[bouncer]up緊,就快得

發表失敗
發表失敗
原因: 確定
極端的年代 84日
重溫舊貼

#good# 【常威考証】大清亡國關我老母蛋牛治
https://m.hkgolden.com/view.aspx?message=6835958&page=1

#good# 【常威中史】大清亡國關我老母蛋牛治2
https://m.hkgolden.com/view.aspx?message=6885326&page=1

#good# 【常威中史】大清亡國關慈禧蛋牛治 3
https://m.hkgolden.com/view.aspx?message=6928986&page=1

#good# 【常威中史】大清亡國關我老母蛋牛治 4
https://m.hkgolden.com/view.aspx?message=6970625&page=1

#good# 【常公子近代史】大清亡國關我老母蛋牛治 5
https://m.hkgolden.com/view.aspx?message=7007456&page=1

#good# 【常公仔近代史】大清亡國關慈禧蛋牛治 6
https://m.hkgolden.com/view.aspx?message=7044235&page=1

#good# 【常公仔近代史】大清亡國關慈禧蛋牛治 7
https://forum.hkgolden.com/thread/7085861/page/1

#good# 【常公子近代史】 8
https://forum.hkgolden.com/thread/7134248/page/1

#good# 【常公子近代史】 9
https://forum.hkgolden.com/thread/7173701/page/1

#good# 【常公子近代史】 10
https://forum.hkgolden.com/thread/7224663/page/1

https://upload.cc/i1/2020/07/28/N6Q8TJ.png
極端的年代 84日
https://upload.cc/i1/2020/07/27/Kv5huU.png

【常威近代史】(四百一拾三回)
(離題系列)世界新秩序建立

歷史定律其實好簡單,一句廣東話諺語足以囊括曬:『有咁耐風流,就有咁耐折墮』。

人類歷史中,繁榮與災難互相交替,係一種鋼之煉金術師之等價交換,太平盛世,社會階級不斷累積不公平同怨氣,正如股票上昇就製造泡沫;昇到某個位,泡沫一旦爆破,就會引發災難同戰爭,災難產生溉「血酬」作為和平盛世嘅補償物,意味住大洗牌,大洗牌後一切推倒重來,Next Round遊戲重新開始,邁向另一輪「繁榮盛世」,再作一次輪迴交替,響經濟學上叫「週期變化」,哲學家尼采叫做「永劫回歸」,佛法叫「輪廻」,我哋啲左膠喜歡稱為「歷史唯物辯証法」。

現今世界發生嘅亂局,係人類過去五六七十年來繁榮盛世嘅補償物,用環保嘅角度去睇,人類奢侈浪費大膽耗用資源打造二十世紀的耀目黃金宮殿,地球生態自然付出代價,生態環境被破壞加上資源被耗盡,人類又必須回頭承受,用貼市術語叫——回力標。

不過,聰明人嘅想法係:反正受苦受難嘅係下一代人,我哋呢代人只係負責收割成果同享用啫,他日大洪水到,我哋已經say goodbye,世界對我來說已經不再存在,自己活得精采就夠,其他人嘅事,唔好理咁多。一紙雖扁卻有兩個面門,表面真小人,底面偽君子。

19世紀嘅西方帝國主義世界,同樣係將資本主義嘅繁榮盛世推到極致,踏入20世紀,隨住工業同科技嘅高速飛騰,歐洲人絕對不能想像大災難會傾刻降臨,19世紀由大英帝國一手所建立嘅世界秩序體系,響德國人冒起下高速瓦解,仇恨不住蔓延,與其說真係憎恨對方,不如話同人人開始識字睇報紙小説有關;與其說資源不能共享,不如話每個國家管理都用上咗「民族主義」依把easy雙面刃。

第一次世界大戰嘅爆發,其實相當無厘頭。事後分析,無論任何角度,依一場毀滅性戰爭都可以完全避免發生,但偏偏它又發生了,而且一發不可收拾,用最慘烈的形式發生,短短四年之間(1914-1918),將19世紀所建立落嚟嘅和平盛世完全推倒,完全係自殺行為,人類真係自毀傾向,並唔係講笑。

第一次世界大戰,告別咗文明人足足行咗百幾年嘅原有文明步伐,預視所有秩序必須重新建立。而新秩序亦唔可以一如過往咁,要完全符合人類嘅理性思維同埋道德基調,相反,為咗破舊立新,用精神錯亂取代理性;用實際利益代替道德,被視為理所當然同衛。

第一次世界大戰之後,世界上出現咗兩種新事物:第一種叫「共產主義政權」,第二種叫「極右法西斯」。

兩種全新嘅政治體系加入原本嘅世界上中,產生強烈化學作用,前者基本上徹底改變咗二十世紀整個世界嘅格局;而後者則引發更慘烈嘅第二次世界大戰。

所謂共產主義、馬克思主義或工人運動並唔係二十世紀嘅新事物,早響1848年馬克思恩格斯《共產黨宣言》出現以後,世界工人革命潮流就從來未止息過,工人階級無產階級覺悟起來,令佢哋明白資本主義社會裡資本家嘅兇殘剝削,先係導致整個世界不公義嘅元凶,要推翻資產階級,要發動世界革命,一個美麗新世界先會降臨。
極端的年代 84日
但整個19世紀,從來未有一個革命政權曾經出現(形形式式巴黎公社式嘅小型政權不計算在內),但第一次世界大戰,為共產主義建立實質政權帶來契機,1917年,當一戰仍未結束時,列寧同托洛斯基嘅布爾什維克就係俄國奪權成功,建立咗世界上第一個共產主義國家,無論係邊個角度嚟睇,都係開天闢地嘅事情。

響列寧建立世上第一個共產主義政權開始,佢就非常明白,所謂革命同政權更替,並非係由民眾意志作主導(到咗今時今日,仍有大部份人相信民眾嘅意志能夠主宰一切,呢個係民主制度最大嘅破綻),一個政權嘅意識形態只需要社會上一小部分人敢於獻身同意志堅定貫徹始終執行就可以成立,於是一個高度嚴格組織化嘅政黨成為國家政權嘅必需物,而且初生嘅共產主義政權為咗生存落去,亦不得不無所不用其極活下去,並且要向整個世界輸出革命,壯大共產主義聲勢同生存空間。

共產主義強調階級性,強調「工人無祖國」,所謂國家同民族觀念,響初期嘅共產主義世界並存在,或者講並非主流思想。列寧同托洛斯基要解放嘅,並唔係單單係俄國嘅工人階級,而係整個世界受苦受難被鐵鍊緊緊綁死嘅無產階級廣大群眾。以此作為大前題,向其他地方輸出革命,視為理所當然之事。

之後,同俄國相鄰嘅中國,亦成功變成共產主義國家。去到20世紀20年代,共產主義已經高速響中國落地生根,並且好快成為咗一股重要嘅政治力量。

同時,共產主義思潮亦響歐洲繼續蔓延開去,工人運動根本從來未平息過,工人階級嘅覺醒,同時亦係廣大民眾嘅覺醒,社會主義或共產主義嘅思想四處蔓延,工人階級運動聲勢浩大,加上一戰之後,梵爾賽體系下歐洲疆界重新建立,一股一股民族大遷移嘅移民潮,亦都將一波又一波嘅外來民族帶往世界各處,自由主義、共產主義、工人運動、社會運動、移民浪潮嘅種種挑戰之下……極右派嘅反動心理因此應勢而生,左右互為因果,世界進入二元分立大時代,民眾意識形態各走極端,法西斯亦由此誕生……

上述所講20世紀20年代世界發生嘅事情,一百年後,同樣喺21世紀20年代再一次發生……奇!

#常威 #大軍閥平反系列  #大軍閥 #民國歷史
極端的年代 84日
https://upload.cc/i1/2020/04/17/9dTuCm.png

本土唯一香港土話近代史文本

【常威近代史】第一部《大清亡國關慈禧蛋牛治》,全面開放,免費下載, #freedownload!

