[bouncer]up緊,就快得

發表失敗
發表失敗
原因: 確定
極端的年代 81日
Fight For Freedom, Stand With Hongkong.
To be or not to be. It is NOW or never.

重溫舊貼

#good# 【常威考証】大清亡國關我老母蛋牛治
https://m.hkgolden.com/view.aspx?message=6835958&page=1

#good# 【常威中史】大清亡國關我老母蛋牛治2
https://m.hkgolden.com/view.aspx?message=6885326&page=1

#good# 【常威中史】大清亡國關慈禧蛋牛治 3
https://m.hkgolden.com/view.aspx?message=6928986&page=1

#good# 【常威中史】大清亡國關我老母蛋牛治 4
https://m.hkgolden.com/view.aspx?message=6970625&page=1

#good# 【常公子近代史】大清亡國關我老母蛋牛治 5
https://m.hkgolden.com/view.aspx?message=7007456&page=1

#good# 【常公仔近代史】大清亡國關慈禧蛋牛治 6
https://m.hkgolden.com/view.aspx?message=7044235&page=1

#good# 【常公仔近代史】大清亡國關慈禧蛋牛治 7
https://forum.hkgolden.com/thread/7085861/page/1

#good# 【常公子近代史】 8
https://forum.hkgolden.com/thread/7134248/page/1

#good# 【常公子近代史】 9
https://forum.hkgolden.com/thread/7173701/page/1

https://upload.cc/i1/2020/04/26/x0V3dP.png
極端的年代 81日
https://upload.cc/i1/2020/04/24/Ow8s41.png


【常威近代史】(三百七十四回)
大軍閥平反系列

原來啱啱先發現,自己寫緊一個世紀前嘅歷史,現在是2020年,我嘅近代史進程去到1921年,剛剛好100年一個世紀。

100年前,中共剛剛成立,當時嘅中華民國,依然係一個初生行共和憲制嘅民主自由國家,雖然唔可以同當時嘅英美日本比較,但係仍然係一個自由嘅國度,民眾享有言論自由、新聞自由、宗教自由、出版及結社自由、可以組織政黨或政治團體。後世人將呢段時間形容做「軍閥時代」,描繪成中國近代史上一段最黑暗嘅時間,其實完全錯曬,錯到離曬大譜。如果你身處1921年,你以為自己好苦好冇自由嘅話,咁只因為你未睇見地獄之門打開啫。

1921年,俄國革命大局已定,經過差唔多三年嘅殘酷內戰,由托洛斯基領導嘅紅軍擊敗保皇勢力白軍,取得全面勝利,俄共布爾什維克共產政權進入強勢執政階段,世界上第一個共產主義國家終於成功建立起嚟並且生存到落去。

用托洛斯基嘅講法,共產主義到底係乜嘢呢?就係「正直而開明的少數人有理由以自己『取代』未成熟的人民,並把理性和幸福帶給人民」,嗰一批「正直而開明的少數人」,就係擁有高度階級覺悟性嘅共產主義者,因此有共產主義者組成嘅政權,有資格代表全民執行最有利大衆嘅施政同管理,即係一個人民交托予「黨」全盤領導嘅「托管制度」。「托管」一詞用得非常精妙,細路仔入託兒所接受托管,就要聽老師話,因為細路仔唔識自己思想同作出最有利自身利益嘅判斷,老師唔管住,就會周圍走亞太區有一天成為亞太區崩個頭。

不過點解成日話托洛斯基係先知?就係佢響1921年講上面呢啲嘢嘅時候,同時用其令人震驚嘅銳利目光預言咗黨嘅命運:「首先是黨組織以自己取代全黨;之後是中央委員會以自己取代黨組織;最後是一個獨裁者以自己取代中央委員會。」列寜要布爾什維克行「民主集中制」,一層推一層,始終會將權力推到金字塔嘅頂端,一人手上,托洛斯基明白到極權始終會再出現,呢個係人性同埋「民主集中制」無法可以逆轉嘅困局,因此佢認為革命要每隔一段時間後再發生,推倒本來由上一次革命所創造出嚟嘅「極權」統治,呢個就係托洛斯基「不斷革命論」最簡易嘅解釋。

列寧本人未曾有幸活到成為獨裁者,有上述覺悟嘅先知托洛斯基,亦因為出身係猶太人及本身性格而做唔到呢個位,否則俄國內戰結束之後,佢只要唔交出紅軍兵權畀中央軍委會就可以。同埋托派「不斷革命論」思想實在太前衛,列寧自己都接受唔到,革命啱啱先至響巨大無比嘅殘酷鬥爭中獲得勝利,你就同我講總有一日要自己拆返自己一手建立嘅大台?實在係行得太前,結果列寧死後,有人冷手執個熱煎堆,終於一如托洛斯基所預言,一個歷史上最恐怖嘅獨裁者終於誕生。

佢叫史太林(1878-1953)。
極端的年代 81日
當然我唔排除,如果接替列寧嘅人係托洛斯基嘅話,所帶嚟嘅血腥同震撼會比史太林更大更重?

整個歐陸,尤其係英國法國同德國,都因爲第一次世界大戰元氣大傷,三個國家國內年壯男丁因為WWI同一場世紀瘟疫「西班牙流感」死去一半以上,你話大唔大鑊?德國無厘頭戰敗,被迫簽下梵爾賽條約,割地賠款之餘,霍亨索倫王朝崩潰,國家走上真正民主自由共和憲政之路,建立「德意志國」(Deutsches Reich),即後世所稱呼嘅「威瑪共和國」,自由民主之花,建設在頽垣敗瓦之上,早就註定營養不良,遲早要枯萎。

英國國力大衰退,日不落帝國始終要日落,你只要睇吓當時英帝國響中華民國嘅影響力同發言權急劇減退,你就會一清二楚。20世紀之前喺英國人玩哂,當然帝國疆域過分膨脹,亦係導致佢之後頽敗嘅原因之一,歷史上波斯帝國、羅馬帝國同蒙古帝國都講咗畀我哋知,權力泡沫等同資產泡沫,個波吹得太大,一定會爆。

取代英法地位嘅,係一直置身於一戰之外嘅美國,左右相隔一個大平洋一個大西洋,地緣政治保持咗美國嘅優越地位,你用力打仗,我就全力發展工業發展經濟,輸出軍用品武器同物資俾你打仗,此消彼長,遊戲規則其實相當簡單。

開心嘅美國大賺外匯,經濟欣欣向榮,去到20世紀20年代,美國已經差唔多取代大英帝國,成為地球上最大嘅經濟體系,不過資產泡沫不斷膨脹,終於引發十年後一場金融風暴,「大蕭條」震撼美國之餘,同樣將歐陸呢個火藥庫重新點著藥引,爆多一次!

