[bouncer]up緊,就快得

發表失敗
發表失敗
原因: 確定
極端的年代 111日
之前,共產國際執委會就李立三路線問題先後於去年10月同12月向中共中央寫信,認為李立三自1930年6月開始進行進攻中心城市嘅冒險主義計畫,犯咗路線上嘅錯誤,並且同時指責瞿秋白主持嘅三中全會喺李立三問題上犯咗調和主義嘅錯誤,早前提過,犯錯嘅李立三人已經被送到莫斯科處理,來自莫斯科共產國際嘅意見,令到中共內部思想更加混亂,莫衷一是,究竟係打?定係韜光養晦?而王明喺其蘇聯老師米夫嘅支持下,則指責李立三嘅錯誤,其實係「左」嘅詞句下掩飾嘅「右傾機會主義」,左右問題,真係有理說不清,純粹睇吓你點演繹吧?不過王明最後同李立三一樣,一樣主張喺全國範圍內採取全面進攻嘅策略。王明喺去年11月根據共產國際嘅指示,寫成一本叫《兩條路線》嘅小冊子流通黨內,內裏已經整提出進攻主張,實情係,王明比李立三仲要左,但係佢卻入主中央政治局,不久又被補選為政治局常委,掌握咗實際嘅領導權,係之後一段時間,國際派王明嘅理論成為咗中共嘅行動綱領,是好是壞?下回分解。

1月9號,山西善後協進會喺閻石山大本營太原開會,決定將山西駐軍一律改編為中華民國國防軍,徹底百分百削去閻石山軍事力量,財政絕對公開,並將兵工廠改為農具製造廠,實行軍民分治。山西問題,就係咁解決咗,解決咗就係解決咗,閻錫山仍然係山西王,不過係一個冇兵在手嘅山西王,不過又係嗰句,點樣都好過蔣Sir結拜兄弟馮玉祥嘅。

同日,外交部限定上海為唯一進口鴉片口岸,睇到依度,我都覺得非常奇怪,禁煙搞咗咁多年,點解仲有鴉片可以進口嘅?唔通係藥用?點解唔一刀切全面禁止鴉片呢?我諗上述問題,就係當時中國最大嘅問題。今日,中華文化教育基金董事會喺上海開年會,決定每年資助北京大學革新事業20萬元,以5年為限。

1月15號,中國政府正式收回比利時喺天津嘅租界,比利時喺中國嘅租界於1902年2月簽訂《天津比國租界合同》中被劃定嘅,範圍為海河東岸740餘畝土地。1927年1月,漢口、九江英租界收回,響國內引起很大嘅震動,比利時政府隨即向中國表示願意交還天津租界,雙方經過談判,於前年8月31號喺天津簽訂租界交還協議書,首次以和平會議方式簽訂租界收回協定之例子。1月15號,中共蘇區中央局喺贛南寧都縣黃坡成立,任命周恩來為書記。

#常威 #蔣介石平反系列 #黃金十年 #民國歷史
極端的年代 110日
【常公子歷史頻道406回:替大軍閥平反系列之 好人內閣】

最近世界的焦點都落在塔利班身上,一般人都認為塔利班係一個伊斯蘭教原教旨恐怖組織,依個組織響二十年前曾經統治過阿富汗大部份區域,當時世界上祇有三個國家承認佢哋嘅政權合法,之後喺美國干預下,推翻塔利班,成立阿富汗新政府,但塔利班並冇消失,仍然活躍於阿富汗北部地區,終於到咗20年後,美軍撤出阿富汗,塔利班回朝,竟然喺短短日子內,以勢如破竹之勢短時間內成功奪取整個阿富汗,我非常相信,一個月前,世界上冇人可以估到會咁發生,就算拜登應該都唔能夠。

世事的確係稀奇古怪,難怪有人稱呼已經進入亂世時代,的確冇錯,20年前嘅塔利班,以炸毀著名古蹟巴利揚大佛聞名於世,當然侵犯女權亦係佢哋嘅代名詞,但究竟點解,塔利班仍然咁受阿富汗人民歡迎呢?我非常唔明白。好有可能呢個恐怖組織真係好恐怖?但亦有可能我哋所理解嘅並非真相?我冇去過阿富汗,我其實唔知道阿富汗究竟係一個乜嘢地方?或者當地人民究竟諗緊乜?一切都係新聞資訊給我嘅想像同憶測,但係唯一可以肯定嘅就係,當美軍同其他聯合國部隊撤出後,新政府就立刻倒臺,脆弱得好得人驚;另一方面,塔利班嘅影響力亦從來冇消失過,反而比以前更壯大,戰鬥力更強。相信上述兩點一定冇錯,否則表象唔可能會咁發生。

仲有一點亦百份之九十九肯定,就過去20年中,美國或西方國家並冇響阿富汗身上取得任何實質利益,美國宣稱,過去20年一共用咗二萬億美元軍費,有投資無回報,所以決定一刀切離開阿富汗呢個困局,一切都係同錢有關。至於正義的問題,我相信亦能夠談論,可能阿富汗自己都有自己嘅問題,旁人難以理解。仲有一點我可以肯定,宗教係阿富汗國家當中扮演嘅角色,一定遠遠比你同我嘅想像更加大,大好多好多倍,香港畢竟是一個缺乏任何信仰嘅特殊地區……

https://youtu.be/8u-5X61PBzU

【我奮鬥不奮鬥】 常公子 楊熙合著

電子書下載 https://play.google.com/store/books/details?id=CVo3EAAAQBAJ
Amazon Kindle版下
https://www.amazon.com/dp/B098XHWTDK
實體書訂購
https://www.382now.com/product?id=325
極端的年代 110日
https://upload.hkgolden.media/comment/yoxzkwel.vtdgw2arhq4.ewvyeorbzos.dd4.jpg

本土唯一香港土話近代史文本

【常威近代史】第一部《大清亡國關慈禧蛋牛治》,全面開放,免費下載, #freedownload!