Free下載連結

https://play.google.com/store/books/details?id=C3hjDwAAQBAJ
比其他孩子長得高?
馬凡氏症知多少
sooohealthy.org
贊助網站
極端的年代 84日
【常公子歷史頻道291回:斷送共和關 君臨天下 蛋牛治】

中國歷史上最後一個皇帝袁世凱粉墨登場,洪憲帝制上馬,個人感覺,袁世凱要成為皇帝並非為咗一己私欲,佢希望利用復興華夏儒家文化,重建上層建築及政權權威,藉此實現國家統一同妥善管理。出發點可能係一片真心,要全中國人服下一劑苦口良藥,從此歌舞昇平,回復高度統一大一統穩定和諧狀態。

20世紀初期,自由民主議會制度並唔係大潮流,「君主立憲」、「開明專制」先係當時大多數成功國家例子所採用嘅政治體制,最好嘅例子就係中國鄰居日本,日本可以有一個天皇存在?點解中華民族唔可以有一個皇帝高高在上。給予人民高度嘅自由,難免會演變成為暴民政治,民粹世界,呢個係當時中華民國所面對嘅實際問題。

夢想固然是好,自由民主世界當然okok,但夢想係一回事,現實卻是另一回事,政治係為咗解決當前問題出現,並非為咗長治久安而來。另外有一個講法,自由民主係咪一定好呢?到頭來民衆以為自己有份參與政治決策同選擇自由,但真相卻係所有事情及意識形態完全操縱在有錢人及資本家手上。

對於上述質疑,我並不會加以否定(因為某程度上都係真相),不過放喺枱上面的食物,選擇實在有限,你唔揀自由民主?難道要揀專制極權?你寧願你嘅命運操縱喺資本家手中?定係操縱係極權者手中呢?到頭來係「兩害取其輕」嘅問題,廣東人話齋正所渭橫又死掂又死,你想死得舒服啲?抑或想死得難睇啲呢?

有個小學雞嘅問題非常好,你到底鍾意食一嚿有朱古力味嘅屎?抑或食一嚿有屎味嘅朱古力呢?前者入口香甜卻是屎,後者難以入口卻是朱古力;你如何去選擇呢?呢條問題最精妙嘅地方在於,無論作出那個選擇,其實都係一個食屎狀態,分別是如何去食怎樣去食?

【常威近代史】第五部《霹靂大忠臣對決無敵大買辦》Round two電子書上架(條download link在下面),請大家課金支持我一直走落去,直至劉少奇骨灰到達北京王光美手上……

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上4000訂戶!

https://youtu.be/8bqt-ezrVCs
紫桜 84日
#cn#
小晶 84日
:)
極端的年代 84日
https://upload.cc/i1/2020/07/29/Vtnr8F.png

【常威近代史】(四百一拾四回)
(離題系列)排外排到變了法西斯

20世紀初期西方世界,「共產主義政權」出現,一個新時代開始,最起碼民衆發現除咗原有嘅資本主義社會模式之外,仲有另一種可以俾佢哋選擇,佢哋仲發現,原來卑微貧窮嘅自己——即係勞工階層同埋無產階級(或包埋農民)——並唔係永遠俾人踩住喺地上面、只能夠辛勞工作糊口嘅一群螻蟻,衹要能夠團結起嚟,一樣可以翻身,甚至可以推翻資產階級同貴族血統,當家作主,自由話事。

當時嚟講,共產主義絕對係窮人救星,亦係每個當權者嘅終極噩夢。哪裏有窮人,哪裏有被剝削的人,哪裏就有共產主義的苗頭——世界革命應該發生嘅前題——事實上哪裏沒有窮人?哪裏沒有被剝削的人?

叉開一筆,作為一個中國人,今day我想用中國儒家哲學,粗淺地講講人性問題。有個問題成日講,人性本善?抑或人性本惡?孟子用一個比喻,佢話如果你見到一個細路仔即將跌落個井,你會冒起一份惻隱朮赤之心,想衝過去救佢,或睇見都驚心動魄,總之你唔會覺得開心笑出嚟掛?由此推論,人性本善,亦由「人性本善」呢個大前提,推論出儒家哲學嘅「仁義本體論」作為一切道德基礎。

但我想問一個問題,如果見個細路仔跌落個井度嘅『你』,由出世嗰一刻開始,被囚禁喺一間房裡面,唔俾你同任何人接觸,冇人教你讀書寫字,直至你長大後放出嚟,見到一個細路仔跌落個井度,你會唔會有惻隱朮赤之心呢?抑或會笑出嚟?我唔知道。

當然以上一個咁殘忍嘅「人體實驗」冇可能發生,純粹係愛因斯坦式嘅「思想實驗」。因此話「人性本善」,本身就有商榷餘地。人性為何?既然唔可以憑空想像,唯有靠統計數據,採用歸納法得出結論。歷史講俾我哋知,人性有善亦有惡,但「人性本惡」嘅案例多不勝數,爭奪、剝削、戰爭、屠殺……比目皆是。人類只係動物嘅一種,天然嘅本性係求生,並無是非善惡黑白概念,所謂仁義道德,基本上係披上野獸身上面一塊人皮,令睇上去,人同野獸有小小分別。

子曰「食、色、性也」,人嘅本性只係求生同繁殖,同黑猩猩一樣,同魚缸裏一條魚一樣,只係採用嘅手法同形式唔同,人類為了求生,可以不擇手段,外在環境越惡劣,手段越血腥殘暴,豐衣足食,當然人人可以以禮相待講道德講理想、談更高精神層次嘅事物;但當食都冇得食,就快冚家餓死,生死存亡時候,人始終會回復野獸茹毛飲血狀態。

因此推論,因為人性其實同客觀外在環境掛鉤,「並不是意識決定存在,而是存在決定意識」。無厘頭嘅第一次世界大戰後,成個歐洲滿目瘡痍,經濟不景氣,加上梵爾賽體系嘅胡亂劃界,觸發一場巨大嘅移民浪潮,無數人為咗搵食,漂洋過海,遠去異邦。就算喺一個國家之內,人口亦都大量地由鄉間湧向城市。20世紀初期嘅移民浪潮,移民並唔係有錢人資產階級,而係窮人勞工階層。
極端的年代 84日
我本來好地地搵食,結果嚟咗一大班異邦人爭飯碗?拉低工資、扯高房租、傷害文化、搞亂治安,仇外情緒因此出現。未見過?2003年後嘅香港咪一清二楚囉!仇外情緒表達於外,最普遍嘅現象就係種族主義——即係保護本地本國民族嘅純正,免於外來劣等民族嘅污染、甚至淹沒同化。

20世紀20年代嘅歐洲,每個國家內反移民運動氣氛同樣熾熱,「反猶主義」(anti-semitism)就係其中一種極端嘅表達模式,就算係世界上最自由嘅國家美國,都開始拒絕嚮往自由嘅子民進入其內爭飯碗,自己都顧唔掂,真係冇辦法施捨比你。情況就係咁,純粹人性嘅表現。

面對經濟不景水深火熱嘅生活環境,一般社會上嘅小人物有兩種反應,第一種係覺悟到自身嘅不幸來自資產階級及制度嘅剝削,因此左傾,希望大愛精神改變世界;另一種係先求自保,有你冇你,先爭取自己同自己同路人嘅利益,將外來人當成敵人加以打擊同驅逐,向右轉,轉到極右,叫「法西斯主義」(Fascism)。

「法西斯主義」有以下定義:

「一種具革命形式的極致民族主義,此民族主義決心要動員所有『健康的』社會和政治能量,以抵抗其認定造成民族衰敗的威脅,以實現國族或民族脫胎換骨的目標。該民族主義方案涉及政治文化的復興,包括支撐政治的社會及倫理文化的重生,而在某些案例,此重生包括了基於種族學說的優生學概念的復興重生。」

最先興起法西斯主義嘅係意大利墨索里尼Mussolini(1883-1945),這位歐洲法西斯主義之父,大概參考咗1917年列寧成功奪權嘅手段,知道所謂主流民意只是「流」,只要能夠動員社會上小部分有堅定信仰(成功洗腦)兼唔怕死嘅「先鋒隊」,利用無底線街頭暴力手段就可以事成,1921年墨索里尼建立「國家法西斯黨」,在一戰後政治和經濟動盪嘅義大利,具有民族主義、反共產主義和反工會特點嘅國家法西斯黨獲得了中產階級、地主及工業資本家支持。

1922年10月28日墨索里尼發動「向羅馬進軍」政變,號召30000名「黑衣軍」攻入羅馬奪權,成為一時佳話。

人性嘅另一個特點,叫連鎖反應,可以互相棒喝得到覺悟,雖然意識形態風馬牛不相及,但墨索里尼嘅奪權手段無疑係參考列寧同托洛斯基,而墨索里尼奪權成功案例,更激發咗身在慕尼黑一個無權無勢、小小工人政黨頭目嘅雄心,佢叫希特拉。