另一個同美國相同境況嘅係日本帝國,雖然大正年代政治爭拗不斷,但係無礙日本嘅經濟高速成長,亞洲大佬已經係必然,「大東亞共榮圈」概念早響辛亥革命時代已經有人提出,東風壓西風,打倒二百多年來,紅鬚綠眼嘅西方列強對東方世界嘅剝削同壓迫,要改變全盤遊戲規則,東方世界嘅人唔可以只做廉價工廠勞工,供應消費品予西方列強資本家所需,比佢哋班吸血鬼進行炒賣金融活動然後取暴利。

要達到上述目的,東方世界就必須團結一致,大家要聚埋一齊,當然係最有power嗰個國家話事,呢個國家就係日本!唔通係你四分五裂嘅中華民國咩?

今集縱覧全局,上咗一堂20世紀初世史,goodbye!

#常威 #大軍閥平反系列  #大軍閥 #民國歷史

【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ
極端的年代 81日
【常公子歷史頻道254回:斷送共和關 #法統精神 蛋牛治】

今集講中華民國嘅五色旗代表法統精神,法統精神係乜?依法治國囉,即係行法治唔係行人治,唔係行蛋牛治腿蛋治?依照法律條文做事,行法家唔係行儒家。

講一個民間故事叫九品芝麻官,戚秦氏被人誣告,原告變被告,水師提督之子常威被告變原告,冤獄出現,小小知縣包龍星千辛萬苦上京告禦狀,遇上微服叫雞同冶皇帝,同冶委任包龍星為八府巡案,發還三司會審戚秦氏案,公堂之上舌劍唇槍,甚至有太監李蓮英到場觀審,意圖妨礙司法公正,最後包龍星運用智慧,令真相大白,怒斬水師提督之子常威,守得雲開見月明,公義得到昭顯,潛臺詞係惡人有惡報,法律之前人人平等公正嚴明。你buy?我唔buy!因為呢個情況就係人治,並非法治,所有司法程序由人所把持,包龍星就係最好嘅例子,戚秦氏沉冤得雪,公義得到昭顯,並非法律作用,而係包龍星良心發現,由個人喜好所發生。

法統精神,就係要將人嘅因素完全抹走,一切不公義不公平全因人嘅私欲所引發;其實廢話,冇可能做到。但係最基本原則係要將人嘅影響力降到最低,30%好過50%,10%好過30%,儘可能依照法律條文司法程序辦事,一齊要有白紙黑字follow up,唔可以亂嚟,唔可以想點就點,咁樣先至叫法統精神。由1911年辛亥革命開始,中國人就開始踏上法統之路,好可惜,行咗110年,始終冇辦法行到終點。原因仍然是哪個:上帝從來只眷顧西方人,並冇眷顧中國人。

今時今日嘅香港,過去所建立人人自豪嘅司法制度,開始土崩瓦解,短短兩三年間,人治因素大力插入法治之內,相信好快,響不久嘅將來法統再一次會瓦解,大概這是中國人的命運,歷史在反覆重演,似乎連上帝都無資格插手干預。又要講多次嗰個故事,從前蝙蝠在天空飛翔,雖然蝙蝠係盲嘅,但係佢仍然擁有自由飛翔嘅能力,但係地面上嘅走獸對牠非常妒忌,蝙蝠明明係哺乳類,同走獸係同一個種族,點解獨獨蝙蝠可以有翅膀喺天空飛翔?而走獸只可以背脊向天喺地上面行走?於是走獸要千方百計將蝙蝠拉落地面,要蝙蝠同佢哋一樣,背脊向天嗅著地上米田共嘅氣味,卑躬屈膝嚮前行。但係蝙蝠飛慣,根本唔識響地面行,結果速度落後於走獸,最後被走獸嘲笑為能力不足、態度不合時宜,落後於大時代。

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上3000訂戶!

https://youtu.be/lPeO-XwUOFs

最新上架【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》,全面開放,免費下載, #freedownload!
https://play.google.com/store/books/details?id=C3hjDwAAQBAJ
山系型男必入手爆紅越野鞋
Hoka One One男裝跑鞋八五折優惠碼「NEW15」HK$885!
www.matchesfashion.com
贊助網站
極端的年代 81日
https://upload.cc/i1/2020/04/17/9dTuCm.png

本土唯一香港土話近代史文本

【常威近代史】第一部《大清亡國關慈禧蛋牛治》,全面開放,免費下載, #freedownload!

Free下載連結

https://play.google.com/store/books/details?id=C3hjDwAAQBAJ
極端的年代 80日
https://upload.cc/i1/2020/04/27/8ziwAW.png


【常威近代史】(三百七十五回)
大軍閥平反系列

距離1920年7月打嘅皖直戰爭,已經接近一年時間,段祺瑞一派勢力正式Stop la。以曹錕、吳佩孚為首嘅直系逐漸收復亂局,北京中華民國中央政府大總統仍然係徐世昌,靳雲鵬內閣主持政局,中央政府仍然係一貧如洗,整個國家,隨住「聯省自治」風潮氾濫,「分離主義」大盛,團結已經冇可能,問題係大家幾時肯放低「中華民國」呢個招牌,另起爐灶,當時嘅中華民國表面推持嘅「大一統」局面,其實已經岌岌可危,有人會覺得,國家分裂係因為民主自由,「自由」丫嘛!即係想點就點,唔畀你中央管實曬,仲唔係自由?