Free下載連結

https://play.google.com/store/books/details?id=C3hjDwAAQBAJ
山系型男必入手爆紅越野鞋
Hoka One One男裝跑鞋八五折優惠碼「NEW15」HK$885!
www.matchesfashion.com
贊助網站
極端的年代 109日
#唔鍾意睇字可以聽

https://www.facebook.com/129055447762576/posts/791364068198374/
極端的年代 109日
https://upload.hkgolden.media/comment/znyic0n1.wl5ovacdlqu.21t3n5hbsfh.hwu.jpg


【常威近代史】(五百七十八回)
冒險家樂園

1931年1月16號,繼閻石山山西問題後,西北善後軍事問題基本亦獲得解決。蔣Sir、張學良聯名通電,委任宋哲元(1885-1940)、商震(1888-1978)等為軍長,龐炳勛(1879-1963)為師長等編收馮玉祥留低嘅西北軍,同日,國民政府通電全國,自本年1月起,總司令部各公文均由陸海空軍副司令張學良副署,張支票要寫兩個名,就即係話同你分享權力,張學良東北40萬大單向蔣Sir投誠,亦得到佢應得嘅嘢,相當公平。

世事亦系如此,講係冇用嘅,落注嗰一part先係最重要,你買中贏嗰瓣,自然就會派彩,買唔中,就即係輸咗。政治世界同跑馬一樣,冇話對定錯,無是非黑白之分,狀態最好質素最高嗰隻馬亦唔會一定跑出,only只有輸贏之分,政治亦基本上係一場賭博,參與政治嘅人都係賭徒,作為一個職業賭徒,要懂得賭博,習慣賭博,不過賭錢其實都係得一句話——千萬唔可以all in,每一場賭局都要留番小小本錢在手,今場輸咗,下場可以再搏過。

1月16號,國民政府重申禁烟令,凡有毒癮者,唔凖服務公職,唔可以做公務員,我唔清楚當時社會上究竟有幾多人食鴉片?但沿住歷史步伐行嚟,睇怕當時居住於城市嘅男人,起碼有一成至兩成有毒癮,鄉村應該冇毒禍嘅,因為冇錢,不過冇資料可以睇到,當時有錢食鴉片,係一種高尚娛樂,就好似今日嘅人發達要買架跑車一樣,冇鋪癮喺身,有時候好難打入上流社會;好奇怪咩?一啲都唔奇怪,今日歐美國家吸食可卡因嘅人,大部分都係上流人。有人問我,點解有錢人會吸毒?我其實心中有答案,有錢即係唔使做,空閒時間就會多,加上大把錢洗,問心嗰句,其實人生又有幾多娛樂呢?除咗食同訓之外,不外乎就係嫖賭飲蕩吹(現代加旅行),五個範疇全部包攬,唔通有幾十億身家仲宅喺屋企打機寫小説咩?

1月17號,畢業於美國耶魯大學嘅外交部長王正廷(1882-1961)喺北平宣佈,已經解決13個國家係中國嘅治外法權問題,隨住收回租界,國中有國問題逐漸解決,香港同澳門係當時係小問題,細過一粒老鼠屎。最大嘅國中有國問題,存在響自由城邦大上海,根據當時嘅統計數字,上海人口超過315萬,係北平嘅三倍,當時嘅上海,係僅次倫敦、巴黎、紐約、柏林,世界上第五大都市,東京都未追上嚟,而且喺上海進行嘅金錢活動,涉及範疇亦唔單止係中國,可能係整個亞洲東南亞地區,上海其實係當時亞洲嘅金融中心,影響力無比驚人。經過二次世界大戰同1949年中華人民共和國建立之後,呢個金融中心嘅財力逐漸向更南方轉移,另覓替身重生,個替身叫香港,所以如果係未來一段日子,上海再一次取代香港成為金融中心嘅話,其實都祇不過係大師兄歸位。
極端的年代 109日
1月17號,中國國際貿易協會喺上海成立,張嘉璈(1889-1979)等17人當選為協會理事,張嘉璈字公權,江蘇嘉定人(今上海市嘉定區),中國近代政治家、銀行家、學者,浙江財閥巨頭,屬政學系,1901年考入上海廣方言館(上海言文館)學習法文,1904年考中秀才。1906年入日本慶應義塾大學專攻經濟學,師從堀江歸一、福田德三,最後由理財科畢業,中國第一代金融人,奠基者,響20年代張嘉璈擔任中國銀行總經理時,成立咗經濟研究室,為中國培養第一批經濟學家。

1月19號,著名投機大亨黃楚九(1872-1931)因為腦中風死於家中,終年59歲。黃楚九原名黃承乾,號磋玖、知足廬主人,浙江餘姚人,上海企業家,中國新藥業先驅。被譽為「商界奇才」和「百家經理」,一時有上海「新藥大王」和「娛樂業大王」之譽。晚年投身商業投機活動,債務累累,官司纏身。佢出生於一個破落地主家庭,早年隨母親喺上海灘以行醫賣藥為生,1905年,佢利用當時人崇洋嘅心理,將自己根據一份普通處方炮製嘅新藥,命名為「艾羅補腦汁」,假扮洋貨推出市面,結果大受歡迎發大財,並開始揚名上海灘,「艾羅補腦汁」 今日仲可以買到,係一個品牌嚟嘅,我細個我老母覺得我蠢,都畀我飲過一排。呢招扮洋貨橋唔怕舊,最緊要受,用到今時今日,記唔記得有個牌子叫「佐丹奴」?當時就係扮意大利貨出道,鱷魚恤嗰條鱷魚,係copycat,而且日本城同日本無關,德國寶唔響德國做,哈哈。

當時,民族捲烟工業舉步維艱,而黃楚九嘅福昌烟公司以買香菸送紅雞蛋嘅高超廣告手法,打響了「小囡牌香菸」品牌,令英美煙草公司亦自歎不如,最令王楚九聲明彈上天嘅,就係佢創辦咗上海「大世界」遊樂場,大概係中國第一個主題公園,而且佢仲別出心裁創辦咗一張《大世界報》。條條大路最後通向羅馬,1920年,黃楚九開設「上海夜市物券交易所」,即係做莊炒股票,可惜佢正正遇上上海銀根緊縮時期,股價暴跌,以致釀成「信交風潮」 依場金融危機,黃楚九嘅交易所亦被迫停業,之前半生贏返嚟嘅錢也差不多輸番曬,之後黃楚九嘅事業亦開始走下坡,真係精彩人生,大上大落。而大上海,的確係冒險家嘅樂園。

#常威 #蔣介石平反系列 #黃金十年 #民國歷史
極端的年代 106日
#唔鍾意睇字可以聽

https://www.facebook.com/129055447762576/posts/793238831344231/
極端的年代 106日
https://upload.hkgolden.media/comment/hybxjlgy.l4mvokvi5yd.lhajli4djtq.fpi.jpg

【常威近代史】(五百七十九回)
點解唔係坐監而係打靶

1931年1月19號,國民黨中執會通令各地黨部喺3月1號前改組各種人民團體,人民團體亦即是民間團體,政府要加緊控制各種民間社團活動,目的都係為咗想管治得更加順暢,「撥亂反正」係大原則,尤其是係戰爭狀態,1931年嘅中華民國,無疑仍然係處於戰爭狀態,而且情況仍然係嚴峻非常,加強管冶,加強中央政府嘅威權,其實無可厚非。同日,國民黨元老于右任(1879-1964) 視察陝西災區後返回南京,報告陝西自民國統一後,死亡人數已達300餘萬,窮人賣兒賣女達40萬,情況非常惡劣。講講于右任,佢晚年自號太平老人,時人多敬稱其為于老,係一個德高望重嘅大人物。于右任早年係中國同盟會成員,民國成立之後長年在政府擔任高級官員,尤其擔任監察院院長長達34年,是歷史上在任最耐嘅五院院長。佢同時亦係中國近代知名書法家。于右任長髯飄飄,是其一大特徵。