#常威 #大軍閥平反系列  #大軍閥 #民國歷史
極端的年代 84日
https://upload.cc/i1/2020/07/15/P0v4pR.png

【常威近代史】系列,網上書展,半價大平賣

請立刻登入

https://www.382now.com/product?id=245
極端的年代 83日
【常公子歷史頻道292回:斷送共和關 蔡鍔與小鳳仙 蛋牛治】

蔡鍔係劉松仁,小鳳仙係周海媚,呢個係我對蔡鍔與小鳳仙嘅印象(當然同時暴露咗我嘅年紀),但我對蔡鍔與小鳳仙嘅印象,同真正嘅蔡鍔與小鳳仙關係全無,亦係真相;另一個經典例子就係大軍閥,許冠文係鹹濕賤格低能大軍閥,結果所謂大軍閥嘅形象就被定型,反而真正嘅大軍閥,響歷史書課本上並無稱呼為大軍閥。

所謂歷史,其實全部都係二手史料同三手、四手史料,改寫再改寫穿鑿附會再改寫,你去睇一個歷史學家所寫嘅歷史著作,同你去睇劉松仁同周海媚嘅蔡鍔與小鳳仙愛情故事,可能全無分別;唯一嘅分別係,前者可能誤導你更多,因為你永遠唔會將後者當成真相,戲劇電影小説純屬創作,無傷大雅,就算冠以真人真事改編名目,你也會知道是假的,情況大致這樣。

就以雲南軍閥蔡鍔做例子,一代軍神,首先起義反對袁世凱洪憲稱帝,為保中華民國法統之路花果飄零,以寡敵眾,戰無不勝,攻無不克,係歷史上嘅大英雄大豪傑,媲美岳飛袁崇煥;但真相係,蔡鍔好有可能係日本帝國搞亂中國嘅白手套代理人,當然亦未必係,除非唔係。我哋其實冇辦法知道,現存嘅史料,亦冇足夠嘅證據證實我上述嘅講法。

忠奸黑白是非分明,喺世人對歷史嘅睇法。真相係所有歷史人物並非非黑即白,非黃即藍、非藍即黃。世情在不斷變化中,嚟到現代世界,基本上全世界冇一個人或政客能夠將自己講過或承諾過嘅嘢堅持到最後,或大改或微調或忘記,因應時勢而作出改變,其實亦係無可厚非之事。大部份人嘅人生基本上亦都處於一種變化不定嘅狀態中,堅持己見真係一種「美德」?唔肯去改變就係「君子」?邊個講嘅?我淨係知道,通常遇到太頑固太固執太堅持己見嘅人,通常都有神經衰弱或情緒病,至少有社交障礙,好難相處。

既然係咁,自己都係一個花心嘅人,點解又可以要求伴侶從一而終?變幻才是永恆,任何一個人都在變幻中不斷重新塑造自己,如果世界在變你不變,落後於時勢,通常受傷嘅會係你自己。

【常威近代史】第五部《霹靂大忠臣對決無敵大買辦》Round two電子書上架(條download link在下面),請大家課金支持我一直走落去,直至劉少奇骨灰到達北京王光美手上……

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上4000訂戶!

https://youtu.be/bXc24sCbxbk
極端的年代 82日
https://upload.cc/i1/2020/07/31/Oqn8a7.png

【常威近代史】(四百一拾五回)
(離題系列)一代魔頭希特拉是如何煉成?

當法西斯之父墨索里尼帶住三萬民兵進攻羅馬奪權嘅時候,響德國啤酒之都慕尼黑,希特拉仍然只係一個小政黨嘅頭目,響當時民主自由嘅「威瑪共和國」內,好似希特拉「德國工人黨」呢一種政治小組織,成街都係,總之插支旗仔,有個朵,講嘢有人圍爐聽,有人肯捐小小錢,有笪地方落腳,就係一個小政黨。

當時希特拉,好鍾意喺慕尼黑勞工階層集中消遣嘅酒吧中演講,大家飲大兩杯,高昇論政,高談闊論,胡言亂語。你可以想像,喺呢種地方孕育出嚟嘅政黨或政見,必然係缺乏學術理論根基同視野,純粹三個字講曬:「Hi政府」,好似今日香港嘅維園阿伯,純粹只係想講粗口Hi政府,以宣洩自己對社會現狀嘅不滿。

如果你響1920年同希特拉講,14年後你會成為德國最高領導人同國家總理,我諗希特拉一定會覺得你係黐銀線。因為當時嘅希特拉,的確係無權無勢,甚至連金主都冇,圍喺佢身邊嘅都係社會上邊嘅失敗者,佢哋全部鬱鬱不得志,所謂納粹黨嘅原始班底,有退役軍人、有工人、有養雞嘅,亦有大學畢業生、甚至高學歷失業嘅博士生……但係佢哋響社會上搵唔到食,懷才不遇,因此滿腔怒憤,講真,如果當時搵食容易,嗰個有份工打安分守己,可以解決三餐一宿問題,真係冇人會得閒同你上街攪抗爭運動。

好可惜,真相係一戰之後,德國失去所有,金錢同領土反而係其次,最重要嘅係民族失去尊嚴,高傲優秀嘅日耳曼民族,覺得俾其他歐洲人壓迫。第一次世界大戰喺無厘頭開始,亦都係無厘頭結束,明明東西線係占緊上風嘅德國,民眾一瞓醒,第二朝就忽然投降(呢個係當時嘅真實現象),一夜之間失去所有,巴黎和會梵爾賽條約下任由英法美日四國宰割,割地賠款不特止,威廉二世下臺,換上一個雞棚式自由民主嘅「威瑪共和國」,由歐洲第一流國家,變成三線國家,情況你可以想像為「利物浦」要燉去踢英甲,真係何等屈辱?

德國民眾完全唔可以接受,勝敗乃兵家常事,打仗可以打輸,但就唔可以接受屈辱.......尤其是屈辱你嘅,係比你低等嘅民族。

用「民族主義」建立「國家」,係19世紀中葉先開始出現嘅事物,德國同意大利就係最好嘅例子,本來疆土之內有唔同成分、各自為政嘅成員,只係一個鬆散嘅「國際聯盟」,如何將所有嘢所有人團結起嚟,組成一股更大嘅政治能量,從而建設一個巨大帝國?用嘅工具就係「民族主義」。因為你有日耳曼民族血統,所以你就係德國人,邏輯非常簡單,大眾亦都容易接受。(做政治要謹記一點,千萬唔好將理論架構set得高,因為會冇人明白,社會上大部分都係蠢人,只能夠用最愚蠢同最簡單嘅口號去團結)
極端的年代 82日
正如章太炎發明「中華民族」依個概念,就成功將所有人變成中國人。乜中國人本身唔係中國人咩?你可能會咁樣問。最簡單嘅例子係「五族共和」,原本滿清帝國嘅滿洲人,根本唔係中國人一部份,孫文初期搞革命嘅口號係「驅除韃虜」,要趕走佢哋返滿洲,但後來中華民國成立,一句「五族共和」,就將滿洲人變成中華民族一員,所以之後滿洲人響東北成立嘅「滿洲國」,就變咗「偽滿洲國」,中日戰爭嘅爆發,亦因為「滿洲國」嘅Identity問題,蔣介石嘅國民政府話唔可以丟失東北「偽滿洲國」,但佢幾時擁有過「偽滿洲國」嘅主權呢?一件本來唔屬於你嘅嘢,又點會產生「丟失」呢個概念呢?