咁樣講,其實又無錯。點解要大一統先?分裂成為好多個唔同嘅細國家分開管理,唔係更加好咩?我個人對國家大小全無感覺,一個大嘅國家,唔代表係一個好嘅國家,相反響今日21世紀,管理得最好,人民生活滿意度最高嘅都係小國小區,好似挪威、不丹、臺灣、瑞士、星加坡,本來仲有香港,全部都係小本經營。

但係小國問題係,人口小資源小經濟規模小,唔能夠自給自足,太平盛世當然冇問題,但係如果進入亂世,小國嘅生存能力就石原知美相對較低。同埋老實講,世界上大部分小國都係依附於大國生存,其實亦即係大國嘅一部分,或盟友或殖民地或代理人。整個世界嘅格局,仍然喺以「大國」作為單位去玩、去進行博弈。當年點解要成立歐盟?大家要統一貨幣歐羅?歐洲諸國就係要以一個「大國」嘅身份去抗衡美國嘅霸主地位。

而且仲有一點好重要,國家數目越多,即係代表發生衝突、發生戰爭嘅可能性越大,第一次世界大戰同第二次世界大戰就係最好例子,20世紀50年代到今時今日嘅和平盛世,所謂人類文明嘅黃金時代。其實都係因為世界上出現兩大陣營冷戰cold war而產生嘅微妙平衡所達至。所以蘇聯解體後,要冷戰狀態繼續維持世界平衡,美國需要製造另一個新嘅敵人,就係咁解。

冷戰本身根本就係一種維持和平的最有效手段。你以為佢哋嗌交?其實佢哋係想世界和平,以退為進,係政治上最高嘅操作技巧。

去返20世紀初期嘅中華民國,如果真係分裂成為眾多小國聯邦,最後嘅結果一定會俾大日本帝國所吞食,成為日本殖民地,而日本亦都真係會咁樣做,之後亦都嘗試做,只不過唔成功啫。
極端的年代 80日
自從甲午戰爭日俄戰爭勝利之後,日本人覺得中國其實係佢哋嘅,不單係中國,成個亞洲,或叫東亞,都係佢哋日本人嘅,所以日本有「大東亞共榮圈」嘅發展理念,件事冇話啱定錯,可能世界上真係出現一個「大東亞共榮圈」,東亞人民嘅苦難可以大大減少都未定,不過歷史上冇發生過,冇人會知結果係點?

1920年皖直戰爭後,其實中國嘅內戰並冇停止,各地軍閥不停發生地區性衝突,南方孫文軍政府同廣西軍閥打緊,湖南中原一帶,軍力最強嘅直系民國關公吳佩孚四面受敵,同湘軍、川軍不停交火,史稱湘直、川直戰爭,具體內容已經唔能夠再詳述,否則100年後,我都唔會寫得到王光美接劉少奇骨灰。

總之軍閥混戰,小規模戰爭不斷發生,中原你有你打,北方奉系張作霖因地緣關係,獨善其身,經濟力量不斷坐大,當時除咗大錢罌上海之外,奉系管轄嘅東北地區係全中國最富裕嘅地域。而且段祺瑞係直奉兩系合作打走嘅,張作霖本來就有染指中央最高權力嘅野心。後世歷史學家分析,如果張作霖醒少少(又如果佢個仔張學友醒少少),其實佢好有機會首先統一中國。

結果由1920年中到1921年中,徐世昌同靳雲鵬內閣既要服侍直系、亦唔敢得罪奉系,兩個老母系之間因為權力鬥爭,矛盾日漸加深,左右做人難,不過最重要嘅都係冇錢,現在描述吓當時嘅中央政府財政狀況:內債除舊有之愛國公債實發100萬元之外,其他如南京政府所發的軍需公債700萬元,中央財政部所發之元年公債1250萬,儲蓄票據1000萬,五年公債2000萬,七年短期公債4800萬,長期公債4500萬。原來自1911年中華民國創立開始,十年之間已經發債3至4億,仲未計同西方列強外國銀行嘅借貸,發債借錢為咗還債,還《馬關條約》還《辛丑條約》嘅賠款已經去咗一大筆,鬼叫你應承承擔滿清帝國遺留下嚟嘅一切債務?

中央政府運作需要龐大資金,發債同借錢每年要還利息,每打一場扙又需要大批軍費,仲有賬目問題,你估成班人冇人偷錢咩?中國人嚟架!1921年,又有天災,黃河又氾濫,直魯地區又出現「數十年未有之奇災」,江浙地區又有水災,地方軍閥乘機向北京政府要求賑濟,賑災嘅錢又會俾人上下其手,北京政府無計可施,單就1921年內,四次更換財政總長,但係中央政府已經借無可借,抵押品亦已經用曬,再發債卷仲有人信?當年中國每年開支,大約6億5千萬,但收入祇有4億5千萬,要養140萬正規軍,每年就算唔打仗,軍費開支就3億,佔國家總開支一半,打仗另計。

中央政府已經講到明,到咗民國14年,即1925年1月,中央政府就會破產,我講過,任何問題都係經濟問題,冇錢先係最大嘅問題,大家有得食有得住有工返有錢使生活優哉遊哉,邊個會同你上戰場打仗?當時嘅中華民國,都係用印銀紙(發債亦係印銀紙嘅一種方式)過活,不過佢哋印嘅銀紙、所發行嘅債卷,已經冇曬信用冇人信冇人會買,同今日美國嘅情況,差天共地。

#常威 #大軍閥平反系列  #大軍閥 #民國歷史
極端的年代 79日
【常公子歷史頻道255回:斷送共和關 #富人窮人 蛋牛治】

一場武漢肺炎,徹底將整個世界格局改變,歷史冇人可以估到,以美國霸權為首嘅「百國聯軍」圍堵中國,新冷戰格局定型,似乎冇人可以獨善其身,中國自上世紀80年代開始改革開放,接近40年嘅高速經濟增長,亦將會面對一個最大嘅難關,不過鬥爭從來冇停止過,以為世界可以和平,大家可以和睦共處,從來只係人類天真嘅一廂情願。

有人嘅地方就有鬥爭,有人嘅地方就有政治,似乎無法避免。如果西方陣營有一日真係同中共徹底撕破臉,以中共嘅個性,亦唔會卑躬屈膝要求和解,反正鬥爭係我強項,大不了鎖國,回復到80年代開放改革之前嘅陳雲主導鳥籠經濟狀態,又唔係未試過?當然呢個係最壞嘅情況,我亦唔相信有咁嘅一日,畢竟過去嘅事不能夠回頭,如果人類真係懂得從過去嘅經驗同歷史中獲取教訓同借鑒,從而規劃未來,世界亦唔會搞到今時今日咁樣。

我個人漸漸唔相信陰謀論,亦唔相信有人有政權有好長遠嘅睇法同部署,其實世界上每一個國家、每一個領導人,都係煮到埋嚟就食,餐飲餐食餐餐清,未來一個月嘅問題都冇辦法解決,有乜可能想像以「年」作為單位嘅問題清單呢?我好記得,當四年前特朗普聽見自己贏到總統選時候嘅表情,係「一臉愕然」,如果大家記得嘅話,我諗佢同全世界人當時從來冇諗過Donald Trump真係會做美國總統,但係煮到埋嚟就食,亦無辦法。

香港嘅情況亦都係一樣,去年6月,冇人會諗過一條逃犯條例會激起千重浪,半年混亂過去,我又好記得2019年聖誕節前夕,有人提出係時候回復經濟,聖誕市道消費非常重要,農曆新年前更應該回復正常,點不知道原來真正嘅原子彈係一場Covid-19,對經濟的破壞力甚至遠在去年六月開始嘅逆權運動之上,而且仲要係全球化一齊攬炒,有冇人可以估得到先?