1月20號,北平法國領事館首先發表正式聲明,宣佈移館南京。1月27號,蔣Sir電令湘、鄂、贛三省厲行保田制,保田制即係連坐法,一人犯罪,全族全村同受,目的當然係抑壓三省內共產黨紅軍嘅勢力擴張,同日,中共重要人物羅章龍(1896-1955)等被開除黨籍,理由係羅章龍反對國際派嘅王明,當然另一個理由係羅章龍同當時黨內嘅農民路線本土派大將毛澤東關係密切,羅章龍自1912年從瀏陽到長沙,於長沙第一聯合中學就讀,1915年入讀長沙長郡中學,與同在長沙就讀嘅毛澤東結為好友,被稱譽為「管鮑之交,後無來者」(管鮑,即管仲和鮑叔牙)。1918年4月14日,佢同毛澤東、蔡和森等12人響湖南共同發起成立「新民學會」,成為學會領導者之一。1918年夏天,羅章龍與毛澤東同赴北京(傳聞話佢兩個係一齊行乞,一邊乞食一邊上北京,不過只係花邊),9月羅章龍考入北京大學文學院,毛澤東則成為北京大學圖書館管理員,認識中國共產黨之父李大釗,1919年佢哋一齊參與浩浩蕩蕩嘅五四運動,之後正式加入中國共產黨,成為早期主要骨幹成員。

1月30號,教育部命令國立國大學、專科學校及各公、私立高中以上學校加緊軍事訓練,規定軍事教育修習期為兩年,係所有高中以上學生要進行軍訓,即係隨時可以被調配上戰場掘地雷。1月31號,國民政府公佈《危害民國緊急治罪法》,進一步加強政治操控,矛頭當然係直指國內的左翼分子。

1931年2月1號,交通部喺上海設立國際電訊局,應該可以同巴黎倫敦紐約帕林東京通電話了。2月3號,北平發現鑄有吳三桂、陳國棟等字樣嘅古砲成千尊,吳三桂大家當然知道係邊個,引清兵入關,冠一怒為紅顏,為咗天下第一美人陳圓圓反大清康熙嘅大漢奸大黑面(金庸鹿鼎記有詳細記載),至於陳國棟,我查唔到係乜嘢人,因為呢個名太普通,大家知道佢係邊個,唔該通知本公子。
極端的年代 106日
新上任嘅兵工署長俞大維(1897-1993)將兵工署原有四科改為三司:分別係技術師、資源司同行政司。俞大維係當時國民黨內最高級嘅知識份子,佢獲得美國哈佛大學數學博士,係一個真真正正嘅PHD,點解我強調係真真正正?因為當時好多都係假貨。後來佢喺德國柏林大學攻讀彈道學,上任後嘅俞大維支持資源司長李待琛推行兵工業實施計畫,從事國防資源調查,研究兵工原料及其代用品嘅製造,提高武器彈藥原料嘅自給程度,並且籌畫戰時民用工廠轉產軍用品嘅project。

2月7號,國民政府任命沈尹默(1883-1971)為國立北平大學校長,徐旭生(1888-1976)為國立北平師範大學校長。同日,中共江蘇省委委員何孟雄(1898-1931),全總執委兼秘書林育南(1898-1931)等24人喺上海龍華被國民黨淞滬警備司令部秘密槍決,死去嘅24人,被稱為「龍華二十四烈士」,林育南與堂兄林育英,與堂弟林彪並稱為「林氏三兄弟」。相信大家都知道林彪到底係邊個?「龍華二十四烈士」中,仲有左聯胡也頻(1903-1931)、柔石(1902-1931)、殷夫(1909-1931)、馮鏗(1907-1931)、李偉森(1903-1931)五位年青作家以及其他19位中共黨員。胡也頻等五人一齊響1930年加入中國左翼作家聯盟,除咗殷夫外,其餘四位都係中共黨員,李偉森仲擔任過共青團中央宣傳部長。1月7號,國民黨淞滬警備司令部以「共黨份子」、「宣傳赤化」 等罪名將五人拘捕,然後打靶,五人之中,除咗殷夫係詩人,其餘四位都係小說家。仲有你睇返啲年紀,全部都係二十零歲嘅大好年青人知識份子,政治鬥爭何其殘酷?有陣時我唔識講?亦唔知道點樣講?點解唔係坐監?而係打靶?兩者有好大分別。

我再講多次,太平盛世就有好多空間可以來去自如,包括行動上同思想上; 但係當進入戰時狀態,空間就會急速收窄,亦包括行動上同思想上。現實就係咁樣一回事,亦冇話對與錯,亦冇話是與非。政治到底係乜?政治就係解決當前問題嘅方法。

#常威 #蔣介石平反系列 #黃金十年 #民國歷史
極端的年代 105日
#唔鍾意睇字可以聽

https://www.facebook.com/129055447762576/posts/794306281237486/
極端的年代 104日
https://upload.hkgolden.media/comment/1uki3uny.p0ommoy55ak.wyre2dfvthc.0jk.jpg


【常威近代史】(五百八十回)
毒品生意真係好大

1931年2月9號,實業部計畫喺首都南京創辦五大工廠,大搞國企概念,2月10號,何應欽(1890-1987)抵達南昌,部署對中共根據地嘅第二次大圍剿,當其他的敵人大致搞掂,蔣Sir將矛頭直指共產黨,誓要剷除依一股赤化力量,好可惜,大家都知道蔣Sir最後無成功到。

2月11號,國民政府命令教育部喺文化基金下,撥出專款收購古籍文物,嚴禁轉售外人同流出海外。至於有幾多珍貴文物已經流出海外?或者被私人珍藏收藏?已經係無法估計。2月12號,外交部長王正廷表示中國決心以最大嘅努力爭取早日取消列強係中國嘅領事裁判權,實踐中華民國主權體現,過去幾年,中華民國已經做得非常成功,不斷收回列強響中國國內嘅租界,不過我個人認為,最大嘅問題始終係大上海呢個亞洲大錢罌。

2月13號,蔣Sir同張學良通電全國,晉軍除咗保留商震(1888-1978)、徐永昌(1887-1959)、楊愛源(1886-1959)同傅作義(1895-1974)四個軍外,孫楚(1890-1962)部隊編成護路軍,警備隊編為三個團,李服膺(音:英)(1880-1937)部隊編為一個師,騎兵編為三個旅。晉軍嘅善後事宜由四位軍長同埋孫楚組成嘅軍事委員會辦理,總之就冇你閻錫山份。至此,中原大戰遺留下來嘅善後問題,大致上得到解決,閻石山同馮玉祥大部份嘅部隊,都被蔣Sir同中央政府收編。當時嘅軍人,非常習慣依種換排頭成間鋪頂手嘅過程,總之繼續有工開,唔使俾人掟番去農村耕田就ok,換個老闆,都係返工,好過失業。2月13號,日資嘅撫順煤礦礦坑硫磺起火,日籍技師旋即封閉礦洞,造成大量華工燒死或窒息死亡,死亡人數據報多達3000人,呢次慘案,無疑又為中日之間血腥班嘅仇恨再添上多一筆。俗語有話,行船跑馬三分險,但係我覺得做礦工就最危險。