去返希特拉,對自身現狀嘅不滿,除咗可以將責任推俾政府(民主政府)外,仲可以將責任推比其他人(或民族)承受,響20世紀初期一戰之後嘅破落世界,好多窮人同losers將自身嘅不幸歸咎於另一個冇國家嘅民族——正正就係猶太人身上,所謂反猶主義(Anti-semitism)出現,並唔係新鮮事物,響19世紀最後25個年頭,以仇恨猶太民族為宗旨嘅政治運動,開始係歐洲某啲國家出現,起初是仇恨猶太人嘅財富同團結,仲有佢哋堅持嘅血統隔絕主義,後嚟個陰謀論越吹越大,正如第一次世界大戰歐洲國家之間嘅仇恨一樣,經由傳媒小說戲劇不斷渲染,猶太民族成為咗一個恐怖嘅犯罪集團,以金融勢力控制同摧毁整個歐洲。

希特拉係一個百分百嘅極端反猶主義者,反猶並唔係佢原創嘅事物,佢最大嘅錯誤係將反猶運動由戲劇宗教形式,轉化成實際行動,當政之後屠殺500萬猶太人係驚世罪孽,亦係佢成為大摩頭嘅唯一理據,除咗屠殺猶太人,其實希特拉嘅所作所為並無資格稱得上為一個大魔頭,佢嘅個人品行,甚至比當時歐陸一般政客優秀。

受墨索尼里法西斯進軍羅馬、以小博大成功影響,希特拉響1923年11月9日晚上以「納粹黨」名義策劃咗一場「啤酒館政變」,得到一戰德軍名將魯登道夫(Erich Ludendorff,1865-1937)支持,企圖利用類似嘅街頭暴力行動推翻威瑪共和國,希特拉當時連墨索尼里嘅三萬人都冇,只有幾百個烏合之衆起義,當然係失敗收場,政變失敗後三天,希特勒被判叛國罪。

希特拉成為階下囚,響獄中完成咗《我的奮鬥》一書,希特拉所策動嘅政變,不但無令佢變成歷史罪人,反而令佢變成民族英雄,坐監令人生更精彩,用希特拉身上絕對正確,佢一心一意為復興日耳曼民族尊嚴同未來而坐監,令到好多德國人開始崇拜佢、追隨佢。當佢出獄嘅時候,整個德國嘅命運亦從此改寫……

歷史不斷在重複,有太多驚人相似嘅地方,如果要寫落去,常威中國近代史要變成常威近代史,一切要響1923年當下止住,下一站我哋翻返去1923嘅中華民國,繼續中國人嘅故事……

#常威 #大軍閥平反系列  #大軍閥 #民國歷史
極端的年代 81日
【常公子歷史頻道293回:斷送共和關 護國戰爭 蛋牛治】

蔡鍔係第一個企出嚟反對袁世凱稱帝嘅軍閥,中華民國至1911年創立以來,內戰不斷,首先係袁世凱北洋系統同革命派嘅「第二次革命」,革命派或稱國民黨嘅反動勢力被剿平,袁世凱獨攬大權,為咗重新塑造統治威權,建立大一統,佢推出「洪憲稱帝」計畫,我再重申多一次,可能佢未必為咗自己,而係為咗往後有順利嘅管治環境。

當時嘅中華民國,論人口論地域的確係一個堂堂大國,但論國勢論經濟發展,只係一個三流國家,甚至可以講唔入流。如果亂局不止,繼續處於崩分離析、軍閥割據嘅狀態,唔將國家經濟同國力搞上去,放響中華民國面前唯一嘅結局,就係俾鄰國日本完全吞蝕,真實情況亦都如此,中華民國同日本嘅關係,就如美國同墨西哥。結果日本不斷千方百計侵略中國,去到1931年,終於爆發「九一八事變」,日本人稱之為「滿洲事變」。

袁世凱搞帝制啱定錯?一句到尾一定錯!逆線行車必定會被扣分!但放喺當時嘅歷史環境,袁世凱想利用帝制復興華夏文化儒家哲學統一試圖重建全國人嘅意識形態,其實係一個可以理解嘅選項。當年中華民國最大敵人日本帝國,同樣行緊君主立憲虛君帝制。響袁世凱同不少時人眼裡,日本人行帝制風生水起,脫亞入歐;而中華民國行民主共和體制,則政治爭拗不斷崩分離析,我通知過大家,千萬唔好用現代人嘅眼光同角度去睇古代嘅事物,如果我常公子身處1916年,我諗我可能係洪憲帝制嘅支持者之一都未定。

軍神蔡鍔完全係由日本軍事教育系統一手一腳打造出來嘅日式職業軍人,到最後蔡鍔身故嘅地方都係日本本土,歷史上冇講過畀我哋知蔡鍔發動反對袁世凱稱帝嘅「護國戰爭」同日本帝國有任何關係。當初,日本同美國都係支持袁世凱稱帝,冇日本嘅口頭支持同承諾,我諗袁世凱亦唔敢將帝制上馬,結果袁世凱實行帝制,日本人就立刻反轉豬肚玩謝你。

睇返歷史走向,袁世凱的確好無辜。大概依一個係佢嘅命運,一生人所做嘅錯事唔多,反而好事就日日做,最後遺臭萬年,成為秦檜魏忠賢奸臣隊伍一員,其實好唔公平,幸好佢並不孤單,至少陪佢嘅,仲有慈禧太后同汪精衛。

【常威近代史】第五部《霹靂大忠臣對決無敵大買辦》Round two電子書上架(條download link在下面),請大家課金支持我一直走落去,直至劉少奇骨灰到達北京王光美手上…

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上4000訂戶!

https://youtu.be/gFTqeeB54J4
極端的年代 79日
https://upload.cc/i1/2020/08/03/v4CGw5.png

【常威近代史】(四百一拾六回)
唐三藏取西經

重返中國近代史,1923年7月,東京大地震前夕,黎元洪在政治操作中下野,離開北京前赴天津歸隱從商,中華民國「法統重光」之路,暫告一段落,直系軍閥曹錕佈署多年,準備攀上權力顛峰,國家崩分離析,東北天王張作霖積極重整軍備,誓要一雪前恥,孫中山與蘇俄及第三國際達成協議,聯俄容共政策具體執行,誓要以武力,達成南方主宰北方之格局,點解國家安全法,最重要係針對勾結外國勢力一環?大家應該一清二楚。

孫民貴為中華民國國父,但論勾結外國勢力干預國家內政,似乎佢認第一,冇人敢認第二,二十世紀前,先同大英帝國香港媚來眼去,二十世紀後再與日本帝國長期合作,最後聯結俄共。不過作為一個共產主義信徒,孫文完全冇錯,畢竟共產主義最後要解放嘅,並唔係一國一族嘅無產階級,而係整個世界受苦受難嘅弱勢社群,而借助任何勢力達到此終極目標,在任何情況下,都是正確的。

1923年6月26號,北京紫禁城發生咗一場大火,足足燒咗六小時,燒燬咗大量建築物,130間房屋被毀於一旦。但依場大火並唔係意外,自辛亥革命後,清室接受民國最優待條件和平退位,可以長紫禁城繼續富豪生活,但皇宮中清室歷代累積嘅寶物,件件價值連城,有錢嘅地方就有賊,一直以嚟紫禁城內經常發生失竊案,道理亦都非常簡單,偷得一件出宮,咁就一世衣食無憂,邊個唔想?

最離譜嘅係,溥儀大婚後,連皇后鳳冠上嘅珍珠玉翠,都俾人偷天換日,換成假嘢,溥儀因此下定決心要,要徹底盤點宮中財物,但命令一出,就發生一場大火,場火據間燒燬咗大量古董寶物,你信唔信呢?(我諗係一件都冇,大火發生前應該被人全部搬走曬),放火真兇係邊個?冇人知。但溥儀認為係成班太監做,於是1923年7月15號,下令遣散全體太監出宮,一共1734人被炒魷出宮,只剩低15個年老太監分守宮中大門。

太監呢個中國人嘅文化恥辱,終於同女人纏足一樣,告一段落。有人話,割咗兩粒睪丸嘅男人,會心理不平衡,因為身體殘障,引發強烈自卑心作祟而變成精神病患者(終極擦鞋仔),我並唔認同,大家不要看得兩粒蛋蛋太重要,有睾丸嘅人都可以成為太監,從來被閹割嘅並唔係兩粒蛋蛋,而係心靈。

中華民國嘅亂局一發不可收拾,亂到連國際社會都驚。7月3號,(曾經係)中國嘅最大幕後玩家大英帝國,向西方列強各國提議國際共管中國,呢個構想簡直係驚天動地,當然引發國內人民舉國震驚。

理由係北京政府欠缺管治能力,財務混亂,法律廢馳,地方勢力割據,周圍都係盜匪,橫行無忌,搞到大家冇生意做。因此大英帝國提出所謂「補救中國亂局辦法」,其主要內容有:

1.出動國際軍隊佔據京津鐵路。
2.任用外籍人員,編練中國警隊,歸中國政府管轄;但若然中國政府不負責任,則歸列強管轄。
3.在中國口岸舉行國際海軍示威行動,警告分離勢力。
4.徵收賦稅以支付國際共管下嘅軍民行政經費。
極端的年代 79日
上述四點,就係「補救中國亂局辦法」,你覺得點呢?英國人係唔係想幫中國人呢?我覺得唔係,佢哋似乎係想直接了當瓜分中國,廢除北京中央政府所有職能,連「合邦」都唔係,係直接take over!