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上3000訂戶!

https://youtu.be/SztdiH7nLdc

最新上架【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》,全面開放,免費下載, #freedownload!
https://play.google.com/store/books/details?id=C3hjDwAAQBAJ

【常威近代史】第一部《大清亡國關慈禧蛋牛治》實體購買
https://www.382now.com/product?id=87

【常威近代史】第二部《中國一百年前的第一次改革開放》實體購買
https://www.382now.com/product?id=151

【常威近代史】第三部《東方維多利亞女王之死》實體購買
https://www.382now.com/product?id=165
極端的年代 78日
https://upload.cc/i1/2020/04/29/GuQ4R7.png


【常威近代史】(三百七十六回)
大軍閥平反系列

中華民國北京政府嚴重財赤,長期入不敷支,大量爛數未找,拖得就拖,當時全國各地拖欠軍餉,已經係司空見慣,連軍隊都養唔起,軍人點會效忠你中央政府?邊個畀錢邊個先係老細,軍閥割據就係咁樣形成,其實都係經濟問題。中央政府亦都冇糧出俾公務員,鬼叫你窮,除咗國內拖數,同外國人借嘅錢亦都繼續拖,拖得就拖,或者數冚數,雪球越滾越大。

舉個例子,1921年美國催還中華民國中央政府關於煙酒借款問題,原來中國政府曾經兩次向美國芝加哥銀行借錢,合共1000萬美元,以煙酒稅做擔保。1921年11月1號借款到期,北京政府冇錢還,咁點算?美國芝加哥銀行派出專員嚟到北京,真心幫助你解決問題,「同你度掂佢」,解決嘅方法亦都好簡單,就係借一條新貴利償還舊債。再借1600萬美元,冚返之前嗰條1000萬美元爛數同66萬美元利息,九折交款,即係中國政府仲有300萬美圓落袋添,正向左走向右走到丫,抵押品仍然係全中國煙酒稅,新貸款盛惠年息七厘。

上述嘅只係眾多例子嘅其中一個,除咗美國,英國法國德國日本齊齊繼續借錢畀你中華民國數冚數,中國債務問題,其實由太平天國之亂,曾國藩李鴻章等白手套引入大量外國資本進入中國開始,已經不斷發生,1902後慈禧新政情況有所改善,但1911年辛亥革命爆發後,國家再陷入分裂同混亂狀態,情況再度惡化。中國人所感受到嘅恥辱,其實歸根究柢又係金錢問題,政治同經濟從來無辦法分開,大家睇歷史,千萬要記住。

弱國無外交,爭人錢就冇得惡,肉在砧板上,祇有任人魚肉。21世紀後嘅中國,終於富強起來,擺出一副暴發戶嘅醜陋面孔,人見人憎,去到邊衰到邊,其實係無可厚非,做人債仔做咗成百年,今日終於翻身彈起,一定會寸嘴,人之常情。所以如果你厭惡今日中國嘅所作所為,首先你要明白歷史上發生過乜嘢樹?凡事都係因果,唔係過去畀人壓迫得咁犀利,今日亦唔會咁向左走向右走寸。

當時國家咁窮,國內民眾只會更窮,窮人數目眾多馬克思主義就會受歡迎,非常簡單邏輯。中共建黨,對當時嘅世界嚟講,係窮人福音。但共產主義嘅危險性,資產階級早就有所警惕,無產階級向資產階級發動嘅鬥爭,根本係一場你死我亡之戰。

中共1921年7月成立,10月黨總書記陳獨秀就喺上海法租界被捕入獄,似乎有人一早已經知道,唔將星星之火撲滅,日後一定燎原!之後日子,北方全面趕絕共產黨,所以先至會發生共產黨向南方政府靠攏,出現聯俄容共,第一次國共合作。
極端的年代 78日
北方立立亂,南方孫文繼續集權,聲勢繼續做大,1921年10月,美洲華僑懇親大會隆重召開,來自美國、加拿大、墨西哥、古巴等300名華僑代表出席,推舉林光漢為會長,大會決議全體美洲華僑贊助廣州中華民國政府,並要求美國政府承認廣州政府嘅法律地位。同時發電報俾孫文,聲明全美洲華僑作為廣州政府嘅後盾,支持孫文北伐統一中國,之後大會舉行遊行示威,反對北京政府,擁護孫文。

孫文背後永遠有華僑力量同資金,呢個亦係佢多年死唔去嘅理由。響外國華僑心目中,只有孫文一個代表正義,其他嘅都係賊同匪!我自己唔明點解,大概係同孫文由1895年開始,長時間逗留喺世界各地做宣傳公關工作有關,有先入為主嘅味道。

10月8號,孫文亦響廣州國會提出北伐議案,廣州非常國會高票通過,但當時真正掌握粵軍軍權嘅陳炯明就投反對票,呢個亦種下咗孫文必須除去陳炯明嘅前因。不過有你冇你,孫文就做咗先算,10月15號,廣州政府北伐軍,就召集咗30000人繼續打內戰,擴大地盤。當然,當時嘅孫文,未敢直接挑戰盤踞中原、兵力雄厚嘅民國關公直系大軍閥吳佩孚,主力繼續打廣西軍閥,大家要記住,孫文自己都係一個大軍閥。

10月底,有一個叫「太平洋會議」響美國首都華盛頓召開,主要係傾關於第一次世界大戰結束之後嘅國際事務,各國公使聯名請南北政府停止對峙,派代表參加太平洋會議,北京政府決定派南方代表出席,月頭正式委派施肇基、顧維鈞、王寵惠及廣州方面嘅伍朝樞為出席太平洋會議全權代表。