閻錫山同馮玉祥嘅部隊被中央收編,馮玉祥下野變成平民做咗文學家,閻石山做咗個無兵司令,咁有份打中原大戰嘅桂系又如何辦理呢?正所謂同人唔同命,大家待遇有所分別。2月11號,陸海空軍總司令部參議馬曉軍(1881-1959)喺上海開記者招待會向中外記者表示,關於桂系問題,已經和平解決,李宗仁、白崇禧、張發奎給予考察名義出洋,暫時離開是非之地,無需要被追究戰爭責任,桂系軍隊交由黃紹竑縮編,係縮編,唔係收編(Stop la),只係要你桂系裁軍啫,黃紹竑亦係桂系老大哥,自己人搞自己事,中央未有插手,不過裁軍嘅規模都幾大,要響三個月內,縮編為10個團,if你冇錢遣散軍人,遣散費亦由中央補貼,另外進入廣西嘅粵軍亦都退出廣西,大家好嚟好去,真真正正叫和平解決。不過冇辦法,當日1927年北伐成功,桂系李宗仁白崇禧功勞太大,凡事有因有果,好快李宗仁白崇禧仲會復出,活躍於民國政治舞臺,大家都應該一清二楚。
極端的年代 104日
2月15號,根據《申報》報導,近半年來,華北一帶輸入嘅可洛英價值一億元,有五萬人中毒,毒品問題,仍然非常困擾中華民國。海洛因(heroin),俗稱白粉,係一種鴉片類藥物,1874年,任職英國聖瑪莉醫院的化學家偉特(C.R Wright)第一次合成海洛,醫療用途上,可洛英可以代替鴉片同嗎啡,作為止痛及麻醉劑,但因可洛英可以係極短時間內為人類帶嚟生理上及心理上嘅強烈快感,而且極度容易成癮。常見嘅用藥方式為靜脈注射,但亦可以經口或鼻吸入海洛因的煙,藥效可持續數小時。製造可洛英嘅原材料亦都係鴉片罌粟花,順帶一提,2015年數字,世界上三分二嘅罌粟來自阿富汗。

2月16號,國民政府監察院正式成立,監察院長為白髯飄飄嘅于右任(1879-1964),現在臺灣地區監察院長係民進黨嘅陳菊。2月18號,《國民日報》報導,中原大戰內戰造成全國鐵路損失7200萬元,你睇吓,打場大型內戰,全國鐵路打爛咗四分一,鐵路損失都係7200萬,半年內輸入可落英嘅價值就係一億,毒品生意可以有幾大?大家一目了然。

2月19號,內政部為整頓全國警政,將公安局改為警察局,省警備處改為省警備廳。同日,英國下議院通過將300萬鎊嘅庚子賠款退還畀中國,2月24號,上海首創黃包車車廂廣告。2月28號,胡漢民同蔣Sir夜間發生激烈爭吵後被拘禁,2月29號,胡漢民被迫辭去國民政府委員、立法院院長等黨政要職,並軟禁於家中。兩個人嗌交嘅焦點,係蔣Sir主張召集國民會議,制定《訓政時期約法》,選舉擁有管轄五院大權嘅總統,而胡漢文卻只同意召開國民大會堅決反對制定《約法》。胡漢民堅持國民黨三大曾通過決議,確定「總理遺教」 為訓政時期中華民國最高基本法,再立《約法》,豈不是連總理孫文都要靠邊站?

蔣Sir 集黨、政、軍大權於一身嘅做法,一直遭到國民黨元老級人馬胡漢民批評同抵制,胡漢民指責蔣Sir唯自己意志行事,令到南京政府變成傀儡政府,胡漢民話「會而不議、議而不決、決而不行、行而不動」喎,蔣Sir因此早就將胡漢民視為心腹大患。下個月3月2號召開國民黨中執位常務會議上,蔣Sir提出制定嘅《訓政時期約法》 議案,當然順利被通過了。

#常威 #蔣介石平反系列 #黃金十年 #民國歷史
極端的年代 103日
【常公子歷史頻道409回:替大軍閥平反系列之 愛因斯坦評價中國人】

今集講愛因斯坦評價中國人,答案當然令人好悲傷。不過都係100年前嘅事情,今日嘅中國人當然唔係當時嘅模樣,況且愛因斯坦就祇有一個愛因斯坦,任何人同佢比較,都祇不過係石梨貝水塘嘅恒河猴。愛因斯坦並唔係普通人,佢響腦裏面嘅「思考實驗」,不但創造出相對論,而且例如重力波等概念,到100年後被實証為真,論智慧,猶太人愛因斯坦無出其右。

有傳聞話,愛因斯坦嘅大腦結構同一般人唔同,大腦頂葉比常人大百分之15%,尤其是左下頂葉嘅膠質細胞比例明顯偏高等等。關於愛因斯坦大腦嘅故事都幾傳奇,根據《國家地理頻道》記錄片《愛因斯坦大腦的秘密:死亡之謎》指出,愛因斯坦死後不到幾小時,佢嘅大腦即被人取出保存,成為20世紀最傳奇嘅謎團之一。1955年4月18日,愛因斯坦響美國新澤西州普林斯頓大學醫院去世。當時42歲嘅托馬斯哈維係普林斯頓大學病理學家,碰巧成為咗愛因斯坦嘅驗屍醫生,最終哈維宣佈,愛因斯坦死於「大動脈腫瘤破裂」。但誰也不知道,一直係愛因斯坦仰慕者嘅哈維隱瞞咗一個驚人秘密:佢悄悄地切開愛因斯坦頭皮,將佢嘅大腦完整地取出,浸泡響防腐藥水裡並帶回家隱藏起來!直到屍身第二天被火化時,愛因斯坦家人還不知道大腦已經不翼而飛。

如果上述事件係真(當然也有機會假),的確是最傳奇的「盜腦」故事,如果呢位哈維醫生真係未經愛因斯坦家人同意就盜取佢嘅大腦,情況都幾令人髮指,因此我對這個講法有所保留。現代世界「假新聞」太多,就算係《國家地理頻道》都唔可以信曬。

https://youtu.be/cPkKSvyeorc

【我奮鬥不奮鬥】 常公子 楊熙合著

電子書下載 https://play.google.com/store/books/details?id=CVo3EAAAQBAJ
Amazon Kindle版下
https://www.amazon.com/dp/B098XHWTDK
實體書訂購
https://www.382now.com/product?id=325
極端的年代 102日
【常威近代史】第五百八十回 毒品生意可以好大(高清錄音版)