結局亦都同預計一樣,俾你通過嘅話,失勢中嘅大英帝國咪一鋪翻身?我講過,當時響中國最有power嘅國家係美國同日本,兩個國家同時反對英國嘅提議,玩完,結論係大英帝國衝出嚟Seven咗一鋪。

如果亂局真係咁容易扳平?個世界又點會咁亂呢?如果利益真係咁容易和平分贓?我哋一早就進入大同世界共產主義烏托邦鳥。千祈唔好將事物睇得太簡單,個世界永遠都係講就天下無敵,做就有心無力,文人紙上談兵,何其容易?但比枝槍你叫你上前線衝?十個冇一個會滯。

7月27號,第三國際通告廣州大元帥府外交部,撤回越飛(Adolf Abramovich Joffe,1883-1927),以加拉罕(Lev Mikhailovich Karakhan,1889-1937)為遠東事務總代表,1919年7月加拉罕對中國發表《加拉罕宣言》,聲明放棄俄羅斯帝國時期對華簽署嘅所有不平等條約。提提大家,越飛同加拉罕都係「托派」。

同日,孫文前赴石龍親自督師,部署第二次圍攻惠州,誓要打殘陳炯明殘餘嘅粵軍勢力。

同一時間,著名佛學大師歐陽竟無弟子熊十力(1885-1968),以不足四十之齡,響北京大學演講「新唯識論」,引起一場儒學同佛學嘅論戰。所謂「唯識論」,就係印度佛學發展嘅最高階段,以無著、世親兩大哲人嘅經著為依歸,「西遊記」中,孫悟空保護唐三藏去天竺取西經,唐玄奘從天竺帶返嚟嘅就係「唯識論」,玄奘大師晚年就係翻譯唯識經典,開創「唯識宗」。「唯識論」係佛教義理發展嘅最高階段,「唯識」以後,佛學再無突破可言,原因係可以講嘅已經講曬,生命終極答案已經展現人前。

唯識宗出現後,印度佛教開始沒落,經歷1500年發展,走到盡頭,終於被簡易得多嘅印度教取代正統宗教位置。同樣情況亦都發生係中國,唯識宗嘅博大精深,對一般平民百姓造成嚴重認知障礙,根本冇人明講乜?真係曉飛都冇用。於是盛唐之後,佛教為咗維持其普及性,不得不簡化自己,中國佛教嘅庸俗化現象,亦都係由唯識宗出現而開始,正正就是劣幣驅除良幣。不過唯識論嘅義理,亦間接導致宋明理學另一次儒學嘅偉大復興。

20世紀初期,一班中國哲人重提「唯識學」,為久旱嘅中國哲學注入新生命,打開「新儒家」哲學大門,是為儒學嘅第二次偉大復興。最後一提,1968年5月23日,熊十力因反對文化大革命絕食患病,逝於上海虹口第一醫院,享年八十有三。

#常威 #大軍閥平反系列  #大軍閥 #民國歷史
極端的年代 78日
【常公子歷史頻道294回:斷送共和關 朱德 蛋牛治】

相信在兩年前左右,如果有人和你說,中美之間可能會發生戰爭,你一定會感覺不可思議,或者覺得那個人順口開河?但事情發展得好快,由貿易戰開始,到2019年夏天香港發生的一連串事件,去到今天,美國同佢嘅盟友組成統一戰線,共同反中,天下圍中,相信冇人能夠估得到掛?

如果歷史事件不發生的話,就永遠不會發生;如果歷史要發生的話,它會用你想像不到的速度來到你面前。中美之間的情況就是這樣,我曾經睇過一本書,講1913年嘅歐洲大陸維也納,當時所有歐洲人身處於一個和平盛世、欣欣向榮嘅世界,冇人能夠想像得到第一次世界大戰會響翌年無厘頭發生,而且一發不可收拾,一打就四年,死了幾百萬人,將整個歐洲打個稀巴爛……甚至改變咗整個世界格局。

第一次世界大戰發生嘅原因係德意志帝國巨大掘起,影響到原本由大英帝國主宰嘅世界格局同秩序,一山不能藏二虎,最後要用戰爭去解決爭拗。當然諷刺嘅係,德國戰敗,英法得勝,但大英帝國付出嘅代價亦都無法想像,日不落帝國終於日落,被美國取代其霸主地位。德國英國同法國三大強權,其實冇一個係得益者。一戰其實係一場愚蠢無比嘅戰爭,但人類似乎並冇喺當中汲取過任何教訓。

和平盛世係一種微妙平衡,平衡有兩種狀態——第一種係強權之間旗鼓相當,大家都有所顧忌,情況一如二次世界大戰之後嘅美國同蘇聯。第二種平衡狀態係建立從屬關係,要認清楚主人係邊個,追隨主人不敢造反;呢個亦都係1991年蘇聯解體之後,世界運作咗三十年嘅美國獨大單邊主義體系。

但無論邊種平衡狀態,都冇辦法可以長久維持,因為客觀環境不斷在變化中,而且從來客觀環境都係人類所不能控制,新型冠狀病毒出現,誰人可以事前預料?2020年發端之前,相信世界上冇一個人可以想像到情況會係如此發生,一場從天而降嘅瘟疫,將本來要發生嘅世界性經濟衰退足足推早咗五至十年發生,難怪大家被殺個措手不及。危機當前人人急謀自保,以禮相待已經不合時宜,撕破人臉,露出野獸本性,其實只係正常反應。

【常威近代史】第五部《霹靂大忠臣對決無敵大買辦》Round two電子書上架(條download link在下面),請大家課金支持我一直走落去,直至劉少奇骨灰到達北京王光美手上…

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上4000訂戶!

https://youtu.be/Rbzc_K7pvmk
極端的年代 77日
https://upload.cc/i1/2020/08/05/O1aRGe.png

【常威近代史】(四百一拾七回)
亂?你見過亂未?

有人認為今日世界好亂?其實真正嘅混亂,大家仲未感受過?請容許我用1923年9月嘅中華民國作為借鑒,畀大家睇下乜嘢叫亂局?

9月1號,先嚟一場東京大地震,死14萬人。

9月7號,日本日清公司(出前一丁)兩艘載有援助四川軍閥楊森大批軍火嘅貨輪「宜陽丸」同「雲陽丸」號響長江水道上被軍人檢查,船上水手開槍擊斃六名官兵,「雲陽丸」逃去,「宜陽丸」被扣,被查出大批軍火。27號,北京外交團因為呢件事向北京政府提議,由外國艦隊組織「長江警備艦隊」,負責長江流域嘅航行安全,艦隊由英艦11艘、日艦10艘、美艦8艘、法艦6艘組成,北京政府睬你生臭狐,Auntie你偷運軍火響我國出出入入、出出入入不特止,仲要派戰艦護航?

由小事見大局,當時嘅中華民國,就係咁慘情。

9月11號,已經失勢的黎元洪乘坐日本輪船「長府丸」號秘密從大本營天津抵達上海,謀劃重組新政府。時值曹錕響中央奪權,北京國會議員紛紛離開北京南下上海避難,本月初,超過483名國會議員響上海聯名反對曹錕,因此黎元洪想食住個勢,搞兩個中央。但係班國會議員講就大聲,做就勁縮,而且江浙一帶嘅資本家亦唔贊成唔科水,廣州孫文國民黨軍政府亦唔贊成開多個香爐多隻鬼爭飯食。

上海警備司令甚至對黎元洪下逐客令,黎元洪眼見重組政府無望,於是響11月8號聲稱有病,要去日本醫。依一次即係泥菩薩生命裡最後一次政治動作,從此以後,佢就退出政壇……(享福,何必呢?)