政治現實係,中國南北分裂,有兩個合法中央,分別係北京政府同埋廣州政府。情況同今日嘅中國同臺灣一模一樣,究竟邊個係合法政府?要睇你點樣去睇?去到今時今日,仍然有人認為臺灣嘅中華民國政府先至係唯一合法嘅中國政府,另一面,中華人民共和國堅持「一個中國」嘅態度,喺生態位上,亦都合情合理。

10月,左傾文人郁達夫(1896-1945)嘅小說集《沉淪》出版,呢本係中國第一部短篇小說集,中國之前嘅小說大多數係章回長篇小說,經過五四運動白話文洗禮,新一代文學作品終於橫空出世,中國新文學運動正式浩浩蕩蕩地展開,因為之後有一個好重要嘅人物將要出場,佢叫魯迅(1881-1936),佢會利用短篇小說,改寫一代人嘅意識形態。新文學運動,同時係一個全新嘅意識形態戰場,國難當前,徹底揚棄儒家哲學嘅中國人民,急需得到另一種意識形態填補文化缺口,「共產主義」作為一種建設新世界嘅夢想藍本,在左傾文人筆下美化至致極,當然大有捧場客。

要做好一盤生意,首先要做好Marketing。

#常威 #大軍閥平反系列  #大軍閥 #民國歷史
極端的年代 78日
https://upload.cc/i1/2020/04/17/9dTuCm.png

本土唯一香港土話近代史文本

【常威近代史】第一部《大清亡國關慈禧蛋牛治》,全面開放,免費下載, #freedownload!

Free下載連結

https://play.google.com/store/books/details?id=C3hjDwAAQBAJ
極端的年代 77日
【常公子歷史頻道256回:斷送共和關 #孫大炮 蛋牛治】

孫文有一個花名叫孫大炮,話佢好鍾意車大炮,佢吹水吹得最大嗰嘢,就係關於當時中國鐵路嘅建設藍圖。對於孫文嘅為人,近代史已經講得好清楚,尤其是過去十幾二十年,因為臺灣政治開放,好多屎料重新被發掘,隱藏喺孫文背後嘅黑暗面逐步浮現。過去作為國父嘅孫文,一直係一個高不可攀嘅道德形象,係一個近乎完美人格嘅政治偉人,但係真相並唔係咁樣,孫文係一條變色龍,某程度上亦都係一個馬基維利主義者,佢為咗實踐政治目的,往往能夠不擇手段,依一點毋庸置疑。

孫文身處嘅世界,係一個非常危險嘅古代世界,作為一個古老帝國嘅異見者,十幾年流亡生涯,將佢鍛煉成為一個超級陰謀家,亦都無可厚非。如果佢真係一個正直嘅君子,我諗佢永遠唔會係權力鬥爭中能夠脫穎而出,甚至流芳百世。好人唔適合做政治家,只適合做社工或者教師,玩政治就係玩權謀,你要打低啲奸人,衹能夠比佢哋更奸;你亦唔可以有一絲仁慈,否則就會死無葬身之地。點解「和理非非」唔得?亦都係因為呢個理由。

孫文最成功嘅地方,就係得到國民黨同共產黨兩者嘅認同,兩邊都唔夠膽詆譭佢抹黑佢,結果齊齊捧佢上天,令孫文成為近代史上少有兩黨都buy嘅政治道德人格典範;孫文一手扶起蔣介石,蔣介石當然唔能夠抹黑孫文,係道義上嘅問題;而孫文本身就係一個百分百嘅共產主義者,中共能夠做大,全因為孫文聯俄容共,所以孫文亦係中共嘅大恩人。而且孫文實在死得太合時,死於北伐之前,死於蔣介石同共產黨反面清黨之前,我個人亦好相信,如果孫文冇死,亦唔會有血腥清黨事件,成個中國嘅政治局面,亦可能會完全扭轉。一個人要生得逢時,亦都要死得合時,孫文就係一個好例子。

世人今日對孫文的印象,或者不及從前那麼神聖不可侵犯。但係孫文始終係一個聰明人,佢嘅政治智慧喺佢身處嘅世界其實行得好前,佢用西人嘅政治思考方法喺中國政治環境中打滾,所以佢做嘅嘢,亦都比其他人有效,起碼係個人宣傳、意識形態一環上,孫文領先其他政治對手九條街(好可能係孫文英文好,夠閱讀英文書籍),而且由一開始,作為一個堅貞共產主義者,佢始終無改變過自己嘅立場,佢嘅行為手段如果不計算在內,孫文其實好值得欣賞,亦好值得尊敬。作為一個政治符號,佢絕對勝任有餘,畢竟同時代中能夠同佢相提並論、做壞事比佢做得少嘅人,並唔係太多。

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上3000訂戶!

https://youtu.be/TxSICyBsVkQ

最新上架【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ


【常威近代史】第一部《大清亡國關慈禧蛋牛治》,全面開放,免費下載, #freedownload!
https://play.google.com/store/books/details?id=C3hjDwAAQBAJ
極端的年代 76日
https://upload.cc/i1/2020/05/01/nRt4ow.png


【常威近代史】(三百七十七回)
大軍閥平反系列

發生響1919年嘅「五四運動」,或者我哋稱呼為新文化運動,基本上係中國第一次文化大革命,中間帶住巨大階級性。新文化推翻舊文化,傳統士大夫讀書人階層、儒家哲學傳統全盤被推翻踢入屎坑,整個過程只係用咗區區幾年時間,由此可見,當時中華民國國民對傳統文化嘅厭惡程度,實在無以復加。

傳統中國,係一個由儒家哲學三綱五常宗族倫理組成嘅道德世界,讀書人士大夫階層係另一個Level,因為讀過書(讀過吓書),就算考唔到科舉,做唔到朝廷大官,留喺條村度都可以也文也武,甚至作威作福。中國傳統民間故事,成日強姦民女嗰啲「員外」,就係嗰亭讀過吓書嘅人,佢哋識背四書五經、識寫識讀文言文,甚至會向左走向右走吓詩作吓對,吹個靚頭焗個靚撻。真係冇辦法,係一個文盲率達到99%以上嘅農業社會,所謂讀書人其實就係維持政權穩定嘅最大推手。

古代世界,有咩人有資格讀書呢?咪有錢人囉,一條窮西,老竇老母親戚鄉里朋友成條村盲字都唔識多個,想發圍?世界上冇咁多個朱元璋。去私塾讀卜卜齋要科水(或者有年輕讀者唔知咩叫卜卜齋,卜卜齋唔係扑嘢嘅地方,扑嘢地方叫雞竇,卜卜齋係喺民間俾細路仔入去讀書嘅地方,因為好多時候要背三字經或其他儒家經典,教師會扑個木魚【唔係金魚】製造節奏同學生一齊背誦,因為木魚卜卜聲,所以叫卜卜齋),請私人教師返屋企補習?更加係名門望族先做得到,可想而知,當時讀到書嘅絕大部份係有錢人,或叫資產階級,呢啲狀況到今日都冇變過,如果你有機會入三大,不妨做個考察,睇吓學生住私樓多抑或公屋多?