#唔鍾意睇字可以聽

https://www.facebook.com/129055447762576/posts/795607417774039/
極端的年代 102日
https://upload.hkgolden.media/comment/jpypqg53.ya2e0d0avvk.grkpnfkeek2.kg1.jpg


【常威近代史】(五百八十一回)
屬於中國人自己嘅味精

1931年嘅2月,中共中央畀紅一方面軍總前委,江西省委、各特委,各地方黨部嘅指示信中,再次號召喺蘇區內「為著肅清AB團與一切反革命派而鬥爭」。咁乜嘢係AB團呢?AB團(Anti-Bolshevik League,反布爾什維克組織)係中國國民黨中反共者於1926年12月在江西成立嘅一個團體,AB團主要工作係響「國共合作」期間與共產黨爭奪江西省國民黨黨內權力,1927年4月2日,發生咗針對江西省國民黨黨部的「四二暴動」,AB團隨後垮台。但消失咗,並唔代表唔存在,之後幾年,中共江西蘇區內,中共都認為有AB團混入咗內部,並在其黨群機關中開展一系列反AB團鬥爭,有黨員被打成AB團並被處決。

鄭學稼(1906-1987)響《中共富田事變真相》一書中評論道:「我們知道:國民黨人組織的AB團,不是後來所說的Anti-Bolševik,它只存在三個月的時間。毛澤東利用這個名稱,發動『富田事變』,張國燾也利用它,發動『許繼慎派慘案』」。如果大家想知道關於更多AB團同江西整肅運動嘅歷史,可以去睇睇歷史學家高華(1954-2017)所寫嘅重量級鉅著《紅太陽是怎樣升起的》。

或者AB團只係一個藉口去發動黨內肅反行動,或者真係有好多無辜嘅自己人受害,但係戰爭就係咁殘酷,喺戰時狀態裡面,唔係你死就係我亡,係生死嘅問題,並唔係是非黑白嘅問題。「寧枉無縱」 係好多時候我哋睇到嘅現象,尤其是對付內奸間諜問題,任何組織都會被敵人滲透,問題只係多與少、深與淺,「有殺錯冇放過」實屬常態。所以存活於太平盛世嘅人,千萬唔可以渴望戰爭發生,因為一旦進入戰爭狀態,我哋平日相信嘅理性會秩序同合理性都會唔存在,或者統統瓦解。所謂法律、制度同秩序係響太平盛世嘅大前題下先會成立,其實並唔係必然,亦無其必然性存在。有好多嘢你覺得係必然,只因為你已經習慣活於無風無浪嘅太平盛世世界太耐,正如你會認為打開水龍頭就會有乾淨嘅食水享用,路上遇到賊可以報警搵警察求助一樣,如果你認為係必然,你要去——驗驗腦。

1931年3月1號,中國航空公司滬平線試航成功; 同日中國語言文字學會喺上海成立。3月4號,上海公共租界巡捕房以代售左翼作家刊物為名,封閉北新、聯合、江南、群眾四間書局。3月6號,招商局「新昌」輪喺吳淞口北馬鞍山群島附近遇霧觸礁沉沒。3月7號,紅一方面軍發佈毛澤東主持制定嘅關於地方武裝展開遊擊戰,以配合紅軍主力殲滅敵人嘅「最高指示」,即係配合中共中央國際派王明嘅主動進攻路線,順帶一提,王明從來未去過江西蘇區,一直喺上海遙遠控制情況。
極端的年代 102日
3月8號,國民黨北方機關報之一嘅《華北日報》社,遭到一批自稱國家主義派嘅流氓襲擊,四名報社職員受重傷。3月8號晚上七點,50幾個手持鐵棍、石灰嘅滋事者闖入報館,將編輯部、印刷部等玻璃窗砸爛,搗毀傢俱,用具、鉛字等,並且毆打報社員工,依班流氓(如果冇睇錯應該係黑社會)一邊破壞,一邊高呼「打倒國民黨」,「國家主義萬歲」等口號。3月15號,張學良下令嚴行查辦滋事者,但大部份滋事者已經逃去無蹤,變咗單無頭公案。其實我唔明咩叫「國家主義」?係唔係即係「民族主義」?或者「愛國主義」?擁護一個國家或者擁護一個政黨,兩者嘅分界線又應該喺邊度呢?要釐清上述概念,其實比較複雜,好多時候大家就係炒埋一碟就食,用香港嘅飲食文化辭彙,叫小炒王。

3月8號,第九世班禪活佛確吉尼瑪(1883-1937)率領隨從百幾人,由烏珠穆沁前赴熱河,轉去瀋陽講經受禮。3月10號,陸海空軍討逆陣亡將士追悼大會喺南京舉行。3月11號,國民黨會議決議設立警察總監,總攬全國警務,警察制度亦都歸於統一。同日,大達輪船公司大吉輪失火,死400人。

3月15號,為咗資助家境清貧但有志向學嘅青年嘅《清寒教育基金》 首次召開會議,該基金會由上海天廚味精廠總經理吳蘊初(1891-1953)發起成立,吳蘊初自己捐一萬,另外再籌得五萬,吳蘊初喺江蘇嘉定人,中國第一代化工實業家,上世紀20年代,繼日本發明「味之素」之後,年輕吳蘊初就立志要研製出了中國人自己嘅味精,1921年初佢喺上海創辦中國第一間味精廠,同日本人競爭而且獲得勝利,之後吳蘊初逐步建立實力雄厚嘅「天廚企業集團」。

3月15號,發生咗件中國電影界盛事,中國第一部有聲電影《歌女紅牡丹》喺上海新光大戲院公映,唔係北角李居明嗰間,有聲電影首先響1926年由美國華納兄弟公司率先拍攝成功,明星電影公司經過多次試驗,並響法國百代唱片公司協助下,響中國首先攝製完成蠟盤發音片《歌女紅牡丹》,電影之後喺各大城市放映,當然大受歡迎,喺南洋地區嘅放映權,亦都比高出默片十多倍嘅價錢出售。

#常威 #蔣介石平反系列 #黃金十年 #民國歷史
極端的年代 101日
【常公子歷史頻道409回:替大軍閥平反系列之 話事人只可以有一個】

杜琪峰電影《黑社會》第一集最令人震撼的畫面,就係最後響石梨背水塘,本來和好如初嘅梁家輝飾演嘅大弟向任達華飾演嘅樂哥,提出雙話事制,即係輪流坐莊,一個社團有兩個話事,一人做一屆。結果任達華聽完,就攞起嚿石頭監生打死咗梁家輝,場面非常殘忍,殺咗梁家輝仲未夠,任達華仲順手殺埋佢老婆邵美琪,之後同個仔開車離開石梨背水塘。這一幕非常震撼,過咗好多年仍然留喺我腦海中,一套偉大嘅電影就係要令人留下深刻嘅印象。依一幕,更加表達出來一個絕對真理,就係話事人從來只可以有一個,輪流坐莊根本無可能。最高嘅權威同最高嘅仲裁人,只可以有一個,否則真理無法存在,大家都應該明白。

《黑社會》第二集「以和為貴」中,我最有印象的畫面,反而係古天樂鬧佢大佬「唔識賭就唔好學人賭」,賭錢真係要識賭,否則好容易輸身家,咁點先算識賭呢?其實亦都好簡單,就係唔可以搏命,唔可以孤注一擲,唔可以隨便all in,要小心控制注碼,亦要小心自己能夠承受嘅風險有幾大?一句到尾,就係要冷靜。亦唔可以相信賭博可以養全家,否則返工嚟做乜先?

