哋嘅友誼延續到劇外，更大讚劇情精彩。


而另一位收穫觀眾好評嘅仲有飾演馬國明大嫂嘅陳熹潼。

陳熹潼 被觀眾讚賞將大嫂嘅神經質同怨婦眼神詮釋得淋漓盡致，更認為佢可以角逐「最佳女配角」獎項。面對觀眾嘅喜愛，陳熹潼都覺得感恩同感觸，所以喺結局後佢亦寫長文感謝劇組以及劇中老公 黃智賢 帶領，佢更感激一位觀眾寫咗一篇幾百字嘅文章鼓勵佢積極拍片，令佢有所改變。

https://www.instagram.com/p/Dc5xEzbzeRQ/


陳熹潼仲透露，自己用咗一年時間思考自己係咪適合做演藝圈，仲話：「如果從頭再揀，我會做醫生，一定唔會做呢一行。」因為做演員好被動，需要被監製賞職：「經過20年嘅驗證，我發現自己應該冇乜演員命。用盡洪荒之力，仍然好似喺起點踏出一兩步。天生食呢行飯嘅人，係俾人推住背脊走嘅。所以我承認咗，接受自己天生唔係食呢行飯嘅人。」隨劇集播出，開始有人嗌出佢全名，令佢再度糾結自問：「因為原本已經準備好離場，而家又係自欺欺人嘅假象嗎？要繼續踩返入坑入面嗎？」

再加上佢有份參演嘅新劇《死有對証》即將播出，佢形容：「戲份係正式加入TVB四年以來最多嘅一次，都可以話係我最欠缺嘅「入屋」機會。」令佢開始覺得要且行且珍惜，仲話：「前路，我唔知應該點樣走，但此刻只係充滿感恩、感謝同珍惜。我只係星河入面好平凡嘅一顆小星星，但都希望我嘅光能夠隱隱被你看見，抬頭看見我也曾經努力發光發亮過。」