普及教育?乜向左走向右走嘢嚟架?有必要嘅咩?做奴隸使乜讀咁多書呀?耕田嫁嘛,有氣有力識得食飯屙屎同繁殖就夠啦,讀得書多會作反嫁!understand?大學呀普及教育呀公立學校呀由德國普魯士發明,其實只係19世紀嘅事情。社會文化水平愈高,人類嘅反抗意識就愈高,你睇吓,歐陸一有普及教育,就有馬克思主義誕生;清朝係由1902年慈禧新政開始搞普及教育,結果幾年後,就發生辛亥革命;90年代彭定康嚟香港履任港督,大量增加大學學額,要將大學教育普及化平民化,表面睇係廢除精英主義,等多啲人有機會讀大學,德政嚟個喎!實際上係擺定個計時炸彈比你中華人民共和國97後嘆,講笑啫,英國人點會咁奸呢?紳士嚟嫁Hi。
極端的年代 76日
1920年代,新文化運動開始深入社會上每一個角落,民眾唔再睇文言文四書五經,outdate啦!我手寫我口,要用要睇白話文,於是乎新一代白話文文學作品鋪天蓋地出現,其中小說係最重要嘅一種文學作品,但係其實睇返中國嘅章回小說,例如《紅樓夢》、《三國演義》、《水滸傳》同《西遊記》都係用白話文寫(從前一白話文當然唔同今日嘅白話文),從前嘅世界,呢亭章回小說係民間講古佬響橋底講畀啲唔識字嘅貧苦大眾聽,叫説書,通俗小說難登大雅之堂,士大夫望到要洗眼,今時今日,我哋叫「四大名著」。

白話文嘅應用係一個里程碑,因為普羅大眾終於能夠用文字將自己嘅思想表達比其他人知,以及吸收其他人思想,從前使用文言文嘅書信來往,或者只有士大夫階層或接受過教育嘅人先睇得明白,就好似我哋今日睇古文一樣,其實係一種密碼,係一種文化封閉,亦都係一種階級權力嘅掌握。

由晚清後期開始嘅政治動盪,大家亦都可以睇到文化傳播普及係重要一環。起初戊戌政變只係侷限於士大夫階層;後來辛亥革命,識字嘅人多咗,就有一般軍人同知識分子參與;之後新文化之運動洗禮,知識大爆發,去到國共內戰,就連農民都識得叫馬克思主義打倒資本主義,叫農村包圍城市,一環扣一環,讀書識字再唔係某個階級專利。今日香港,最想港獨嘅人係大學生,反而教育水平較低嘅人,大部分傾向支持政府。「革命」前生係「教育」,所以新馬克思主義者認為,「學校」本身先至係最大嘅國家機器。

政權要穩定,必先控制意識形態,控制意識形態有兩大範疇,第一係「教育」,第二係「傳媒」。而且要改變人嘅意識形態好難,因為意識形態本身就係先入為主,除非政權敢採用大規模屠殺肉體消滅作為手段,否則採取教育或潛移默化方法,時間會用上二三十年以上。

我成日講結界師鄧小平高瞻遠矚,「50年不變」,2047回歸呢個日子唔係隨口噏當秘笈,而係50年後,嗰一代接受港英殖民地教育成長嘅香港人先至會死乾死淨( Including me)。你接受唔到?咁你根本唔明白乜嘢叫做實用主義者?唔明白乜嘢叫馬基維利主義者?

或者你根本唔認識鄧小平是誰?亦唔明白咩叫歷史。

現在發生響香港嘅,其實係一場意識形態戰爭,新生意識形態要取代原來嘅意識形態,但守護住原來意識形態果批人,偏偏又係最年輕個批人,仲要係九七後出世個批人,其實個局面相當奇怪。中共係一個意識形態政黨,中國係一個意識形態大國,玩意識形態應該玩到出神入化任佢點向左走向右走都得,但係當權者對香港局面嘅錯判,係完全不能夠接受。又或者,上一代人始終跟不上時代,互聯網正在改變一切。

互聯網本身,正是另一波文化傳播普及,而且兇猛程度,比過去嘅任何一次知識大爆發,更要恐怖百倍。

#常威 #大軍閥平反系列  #大軍閥 #民國歷史
極端的年代 76日
https://upload.cc/i1/2020/04/17/9dTuCm.png

本土唯一香港土話近代史文本

【常威近代史】第一部《大清亡國關慈禧蛋牛治》,全面開放,免費下載, #freedownload!

Free下載連結

https://play.google.com/store/books/details?id=C3hjDwAAQBAJ
極端的年代 75日
【常公子歷史頻道257回:斷送共和關 #姻親關係 蛋牛治】

出版人講我知,最好賣嘅書永遠都係財經書,因為好多人以為買本財經書,或者增加對金融嘅知識,就可以發達,對住部電腦炒下股票,就算唔可以飛黃騰達至少可以養活自己,達到財務自由,40歲退休嘅偉大目標。

有上述經歷嘅人,我見過,但萬中無一,佢哋能夠到達財務自由,好多時候亦唔係因為炒股票好叻,而係時來運到,重手買啱一隻升幾十倍嘅股票,簡單啲講係運氣問題。香港曾經有人求卵其其篤九個數字中三T贏幾千萬,機率其實係一樣。信我,千真萬確。睇財經書當然有用,個用途並唔係可以發達,而係增長你嘅金融知識,響關鍵時候冇咁易輸到Hi Hi。

我最近都明白一個道理,千真萬確親身經歷,好多人都知道,本公子因為出身貴族家庭,又係水師提督常昆個仔,自幼好食懶非,所以好鍾意跑馬,但係我發現,每當我用心去研究當日賽事嘅時候,我通常都會輸;反而全無時間,倒瀉屎求其玩亂咁篤就會贏。問題究竟在哪裏?似乎大家應該一清二楚,到最後不外乎係運氣同機率問題,你對馬嘅理解或對股票嘅理解可能反而令你輸錢。