9月11號,香港嘅名流大紳士大商家何東爵士(Sir Robert Hotung,1862-1956)從香港抵達廣州,發起和平運動,佢建議由列強召集督軍會議,共謀舉國裁軍事宜,佢先後致電畀南北各方要人,主張召集各省領袖、南北名流聯席召開和平會議,以解決當前嘅大亂局紛爭。

既然你何東爵士出到聲,唔睇僧面都要睇佛面,個個軍閥舉腳贊成。孫文、唐繼堯、張作霖、盧永祥、黎元洪等先後覆電表示參加會議,好可惜,大家都係得個講字,個和平會議亦都開唔成,大家繼續打落去。

仇恨出現,理應製造大和解,所謂忍一時風平浪靜,退一步海闊天空。如果人人都識咁諗,世界上會少好多戰爭,會死少好多人。好可惜人類係一種記仇嘅動物,一旦仇恨出現,人類就會將仇恨放響第一位,乜都唔勁理,報仇雪恨要緊!放響今時今日嘅香港,亦都係一樣,藍絲仇恨黃絲,黃絲仇恨藍絲,因為政見不同,大家愈行愈遠,各走極端,互相咒駡攻擊,最後裂痕越來越深,冇辦法修補,社會大撕裂,對任何人都冇好處。
極端的年代 77日
我有陣時諗,唔通真係要見血?唔通真係要打仗先可以解決紛爭?打仗呢家嘢,講就天下無敵,紙上談兵的確係最好發洩方法,但如果真係打到嚟,身處戰亂之中,我可以大膽講一句,到時每個人都會後悔莫及。類似情況歷史上已經發生太多,呢個世界嘅嘢,唔係你蝕底就係我蝕底,冇辦法可以計得咁清楚。能夠放下仇恨,從來都係大智慧,點解成日慫恿人信佛,就係咁解。

9月12號,辮子兵首領張勛響天津病死,獲末代皇帝溥儀賜溢「忠武」。

9月13號,北京雞鳴山煤礦發生火災,死1000人。

9月14號,中國紅十字會派出由26個人組成嘅救援隊前赴日本,參加關東大地震救災工作。

9月22號,馮玉祥響北京召開會議,決定保境安民,不參與政治,好快就由佢將末代皇帝溥儀由北京踢走。同日,廣州市長孫文個仔孫科被行刺,幸好冇事。

9月26號,直系大佬曹錕響保定公園劇場遇刺,又死唔去。

9月30號,山東德平西北鄉被大批土匪洗劫,死1000人,150人被擄走成為肉參……

9月,蘇俄第三國際代表加拉罕抵達北京,取代越飛成為大使,月尾加拉罕委任鮑羅廷(Kirill,1884-1951)成為蘇俄駐廣州代表(領使),全力協助孫文國民黨軍政府,開展「聯俄容共」嘅建軍工作。

文化方面,本月聞一多(1899-1946)嘅詩集《紅燭》由上海泰東圖書局出版,立刻震驚文壇,依位中國新詩嘅奠基人物,以唯美主義浪漫主義改革中國文學,聞一多出生於1899年,書香世代,自幼愛好古典詩詞同美術,1913年考入清華大學,接受九年美術教育,1922年前赴美國深造,研究繪畫、文學同戲劇,係一個真真正正嘅文學藝術大師。

相比起同年代好多中國文人,佢嘅水平同學養高出幾班。佢生命嘅後期,致力於古典文學研究。對《周易》、《詩經》、《莊子》、《楚辭》四大古籍整理研究,被郭沫若稱為「前無古人,後無來者」,為中國學術界貢獻良多,係一個真正被值得尊重嘅學者。 

不如講吓佢點收場……1937年抗日戰爭開始,佢嚮響昆明西南聯大任教。1943年後,目睹國民政府腐敗現象,遂積極參加反對政府,爭取民主的鬥爭,因此得罪蔣介石,1946年7月15下午在西倉坡宿舍門口被國民黨昆明警備司令部下級軍官湯時亮和李文山槍殺,聞一多之子聞立鶴亦身受重傷,聞一多被暗殺後,舉世震驚!國民黨亦因此大失民心。

1923年9月嘅亂局,大家睇見未?如果你覺得今日世界好亂,咁你並未清楚乜嘢叫亂喎?


#常威 #大軍閥平反系列  #大軍閥 #民國歷史
極端的年代 76日
【常公子歷史頻道295回:斷送共和關 大正天皇 蛋牛治】

細心觀察中國同美國之間嘅關係,其實同20世紀20年代中期開始,美國同日本嘅關係非常相似,因為慘烈無比嘅第一次世界大戰,將歐洲列強國力大幅削弱,美國同日本乘勢崛起,1921年即華盛頓會議(Washington Naval Conference),係為咗瓜分太平洋上各國嘅利益分贓,海軍裁軍問題上,船艦噸位原本由日本同英國嘅比例,變成日本同美國比較,顯凸咗當時太平洋上兩股最強大嘅力量就係美國同日本,亦係由嗰一刻開始,日本變成咗美國嘅主要競爭對手。

尤其是係當時世界嗰舊任人如取如攜嘅肥豬肉——中國——身上,美國一下子取代大英帝國,成為日本響在華利益掠奪中嘅最大競爭者,之後兩場「直奉戰爭」,根本就係美國同日本嘅代理人戰爭。起初美國同日本並唔係敵人,至少響兩國基本外交關係上。但後來美國三十年代發生經濟大蕭條,日本喺國力上進一步追近(事實上亦有相當大距離),美國先將日本視為敵人,三十年代,美國立例禁止日本移民美國,連同其他盟友進一步孤立日本,情況同今天都好相似。

美國同日本兩個關係開始疏離、最後割斷,再發展到1941年偷襲珍珠港正式進入戰爭狀態,中間大約有十多年時間交鋒,其實兩個國家亦冇諗過真係會打仗,美國唔相信日本人敢挑戰佢哋同時,日本人亦唔相信美國會玩到石油禁運呢招一擊必殺。兩者拳來腳往,本來只係想打拳腳交,但仇恨不斷深化之下,加埋美國禁運石油封鎖太平洋,對嚴重缺乏天然資源嘅日本嚟講,係封喉一擊,日本人唔傾盡全國國力反抗,就只有待坐以待斃……

歷史作為一種借鑒,尤其有實際意義,今日中美關係嘅惡化,其實同當年美日關係有好大程度上嘅類同。20世紀30年代嘅大蕭條就係2008年嘅金融海嘯,嚟緊第三波金融危機(註:第一波係97、第二波係2008),差唔多篤定一定必然會發生,如果中美之間嘅關係冇辦法改善或修補,依照歷史規律,真係會打仗都唔定。

唔會發生真正戰爭,並唔係大家有理性會去諗和解辦法。只係基於兩個原因——第一係打仗開銷太貴,任何大國根本不能負擔一場全面性戰爭;第二係大家擁有核武,某一方癲起上嚟玩玉石俱焚,咁就大家都冇著數。未來嘅兩三年日子,我覺得主角反而係臺灣,香港嘅用途好似已經過咗 Expiry date,可以用完即棄嗰隻。

【常威近代史】第五部《霹靂大忠臣對決無敵大買辦》Round two電子書上架(條download link在下面),請大家課金支持我一直走落去,直至劉少奇骨灰到達北京王光美手上…

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上4000訂戶!

https://youtu.be/J7lY9AsAMVA
極端的年代 75日
https://upload.cc/i1/2020/08/07/R3a7TU.png



【常威近代史】(四百一拾八回)

第三國際猛人鮑羅廷


米哈伊爾·馬爾科維奇·鮑羅廷(1884-1951)係一個相當重要嘅人物,因為佢就係第一次「國共合作」嘅主要策劃者,負責實際建軍建立意識形態无 行動,1923年由第三國際派出前赴中國,協助孫文嘅國民黨重建軍事力量,爲國民黨打造一支擁有極強意識形態同紀律嘅軍隊,訓練出中國近代史上不少軍政強人,之後大軍掃蕩中原,於1926年完成北伐大業,打造國民黨蔣氏政權「黃金十年」統治時代,可以講,冇咗鮑魚廷,就冇之後發生嘅一切。


國民黨「聯俄容共」政策一早已經傾好曬,但去到真係落實,係1923年9月鮑魚廷到達廣州,人到錢亦到,大家應該理解。響8月中,由蔣介石率領「孫逸仙博士代表團」由上海出發,前赴紅都莫斯科(因為聖彼德堡打爛咗鳥),成員有國共兩黨黨員,係國民黨第一個訪俄代表團,到達莫斯科後,代表團受到熱烈歡迎。代表團考察咗蘇俄軍事、政治、黨務各方面情況,最重要係洽商咗蘇俄援助中國國民黨嘅問題,money problem,即係正式簽字磅水,合同簽好曬,鮑魚廷亦到位做嘢,開始真正工作,幫你孫文終極翻盤。


建軍工作開始之前,新一輪嘅意識形態工作亦都同步進行。1923年8月,(應該係,除非唔係)中國最偉大嘅文學家魯迅先生出版佢第一本小說集《呐喊》,震撼整個中國文壇,內裡收錄咗魯迅由1918年至1923年之間創作嘅15篇短篇小說,包括《狂人日記》、《阿Q正傳》、《孔乙己》、《藥》……等等膾炙人口嘅小說。魯迅表示,小說集取名《呐喊》,係要為廣大的革命者「助陣作戰」,令佢哋「不憚於前驅」!