非常可惜嘅係,類似《黑社會》 呢一類電影,喺一段長時間之內,都唔會在香港出現,香港所出現嘅巨大變化,睇嚟需要5至10年,大家先可以適應到,不過變幻原是永恆,亦沒有什麼大不了。生活一直在變化,我哋要適應變化,承受變化,然後再重新找尋出路,諗清楚,亦沒有什麼大不了,生活本是如此。

https://youtu.be/ay5UmlIgLrc

【我奮鬥不奮鬥】 常公子 楊熙合著

電子書下載 https://play.google.com/store/books/details?id=CVo3EAAAQBAJ
Amazon Kindle版下
https://www.amazon.com/dp/B098XHWTDK
實體書訂購
https://www.382now.com/product?id=325
極端的年代 99日
[常威近代史]第五百八十一回 屬於中國人自己嘅味精(高清錄音版)

#唔鍾意睇字可以聽

https://www.facebook.com/129055447762576/posts/797316684269779/
極端的年代 99日
https://upload.hkgolden.media/comment/q1eiz4iy.sj24kteyd3w.fo4gllxcm2t.bbj.jpg

【常威近代史】(五百八十二回)
收音機時代 唔識字可以聽

1931年3月17號,中央國醫館喺南京成立;3月19號,國民黨中央推舉戴陶季等起草《國民議會組織法》,一切推倒重來,議會重新起步;同日,《哈爾濱日報》 因為刊登宣傳蘇聯方面嘅消息而被查封。3月21號,國民政府公佈《特種考試法》; 3月23號,中國首次發明可以直接接收外國電波嘅遠距離無線電收音機,整個世界,亦開始進入廣播年代,民衆不單止可以睇字,仲可以聽,依一個係一個好大嘅變化,因為當時嘅中國,其實亦不單只係中國,整個世界上有大量人仲係文盲,唔識字唔可以閱讀唔識睇報紙,但係當收音機廣播出現,文盲嘅人都可以透過聲音接觸資訊,可以理解世界。

早前,我先知道原來美國到咗今時今日二十一世紀,仲有五成以上嘅公民冇護照,即係話佢哋永遠唔會亦唔需要離開美國國境,你可能好難去理解呢件事,因為香港本身係一個國際化外向型嘅金融貿易城市,飛嚟飛去 、出出入入係日常生活嘅一部分(當然係covid-19疫情未發生之前),但事實上,響地球村裏,其實仲有好多人只係活喺佢哋狹隘嘅生存環境裡面,非常封閉非常宅,亦冇必要接觸外界事物同訊息,外面發生嘅事情基本上同佢哋無關,冇必要理亦唔需要知。知道咗叫得個知字,唔知道亦唔會影響日常生活。

100年前的世界,依種封密生活方式其實佔絕大多數,中國佔九成半以上嘅農民人口,就係活於依種封閉式嘅農村生活狀態,世界對佢哋嚟講,可能只係方圓幾百里或幾十里範圍內嘅事物,可能只係幾條村幾個鄉,要接觸嘅人可能只係幾百人,甚至只係幾十人,日出而作,日入而息。我經常覺得,所謂國際政治,其實只係國家裏面城市人嘅國際政治,所謂國家,其實衹是以城市作為單位。而「城市」同「鄉村」嘅生活同對生存存在嘅概念,根本係完全風馬牛不相及嘅兩回事,So……我都係純粹好似愛因斯坦咁做「思考實驗」,完全沒有實質證據支持,畢竟我祇不過係一個喺城市長大嘅平凡人類,所思所想完全係城市人模式,鄉村生活到底係點?我識條鐵?畢竟係存在決定意識,並非意識決定存在,請謹記。

3月21號,山東省政府主席韓複渠致電國民政府,講到戰禍連年,山東曲阜孔廟遭到嚴重破壞,要求中央政府撥款十萬元修葺,4月17號獲得批准。4月18號國民黨山東省黨部省政府組成咗修復孔廟籌備會,4月25號,戴季陶(1891-1949)、蔡元培(1868-1940)、邵力子(1882-1967)、宋子文(1894-1971)、何應欽(1890-1987)等38猛人聯名通電全國,呼籲各界為修復孔廟而籌款。
極端的年代 99日
3月24號,蔣Sir 給予敵人一個全新名字,唔叫「共匪」,改稱為「赤匪」(Communist bandit),打倒共產黨共產主義,係防止佢哋赤化世界。事實上,「資本主義」同「共產主義」 兩大意識形態嘅鬥爭,亦由1917年蘇聯變成世界上第一個共產主義國家之後,再不斷向全世界輸出革命開始尖銳化同白熱化。資產階級當然驚赤化,驚共產黨嚟共佢哋嘅產分田分地分資產要佢哋跪玻璃,而無產階級亦拒絕繼續被資本家剝削,要團結起來爭脫鎖錬,兩種主義,代表兩個唔同階級嘅立場同觀點,基本上冇話邊個係啱邊個係錯?但係呢種「資本主義」同「共產主義」 嘅意識形態二元鬥爭模式,一鬥就鬥到今時今日,到咗21世紀我們身處嘅今時今日,基本上仍然係處於呢一個二元鬥爭嘅格局裏面,真係沒完沒了。要講多次,真係冇話邊個啱邊個錯,你係有錢人,自然抗拒共產主義,你係窮人,自然仇恨資本主義。正如你有樓,就希望樓價升(最好升到上太空),冇樓想上車,就希望樓價跌(最好跌到Hi Hi)一樣。又係同一個道理,係存在決定意識,並非意識決定存在。

3月25號,國民政府致函國聯,建議中國與歐美國大學交換教授,促進中西文化交流;同日,國民政府嚴令禁娼,並且禁止歌女入住旅館。呢個世界有三樣野永遠禁唔到,排喺首位嘅應該係娼、第二應該係賭,第三應該係毒,因此叫做黃賭毒,不過又係嗰句,人世間娛樂究竟有幾多種呢?好多咩?禁曬黃賭毒,仲可以有咩生趣呢?