但發達亦唔係好難,反而好容易,如果你嘅年紀有返咁上下,響社會上碌得十零二十年,你就會留意到大部分發達嘅人,都係透過姻親關係而發,嫁個有錢人,娶個有錢老婆,一登龍門升價十倍,告別從前日子,公屋去山頂,所謂英雄莫問出處,香港好多富豪都係咁樣彈起。同有錢人建立姻親關係,亦係機率同運氣嘅問題,同個人樣貌能力背景完全無關,不過大前題係你要有能力進入有錢人嘅圈子,識到有錢人。孫民同宋家嘅關係,亦都係一樣,大漢奸汪精衛個老婆陳璧君,亦係南洋馬來亞富商之女,政治同經濟永遠掛鉤。

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上3000訂戶!

https://youtu.be/7hIOxZPvPHw

最新上架【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ
極端的年代 73日
https://upload.cc/i1/2020/05/04/JLXSgF.png


【常威近代史】(三百七十八回)
大軍閥平反系列

之前講過,1921年11月有一個叫「太平洋會議」,響美國首都華盛頓舉行,中華民國兩個中央都有派代表參加,開會嘅國家包括美國、英國、日本、法國、意大利同中國等九個國家,不約而同,佢哋係第一次世界大戰嘅戰勝國,中國有份參加會議,真係萬幸,就咁睇,你仲以為當時嘅中國係世界強國之一添,陰9公……

事實上,會議嘅目的亦都同中國有關。第一次世界大戰結束後,英國、美國、日本、法國四大超級強權嘅實力發生咗顯著嘅變化。最簡單嘅係,真正硬砌德國嘅英國同法國損失慘重,國內壯年男人死咗一半以上(加多場1918年西班牙流感),你話得唔得人驚?英法國力下滑;反而響側邊食花生嘅美國同日本就大收漁人之利,國力上昇。但係呢四個國家喺遠東同埋太平洋地區都牽涉巨大利益,尤其是喺中國,大家點分贓先?一戰之前,大英帝國惡曬,一戰之後,日不落帝國終於日落,美日從後趕上,要同你分餅仔。

大家又唔好唔記得,美國同日本係世仇,日本嘅明治維新係因為美國黑船堅炮利打開日本鎖國嘅大門而發生,日本人視為國恥,佢哋從來唔妥美國人,依份不世仇恨,以及依份仇恨帶嚟嘅後果,到今時今日仲喺度。

大英帝國國勢沒落,要退場後,日本成為中國最大嘅既得利益者,美國人睇見你食(中國)得咁開心,亦都好想加多雙碗筷一齊開餐。「太平洋會議」就係一場重新分配各國在華利益嘅會議,既然一衆強姦犯已經列席,作為被強姦嘅主角中國,又點可以唔出席會議呢?所以中國一定要有份參加,響會上,中國政府代表施肇基提出解決中國問題嘅十項原則,要求各國「尊重中國領土之完整及政治與行政之獨立」,其他國家一定「尊重」中國,佢哋一向尊重中國,強姦你亦唔代表唔尊重你。

中國希望和平解決遠東及太平洋問題,聲明不再割讓或租借本國領土予外國,事實上太平洋會議係一個重要里程碑,中國並表示贊成美國嘅「門戶開放,機會均等」嘅主張,亦由嗰陣時開始,美國開始加大力度插入中國事務,美國嘅競爭對手係日本。會議上通過咗《中日解決山東懸案條約及附約》,即係21條嘅尾巴,仲有《九個關於中國事件應適用各原則及政策之條約》、《九國間關於中國關稅稅則之條約》,旨在保護各國在華既得利益,大家傾好佢,唔好拗數,決定強姦嘅先後次序同埋力度大細啫。
極端的年代 73日
依一場太平洋會議,確保咗一戰之後西方各國喺遠東及太平洋地區嘅新秩序,最重要嘅係,美國借住門戶開放政策,打破日本同英國喺中國嘅壟斷性優勢,取得更多響太平洋地區擴張嘅機會。中國作為被強姦嘅對象,當然任人魚肉,但係太平洋會議上,以日本人嘅眼光睇,又係一衆西方列強想抑壓日本人響亞洲擴張嘅野心,我講過,打完甲午戰爭同日俄戰爭後,日本人根本覺得東三省、遼東半島係佢哋嘅,如果唔係西方列強阻頭阻勢,或者「中國已經是日本的了」。

美國想插隻手入嚟?日本人嬲硬,日本喺中國投資嘅人命係幾十萬條,美國呢?凡事唔好淨係講錢,喺政治世界有樣嘢叫「血酬」,錢債可以還,但「血酬」就冇得還,血酬就係人命,人命基本上係無價嘅;錢債可以傾還款安排,甚至破產唔使還。但血酬唔可以,正如當年六四事件鄧小平出動坦克鎮壓天安門廣場學生,佢就講,唔通我就咁將共產黨嘅政權交出來當冇件事?咁我點對得住當年為共產主義革命犧牲嘅一種烈士英靈兄弟手足呢?鄧小平所諗嘅,就係血酬,明白未?

日本付出血酬侵略中國,叫實牙實齒,其他西方列強想食花生分一杯羹,其實真正Hi Hi嘅係佢哋。當時嘅日本人,目標亦唔係區區一個小小中國,而係想建立「大東亞共榮圈」,一統亞洲,要東風壓西風,扭轉整個世界係紅鬚綠眼鬼佬話事、或西方猶太人資本家集團壟斷嘅資本主義遊戲規則嘅局面。日本人會為咗呢個理想不斷嚮前衝!衝!衝!甚至為此建立軍國主義,寧為玉碎,不作瓦全,打到最後一兵一卒都唔會投降,幸好奧本海默及時發明咗原子彈,掟咗落廣島及長崎……