《呐喊》體驗咗反封建、追求自由的五四精神!魯迅亦自稱為「遵命文學」,「遵奉」嘅係「那時革命前驅者的命令,也是我自己願意遵奉的命令」,講到明比大家知,「小説」係一種意識形態武器,係大戰略嘅一部分,而當時中共總書記陳獨秀,就係催促魯迅創作依一批小說最重要嘅一個人!上頭落order,下邊去執行!充分體驗咗一個列寧式有高度組織性政黨嘅運作方式。


個人認為,列寧托洛斯基其中一個最偉大嘅貢獻,就係創立咗「黨指揮槍」制度,以「政治」淩駕「軍事」,以「政治」控制「軍事」(或以「文人」控制「武夫」),放響當時軍閥割據嘅中國,實在非常有效。大家都睇到,當時中華民國北京中央政府一直被軍人所把持,先有袁世凱、再有段祺瑞、「皖系」玩完到「直系」、「直系」玩完到「奉系」……


「軍事」永遠淩駕「政治」,所謂大總統所謂國會所謂憲法,統統只不過係軍權掌政嘅包裝紙,真相係邊個有槍邊個惡,當然到頭來,萬劍歸宗,仍然係「槍桿子出政權」五個字,但喺共產黨體制中,軍人權力響之後嘅日子始終能夠被政治有效壓抑同馴服,就係真嘅。最經典嘅例子無疑係1949年建國之後,各地軍頭均願意將軍權交還中央,杯酒釋兵權,我冇睇錯嘅話,響中國歷史上其實係第一次!
極端的年代 75日
大漢劉邦狡兔死走狗烹,晉朝有八王之亂,唐朝開國有唐太宗李世民誅李建成玄武門之變,宋朝開國亦有宋太祖趙匡胤同趙匡義之爭,明朝朱元璋要殺大功臣徐達,清代亦有皇太極、多爾袞爭權,及後康熙年間三藩之亂,民國更加唔使講,例子多不勝數,天下平定,交出兵權?講就容易,除咗中華人民共和國,並無他例,當然中共建國亦有漏網之魚,東北嘅高崗饒漱石就係好例子。


鮑魚廷出生於1884年7月9日,生於俄國拉脫維亞,又係猶太佬,你真係吹得佢脹咩?1903年19歲就加入俄國布爾什維克,1904年隨列寧到瑞士進行革命。1906年後響英國倫敦活動,1907年春赴美國僑居波士頓並結婚,曾在芝加哥加入過美國社會黨。十月革命後1918年回俄國,在蘇俄外交人民委員會工作。1919年3月出席共產國際第一次代表大會,之後以蘇俄紅十字會名義到過美國、墨西哥、英國、西班牙等地從事地下工作,簡單啲講,佢去世界各地「輸出革命」,指揮工作、培訓革命幹部。


總之鮑先生絕對經驗豐富,絕非當時中國國內只係讀過幾年馬克思嘅年青知識份子可以比較。


佢份CV,睇到你都驚啦,周遊列國,國際視野豐富,係一個「職業革命家」,第三國際派個咁嘅猛人嚟中國,就知道列寧同托洛斯基絕對冇輕視中國依個新興Market,1923年鮑先生響英國坐完監後、返莫斯科一轉,7月就嚟到中國,先到奉天與張作霖會晤,再到北京見俄共大使加拉罕。後奉命派到廣州,任共產國際駐中國代表,及蘇聯駐廣州政府全權代表。鮑羅廷獲孫文任命為國民黨組織教練員,提出按俄共模式改組國民黨,之後任中國國民黨中央執行委員會、政治委員會顧問,成為孫文嘅得力助手。


至於佢係幫孫文?抑或孫文都要聽命於佢?歷史上冇明確嘅答案。我個人傾向於後者,今日附帶一提一件事,有人話,孫文嘅「聯俄容共」政策嗰「共」字係解「第三國際」,並非「中共」,我認為第三國際即係中共,中共即係第三國際,兩者根本冇分別。大家都知道,北伐成功之後,有人反轉豬肚發生血腥清黨事件,曲解「聯俄容共」意思,唔係想為「清黨」事件合理化吓嘩?不過呢個世界嘅嘢,真係乜都有可能。


#常威 #大軍閥平反系列  #大軍閥 #民國歷史
極端的年代 74日
【常公子歷史頻道296回:斷送共和關 帝皇夢碎 蛋牛治】

袁世凱帝皇夢碎,主要嘅原因因為日本,其實當時嘅中國,無論行民主自由嘅共和議會制度,抑或係行君主立憲,我相信除咗幾個大城市內少數知識份子及有政治目的嘅政客之外,大部份人都會覺得冇所謂,總之國泰民安,有啖飽飯食,唔好打仗,我理得你係皇帝抑或係大總統?我個人相信,當時對國家政治體制有意見有睇法嘅人,可能只有三、五十萬,相對全國接近四億人口推算,其實不足1%。而且呢班有意見嘅人,當中亦有部份會支持袁世凱重新稱帝。

由於冇任何公投制度,袁世凱稱帝程序亦係透過粗暴干涉議會運作而得到法理依據,其實亦冇所謂法理依據。所謂民意,佢從來冇理會過,我亦可以肯定,如果當時中華民國有一人一票公投機制,袁世凱做皇帝我諗會攞到七成以上選票支持。洪憲帝制推行,國內民意根本唔係考慮範圍之內,反而國際上其他國家支持先係最重要,由頭到尾義無反顧支持袁世凱稱帝嘅係美國,大英帝國亦認同,日本起初都係支持嘅,西方列強都覺得,中國嘅分裂對佢哋嘅「在華利益」一啲好處,最好回復到滿清王朝時代,大家如取如攜,繼續逐忽逐忽瓜分呢塊肥豬肉。

但洪憲帝制上馬之後,日本人就反轉豬肚,殺袁世凱一個措手不及。日本更加響袁世凱登基前夕,宣佈全力反對帝制,甚至威脅出兵,袁世凱皇帝夢碎,其實係由日本人一手推翻。睇返成個大picture,日本人一直唔鍾意袁世凱依個人,大概由甲午戰爭前袁世凱擔任朝鮮大使開始,日本人已經視袁世凱為眼中釘,因為袁世凱從政以來,一直冇任何意圖傾向依附日本帝國,袁世凱想行嘅,係一條中國自主獨立嘅路線,「雄立宇宙之間」,唔想靠攏任何一個強權成為其附傭國或做BNO二等公民。

袁世凱唔相信日本,日本亦唔相信袁世凱。但袁世凱手下之中,就有大量人傾向日本(或稱呼被日本收買),當中最重要嘅一個當然係第二號人物北洋之虎段祺瑞,而袁世凱帝制失敗死亡後,段祺瑞亦順理成章正式接管中華民國政權。用陰謀論角度去睇,起初日本支持袁世凱稱帝,可能只係一個引蛇出洞嘅局,目的就係將袁世凱嘅政治能量徹底翦除一舖清袋,令親日嘅段祺瑞上臺。

我並唔係話袁世凱能夠成功做到皇帝就會國泰民安、天下太平,畢竟所謂帝制係萬惡不赦嘅事物,歷史並沒有如果,但洪憲帝制失敗,就直接導致之後十年嘅戰火連天大、意識形態大轉移嘅軍閥時代,就係珍珠都冇咁真。歷史同人民並無選擇到一心想復興華夏文化儒家道統嘅復古派袁世凱,大家選擇相信更新鮮更好玩更有希望嘅新事物、新意識形態,所謂舊嘅唔去,新嘅唔嚟。過去無論怎樣美好都好,都不應該返轉頭,人類要嚮前走,其實亦都冇錯,正所謂條路係自己揀,Hi Hi千祈唔好喊。

【常威近代史】第五部《霹靂大忠臣對決無敵大買辦》Round two電子書上架(條download link在下面),請大家課金支持我一直走落去,直至劉少奇骨灰到達北京王光美手上…

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上4000訂戶!

https://youtu.be/FKemZVt2DrI
極端的年代 72日
https://upload.cc/i1/2020/08/10/DCZYEJ.png

【常威近代史】(四百一拾九回)
曹錕買總統

中國歷史上,如果你想做皇帝或總統,甚至最高領導人,只係有錢絕對唔可以,但偏偏歷史上就出現過一個人,可以將總統買返嚟,佢叫曹錕,亦因為「曹錕買總統」,令到佢遺臭萬年,呢個係大家所認識嘅歷史真相。

1923年10月5號,黎元洪下臺後,連最後想喺上海重新召集國會搞兩個中央嘅終極反撲都失敗,完全Stop la歸隱。歷史上記載,直系軍閥首領曹錕以1350萬元巨額賄款,買得中華民國大總統職位!真係一個絕世冚家鏟!