3月27號,國民黨軍隊南昌行營下達向江西紅軍進行「第二次圍剿」總攻擊令!3月28號,國民政府公佈《管理英國退還庚款董事會章程》,之前已經提過,英國下議院通過議案,將1901年開始嘅庚子賠款,退還返畀中國,國民政府今日公佈,將由十個中國人及五個英國人組成隸屬行政院嘅董事會,負責管理英國退還嘅庚子賠款用途。1901年,因為八國聯軍入京,英美等西方列強同清政府簽訂喪權辱國嘅《辛丑條約》,規定中國為庚子年嘅戰爭賠款連本帶利一共9.8億兩白銀,分39年償還。最大債權人之一英國於1930年與中國達成協議,將歷年收返嚟嘅庚子賠款全數退還比中國,而中國政府則用依筆筆款項修建粵漢鐵路,亦有部分用於建築水利、圖書館、博物館等基礎建設。

講真,大英帝國食中國食得最深,第一次世界大戰之後,英國國力響世界舞臺江河日下,美日後上發力一衝過曬,英帝由中國舞臺退場之前,做返啲好事充斥門面,叫做粉飾太平,好嚟好去。紳士風格,就係要你永遠睇唔到整齊西裝背後一切破綻所在。

#常威 #蔣介石平反系列 #黃金十年 #民國歷史
極端的年代 97日
[常威近代史]第五百八十二回 收音機時代 唔識字可以聽(高清錄音版)

#唔鍾意睇字可以聽

https://www.facebook.com/129055447762576/posts/798502340817880/

#yup# #yup# #yup#
極端的年代 96日
【常公子歷史頻道410回:替大軍閥平反系列之 越飛】

存在主義者(Existentialist)應為我們是被「投擲」到這個世界上存在,「投擲」的意思是偶然選取,因此來到這個世界都是身不由己的,是隨機的,是偶然的,或來到這個世界後,以什麼角色存在,其實都是身不由己——用香港人嘅說法最好,你被投擲去公屋戶出世,抑或被拋擲到豪宅內出世,根本係兩回事,人生的無奈,大概亦係由此發生。

被投擲存在之後,就要一直活下去,期間你會發現,有人可以活得很輕鬆很快樂,亦有人可以活得很悲情很痛苦,總之千差萬別,百樣米養百樣人,任何情況都可以發生,年紀去到某個階段,你又會發現,不快樂的情況比快樂的情況多,真正活得輕鬆快樂的人,衹是佔很少數,很多時候,口裏說活得痛苦的人,實情也沒有想像中痛苦,總之,兩極之間的距離開始收窄,原來大家都很平凡,原來大家如果在同一個社會中生存,所面對的問題大概都是差不多,煩惱的源頭都是那幾個,其實沒有什麼大不了。

年少氣盛嘅時候,心裡面總有團火,想去做一啲偉大嘅事情,或者去完成一啲偉大嘅夢想。但到咗某個階段,又會發現,原來連自己身邊嘅事情都未能夠處理好,乜嘢夢想乜嘢理想,原來統統只係一啲遙不可及虛無縹緲嘅事情,完成偉大嘅事情,只係屬於極少數人嘅專利,一般人,衹能夠渺小,好難能夠偉大起嚟,做好自己嘅事情,承擔好自己嘅責任,其實已屬難能可貴。年紀越大,世界觀可能越細,到咗最後最後,可能只能夠以衰老頹敗之軀躺在床上,靜候結局來臨。

存在主義者,對世界的無奈和不忿,大概就是這個意思。大家不妨找起一塊石頭,然後將石頭大力投擲到大海裡去,好快你就見唔到塊石頭,亦唔知塊石頭去咗邊,亦永遠冇辦法搵返塊石頭出嚟,大概這種狀況,叫做存在。

https://youtu.be/ww5fR7TVePE

【我奮鬥不奮鬥】 常公子 楊熙合著

電子書下載 https://play.google.com/store/books/details?id=CVo3EAAAQBAJ
Amazon Kindle版下
https://www.amazon.com/dp/B098XHWTDK
實體書訂購
https://www.382now.com/product?id=325

最新上線,請課金支持
【常威近代史】第十部《蔣Sir狼死開拖》
https://play.google.com/store/books/details?id=SgE8EAAAQBAJ
Kindle版
https://www.amazon.com/dp/B09C2FJD3S
極端的年代 95日
https://upload.hkgolden.media/comment/ao3hsrjw.5ap4faesvxe.lek5yxgo20j.kpz.jpg

【常威近代史】(五百八十三回)
第二次大圍剿

1931年4月,主持中共中央工作嘅國際派王明,派遣夏曦(1901-1936,有別名「勞俠」,好型)等人到中共各根據地開展反右傾鬥爭,3月底,湘鄂西中央分局成立,夏曦任書記,黨內鬥爭越來越激烈,內奸間諜內應二五仔金手指要儘快全部揪出嚟,有殺錯冇放過,敵人亦會傾盡全力圍剿紅軍,我再講多次都唔怕厭,當時係全黨全軍生死存亡嘅問題,唔係細路仔玩泥沙,非常時期,要用非常手段。所以,如果你好認真,覺得現在仍然係太平盛世,係20世紀8-90年代嘅好時辰,我真係冇辦法幫到你。有啲嘢,過去咗就過去咗,唔可以返轉頭。亦有啲嘢,係你用意識美化咗過去,身處當時,其實未必係咁好,分手之後,當然最好係前度,因為你自己得好事,忘記咗壞事。但係呢個前度?真係原本嗰個前度?諗諗佢。

4月1號,國民政府派軍政部長、蔣Sir心腹何應欽(1890-1987)代行總司令職權,猛人坐鎮南昌行營,負責剿共,第二度全力圍剿蘇區,上次第一次大圍剿失敗收場,蔣Sir心有不甘,再次召集兵力,以大將何應欽統領朱紹良(1891-1963)、魯滌平(1887-1935,佢係劉少奇表哥)、蔣光鼐(1888-1967)、王金鈺(1884-1951)、孫連仲(1893-1990,馮玉祥手下十三太保之一)等各路軍隊一共20萬,採取「穩打穩紮,步步為營」嘅戰略」,從吉安至建寧一線分成四路,向贛南、閩西等共產黨紅軍根據地進擊,對蘇區紅軍進行第二次大圍剿。