當然曹錕想做總統就一定,第一次直奉戰爭之後,佢先迎黎元洪復職,利用黎元洪聲明平定政治局面,6月開始,逼走黎元洪,然後處心積慮、威逼利誘,軟硬兼施威脅及收買一衆國會議員,更加響北京甘石橋設立議員俱樂部,作為賄賂議員嘅活動機關,巧立名目,以「出席費」、「欠薪」、「酬勞費」、「車馬費」及多項「津貼」等名目收買國會議員,要佢哋喺總統投票案上投曹錕一票,更有傳聞,國會投票當日,曹錕派出大量軍警戒備,現場以每票5000-10000元直接買票,最後曹錕以593票中嘅480票當選新一任中華民國大總統。

不過事後,有唔少收咗錢嘅國會議員都彈出嚟洗白身世,話收嘅錢都只不過係欠薪,係政府之前爭落佢哋嘅津貼餘數,大家都知道中華民國政府一直欠水,有大量難數未找,依家有人找數,唔通唔要咩?至於佢哋究竟有冇受賄?有冇因為收錢而影響投票意欲?咁就係見仁見智,觀點與角度嘅問題,畢竟總統大選,曹錕亦唔係以99.99%嘅得票率當選。

亦有一個講法,話當時議會科支付比國會議員嘅錢,只係要求議員出席國會,並非影響佢哋嘅投票意欲。好多嘢根本有理說不清,而且仲係100年前嘅事,仲要經過幾代人嘅編輯、裁剪同詮繹。如果你硬係要得到一個結論,個結論就係「真相你永遠冇辦法知道」囉。

10月10號,較好曬日子,曹錕千呼萬喚始出關,由根據地保定抵達北京,就任中華民國大總統,影幅靚仔總統相,同時頒佈一部《中華民國憲法》,呢一部憲法亦都係中華民國自1912年頒佈《臨時憲法》之後,第一部正式由中央政府、合法經過國會授權所頒佈嘅國家《憲法》。
極端的年代 72日
當然有好多人唔承認依一部《中華民國憲法》,更加唔承認呢一場總統選舉嘅合法性,上海就有原本嘅國會議員提出選舉當日根本不足法定人數,聲明總統選舉無效,西南嘅各方軍閥、廣州孫文同東北張作霖更加唔駛講,無論曹錕(直系)做乜嘢,都一定係錯嘅。

問題喺呢度,如果你根本唔承認政權嘅合法性,正如當時中華民國國內好多人根本唔認同曹錕中央政底嘅合法性,咁就乜嘢都唔使講,亦唔使響之後嘅條文中咬文嚼字,你個政權根本唔合法,咁做乜嘢都係唔合法。至於乜嘢叫合法政權?點解你合法?而我唔合法?其實答案祇有一個,王家衛《一代宗師》話齋,一橫一直,最後企響度嗰個,就係合法嗰個,至於橫躺係地上打輸嗰啲,就全部唔合法。

至於部《中華民國憲法》,大批人認為係曹錕一手倉促炮制,只為咗增強佢登上最高權力寶座嘅合法性。當然喺一個民主自由嘅世界,你可以反對政府,你可以唔承認憲法,問題又重歸原點,如果你根本唔認同個政權嘅合法性,其實什麽都沒有需要再多講。

曹錕當選大總統後,受到全國各地強烈反對,時人稱之為「賄選總統」,國會被稱呼為「豬仔國會」,有份投票嘅國會議員被稱呼為「豬仔議員」,總之有幾黑抹幾黑,白都可以變黑。

10月8號,當曹錕仲未到達北京就任大總統,身處廣州嘅孫文大元帥已經發令要討伐曹錕,我睇唔到正義理據何在?只係覺得孫文都幾鍾意打仗?除咗要北伐曹錕,孫文仲要通緝投贊成票嘅國會議員,仲要求各國使館否認曹錕為大總統,世界上大概只有孫文本人做大總統才是合法的吧?

單單用錢可以買總統嗎?我並唔贊成。以曹錕當時嘅軍事實力,佢又有需要出錢收買議員嗎?單純「威逼」就可以,無需「利誘」掛?黎元洪已經下臺,響北京中央嘅政治鬥爭上曹錕早已經大獲全勝,登上大總統寶座,亦都一定會發生!左睇右睇,佢根本一個仙都唔使洗!

我當然唔係話曹錕條PK係好人,我只係覺得「買總統」一事並冇呢個需要,除咗維護法統制度之外,根本多此一舉,「曹錕買總統」大概只係政治對手撰寫創作用嚟抹黑曹錕人格同道德嘅口實,否則一個大好人做總統(例如黎元洪),大家又憑乜嘢道德理據去推翻佢呢?所以任何政治人物要落馬或下臺,必須要配合道德人格抹黑一齊去做,古往今來,歷史上實在太多例子,亦好似冇乜例外情況。

我最喜愛嘅歷史學家之一劉仲敬有以下描述:「驅黎兵便沒有給曹錕帶來多大的困擾,賄選卻做到了。他付給國會的幾百萬大洋,論購買力相當於現代的幾億人民幣,在1920年代是一筆足以立國或滅國的巨款,如果沒有把握一定能夠培養幾個吳佩孚,至少絕對有把握收買幾個馮玉祥,他如果把這筆錢省下來練兵,甚至更惡毒地多搜刮一筆練兵費,不難在戰勝以後運用附逆的威脅,脅迫出大多數民眾的歡呼讚美。他失敗以後,就很少人願意為法統做出如此巨大而徒勞的犧牲了……」(註一)

註一:劉仲敬著,【近代史的墮落】,臺灣,八旗文化,2016,P102。

#常威 #大軍閥平反系列  #大軍閥 #民國歷史
極端的年代 71日
【常公子歷史頻道297回:斷送共和關 割蓆 蛋牛治】

『割蓆』依個古語作為一個潮語都係近五、六年先用,意思即係中斷關係,從此河水不犯井水,去年,有所謂『永不割蓆』嘅講法流傳坊間,今日,要割嘅都割咗,唔割嘅亦沉默。當年袁世凱稱帝,佢手下北洋之虎段祺瑞、北洋之狗馮國璋兩大猛將立刻割蓆,呢個亦係洪憲帝制失敗嘅主因,如果佢皇帝做唔成,亦要去見閰帝,一代猛人,就咁玩完鳥。

尋日,警方以違反國安法拘捕黎智英及多名壹傳媒高層,之後派出大量警力搜查壹傳媒總部,要發生嘅終於發生,我一向認為港版國安法之立,就係為咗針對壹傳媒而來,唯一唔明白,就係點解黎智英冇將家人預先送走?一人做事一人當,禍不及妻兒其實係啱嘅,否則株連羅織,任何事件都會愈搞愈大,一發不可收拾,林鄭月娥細仔早兩星期前亦從美國返港,大家應該一清二楚會發生乜嘢事情?畢竟鬥爭進入戰爭狀態,已經同一年前太平時代係完全兩個層次嘅事,要用另一套方法思考事物。

當前政治氣氛空前高壓,每日不停有事情發生,並非每一個人都能夠輕鬆承受,加埋疫情,雙管齊下,真係好容易會有精神病或神經衰弱,佛洛伊德講過人嘅大腦有其承受極限,如果超過極限就會產生精神問題,我會同相熟嘅朋友講,如果感覺唔舒服或抑鬱,不如先遠離政治同一切新聞,讓大腦休息一段時間,重新適應新時代嘅生活規律。現實世界好多嘢避無可避,但畢竟可以遠離一會,無傷大雅。潮語都教我哋:『認真你便輸了』。

有朋友同我講,希望重返以前,2018又好,2014又好,2003又好,1997更好……作為一個讀歷史嘅人,知道亦冇可能,一切都係因果律,冇昨日嘅因,亦冇今日嘅果,極有可能從前有段時間嘅繁華盛世,只係當時人透支未來,所以到咗今日要償還。人活在歷史中,冇辦法置身事外,我哋每日享用嘅一切每日所以承受嘅一切,皆屬因果,世界係一張網,連結著所有古往今來生命體,牽一髮動全身。但有好多人唔明白,總覺得自己活於世界之外,總覺得可以獨善其身,當然覺得自己活於世界之外的人,亦要伸手進入世界內奪取生存享樂之所需物。

【常威近代史】第五部《霹靂大忠臣對決無敵大買辦》Round two電子書上架(條download link在下面),請大家課金支持我一直走落去,直至劉少奇骨灰到達北京王光美手上…

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上4000訂戶!

http://yt1.piee.pw/UMNNV
跳到頁尾