紅軍第一方面軍三萬餘人,喺毛澤東、朱德等指揮下,採取集中優勢兵力先打弱敵,再在運動戰中,個別殲滅敵人嘅戰略,於東固、龍岡地區隱蔽待機,總之堅持遊擊戰略,敵進我就退,敵退我就進,以3萬大軍牽制對方20萬人,當然對方冇報大數,真係有20萬嘅話。當然紅軍有冇3萬人,亦都冇人知。5月15號,王金鈺部隊三路逼近東固,16號右路被紅軍襲擊,損失慘重。17號紅軍主力向東推進,19號,響白沙重創國民黨軍郭華宗、郝(音郭)夢麟兩個師。孫連仲部隊高樹勛聞訊前往救援,亦遭紅軍攻擊,激戰兩日兩夜,損失一旅。5月27號5月31號,國民黨軍又連續響廣昌、建寧各被殲滅一個團。短短半個月嘅戰鬥,國民黨軍喺東固、富田至建寧一綫,就損失咗三萬大軍!南昌行營總司令部被迫下令國軍撤退,恢復戰前態勢,率先穩住陣腳,再作打算。
極端的年代 95日
1931年4月1號,湖南省銀行為咗搞活經濟,由本月起發行輔助幣卷50萬元,咪即係印銀紙,錢唔夠就要印,不過唔可以亂印,印銀紙最大嘅問題就係,可以解決當前問題,但係會為之後製造更大嘅問題,今日世界,大家應該一清二楚。4月2號,教育部通令各省市限制設立普通中學,要增設職業學校,培訓技術人才。4月3號,內政部規定每年4月4號為兒童節,中國終於有兒童節。4月5號,亞洲文化協會第一次代表大會喺南京召開,同時成立新亞細亞學會,亞細亞即係亞洲,「亞細亞」呢個詞今日冇乜人用。4月5號,中共山東省委書記鄧恩銘(1900-1931)喺濟南被槍決,同時被處決嘅一共有22人,鄧恩銘係中國共產黨最早期嘅領導人之一,鄧恩銘同王盡美作為濟南代表出席在上海召開的中共「一大」,係唯一參與中共「一大」嘅少數民族代表。1922年1月,鄧恩銘赴莫斯科參加遠東各國共產黨和民族革命團體第一次代表大會,見過共產主義之父列寧。同日,橫行太湖綽號「太保亞書」嘅匪首徐正明喺上海被捕,16日被判處死刑。

4月6號,浙江舟山群島沈家門漁棧公所、漁業工會等上書國民政府,要求禁止日本漁船捕魚。其時日本漁船2000餘首侵入中國領海大肆捕魚,並以上海為其銷售市場,橫行於江浙海面一帶。國民政府於5月1號下令,一切外國漁船應該退出中國海域範圍,5月9號,又具體公佈領海範圍,規定外國輪船不得隨便侵入。不過喺海上畫線,從來都係非常模糊嘅事,今日嘅南海問題,英國脫歐之後嘅領海問題,或者之前發生喺世界每一個地方嘅海權問題,都係有理說不清,你話你嘅就係你嘅?咁我話我嘅就係我嘅啦,個海咁Q大,又有公海,點樣劃界呢?真係好難解決。更何況,捕魚業本身就係一個好黑暗、無王管嘅行業,船隊出咗海,就係潑出去嘅水,實在好難控制。有興趣嘅朋友可以睇吓Netflix嘅紀錄片《深海陰謀》,會睇到幾心寒。

4月8號,國民政府同英國、美國、法國、日本四個國家協定,以後外國軍艦不再停泊於黃埔江中心,體現國家主權,就再嚮前行一大步。4月11號,根據上海《國民日報》報導,由於實施新關稅, 日本、英國、美國等國家陸續將工廠移設於中國。2月份以來,日本係中國開始嘅新工廠達到500幾間,資本額高達7000萬日元,當時日元同美元同價咁滯。英國同美國亦喺租界內積極覓地建廠,英國響香港新設工廠有24間,喺上海新建工廠有18間。本月20號,上海「中華國貨維持會」集會決議,要求國民政府制止外商來華設廠……

#常威 #蔣介石平反系列 #黃金十年 #民國歷史
極端的年代 94日
【常公子歷史頻道411回:替大軍閥平反系列之 中國最後一個皇帝溥儀結婚了】

末代皇帝溥儀係一個傳奇人物,對於溥儀嘅認識,最早係來自意大利導演貝托魯奇執導嘅電影《末代皇帝溥儀》,仲好記得,我係八十年代響銅鑼灣碧麗宮戲院睇依套戲,喺片中,由亞裔演員尊龍飾演傅儀,陳冲飾演溥儀妻子,印象最深刻嘅,反而係由阪本龍一飾演嘅偽滿洲國日本軍官,最後吞槍自殺一幕,至今依然瀝瀝在目,電影嘅原聲大碟,當然亦是經典之一,那個時代,那些電影,早已經成為不能超越嘅經典之作。

其後睇過溥儀所寫嘅自傳《我的前半生》,作為一本末代皇帝嘅終極懺悔錄,溥儀寫低咗應該要寫嘅嘢,雖然我個人相信《我的前半生》 並唔係出自溥儀手筆,因爲我感覺溥儀應該冇呢個可以寫下四十萬字懺悔錄嘅文化水平,不過無論如何,呢本書每個人都應該睇一次,內裡所記錄嘅並非係一個人嘅一生,而係一個變幻莫測嘅大時代,同溥儀嘅個人側寫出發,你會明白,響混亂嘅大時代裡面,其實好多時候都係身不由己,如果每一個人都係先知,每一個人都能夠睇通未來,咁根本冇人會犯錯。

溥儀生於帝王之家,三歲做皇帝,佢成年之前,二百多年國祚嘅滿清王朝已經倒臺,遜位條款保留北京紫禁城一片領地樂土,供其自生自滅,溥儀就響裡面成長起嚟,外邊嘅世界一片混亂,佢應該被隔絕於高牆之外,最後將溥儀驅逐出溫室紫禁城嘅,好似係軍閥馮玉祥(未fact check),之後溥儀如喪家之犬去咗東北,成為日本人手中打造偽滿洲國嘅籌碼,可能溥儀係被人利用?可能溥儀係身不由己?根本冇人知道。總之偽滿洲國出現,成為咗中日全面戰爭爆發嘅源頭,造成咗無數人流離失所、生靈塗炭,軍民傷亡人數超過1000萬就係真嘅。成王敗寇,1949年中華人民共和國建立之後,將戰犯溥儀加以改造,令佢深刻反省自己嘅錯誤,帝王之軀飛入尋常百姓家終老,最後以一個平民身份辭世,結束一段末代皇帝傳奇,故事有頭有尾,有平淡有高潮,亦有警世意義,可以列入世界人生教科書之一。

https://youtu.be/zU78w_pYuVI

【我奮鬥不奮鬥】 常公子 楊熙合著

電子書下載 https://play.google.com/store/books/details?id=CVo3EAAAQBAJ
Amazon Kindle版下
https://www.amazon.com/dp/B098XHWTDK
實體書訂購
https://www.382now.com/product?id=325

最新上線,請課金支持
【常威近代史】第十部《蔣Sir狼死開拖》
https://play.google.com/store/books/details?id=SgE8EAAAQBAJ
Kindle版
https://www.amazon.com/dp/B09C2FJD3S
跳到頁尾