我常公子嘅歷史論述,並唔想單單講歷史,如果歷史本身唔能夠作為現代人一種借鏡或教訓,歷史基本上冇向左走向右走用。

當時新興嘅日本帝國,要挑戰整個以西方列強為首嘅資本主義世界遊戲規則,其實同今日嘅中國亦都非常相似,東風壓西風,係一場異常殘酷嘅鬥爭,當日本傾盡國力,鬥至最後一兵一卒,最後無功而還,淪為美國嘅附庸國,咁就70幾年。今日中國重蹈當年日本嘅覆轍,由於巨大嘅經濟崛起,覺悟到遊戲規則其實絕對唔公平,所以要想辦法扭轉佢,結果,亦同當年嘅日本一樣,成為西方列強圍攻嘅對象。最近一場武漢肺炎蔓延全球,演變成「百國聯軍」圍堵中國嘅局面。最後要打嘅,係要打醒你中國反撲整個遊戲規則嘅決心。

你要搞一帶一路、搞亞投行、搞人民幣貨幣結算體系,就係另起爐灶。爐頭從來祇有一個,你想搞第二個爐頭煮餸食飯,就要問過大佬,大佬當然會答應你,從來祗有獨市生意先係最賺錢。但係要打大佬,需要有足夠彈藥,亦需要有詳盡嘅戰略部署,仲要有天時地利人和。當年日本做唔到嘅事,今日嘅中國又有冇辦法做到呢?我唔知道,因為歷史往往係出人意表,絕對唔會咁輕易俾你估得到。

#常威 #大軍閥平反系列  #大軍閥 #民國歷史
極端的年代 72日
【常公子歷史頻道258回:斷送共和關 #宋教仁之死 蛋牛治】

宋教仁之死,係中國民主里程上一樁最大嘅悲劇。中華民國第一次國會選舉,由年青人宋教仁領導下,「國民黨」(並唔係後來嗰個國民黨,亦唔係後來後來嗰個國民黨)取得全面大勝,喺國會取得大多數議席,身為黨魁嘅宋教仁預備北上,由上海搭火車去北京,根據自由民主議會規則,作為國會內最大黨嘅領導者,佢將會成為國家總理(Prime minister),同當時嘅臨時大總統袁世凱分享權力,好可惜,就喺宋教仁以勝利者姿態出發去北京當日,佢比神秘槍手行刺而死。

宋教仁之死,矛頭直指袁世凱,於是產生咗所謂「第二次革命」,亦係中華民國建國以來嘅第一次內戰,從此以後,南北徹底分裂,所有嘢冇得返轉頭,一直亂落去,直至全國人民走向地獄之門為止。我有陣時諗,如果宋教仁冇死,中國民主政治嘅發展路途,應該會全盤不同,歷史的確好鍾意同中國人開玩笑,特別係中國人。關於宋教仁之死,歷史上仍冇一個正確答案,邊個先係真正殺死宋教仁嘅兇手?其實並沒有人知道。

宋教仁喺火車站中槍後,並無即時死亡,彌留塵世期間,佢交代咗自己嘅身後事,同埋寫咗封信俾袁世凱,信中內容,Youtube片已經提及,唔想重複。但臨死之前嘅宋教仁,仍念念不忘國家民族嘅興衰,亦展現咗佢高尚嘅人格同風骨,從此以後,佢亦成為咗代表中國人對民主自由期盼嘅象徵人物。肉體雖亡,但精神不朽,中國儒家哲學對聖人嘅定義有所謂「三不朽」,即係「立功」、「立言」、「立德」。立德道德為「體」,立功立言為「用」,體用兼備,知行合一方為聖賢也,年輕人宋教仁響「立功」、「立言」、「立德」三方面,似乎都能夠做到了,所以如果被稱呼為「聖人」,也不枉為過。

宋教仁死嘅時候,只係剛剛滿30歲,係30歲!佢應該能夠成就更偉大嘅功業,同國家民族造出更偉大嘅貢獻,可惜上蒼冇畀個機會佢,猝然而逝,留低嘅係無限空虛,同埋南北之間一個永遠解唔開嘅仇恨死結。幕後主便殺死宋教仁嘅真兇,其實係呢個人親手斷送中國人嘅民主同共和,係呢個人唔畀中國人踏出民主自由選擇嘅第一步,如果地獄有18層,呢位仁兄要落第36層。而於佢係邊個?我並唔知道,亦都唔肯定。

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上3000訂戶!

https://youtu.be/ds1GUKQtwPY

最新上架【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ
極端的年代 71日
https://upload.cc/i1/2020/05/06/baSPL4.png


【常威近代史】(三百七十九回)
大軍閥平反系列

1921年嘅12月,發生咗幾件事,首先12月4號係好重要嘅一日,因為一個偉大嘅中國人喺依一日出世,佢叫「阿Q」,阿Q係中國最響朵一個作家魯迅筆下小説「阿Q正傳」的主角,由1912年12月4號,北京《晨報》副刋開始連載,直接去到1922年2月12日連載完畢,呢部中篇小說,影響咗幾代中國人。

「阿Q正傳」內嘅阿Q係一個農民,同時係一個中國人嘅典型化身,阿Q無固定職業,煮到埋嚟就食,「割麥便割麥,舂米便舂米,撐船便撐船」。佢當然係一個窮人,而且係一個唔認衰嘅窮人,好聽啲叫做不羈放縱愛自由,難聽啲係社會上嘅魯蛇。佢嘅口頭禪係「我們先前——比你闊多啦!你算是什麼東西?」無論遇到乜嘢挫折同侮辱,阿Q都能夠想得通諗得掂,絕對唔會唔開心,亦唔會有憂鬱症,佢有一招絕活,叫「精神勝利法」,現實打唔贏你,就用精神打贏你。

阿Q無時無刻感覺自己勝利在手,天下我有,雖然阿Q係一無所有。阿Q一方面好追求平淡生活,衹要同佢心中所諗唔同嘅事,佢會視為異端邪說,唔可以接受。另一方面阿Q亦都會革命,但係佢革嘅,係「這伙媽媽的」仇人嘅命。

「阿Q正傳」依本諷刺小說大受歡迎,魯迅力圖通過阿Q扭曲嘅精神狀態,影射當時中國人心理弱點同弱智位,從而令大家覺悟反省,阿Q所影射嘅唔單只係上層建築班政客軍閥高官,而係所有中國人,當時嘅中國人,好多人懷緬過去,其實我都唔明到底懷緬啲乜Seven?其實當時嘅中國已經衰咗六七十年,衰到貼晒地,大家好憎嘅老佛爺慈禧太后滿清政權亦都被推翻,一切推倒重來,唔係大家想發生嘅咩?咁點解要懷緬從前呢?一字咁淺,就係一蟹衰過一蟹,今日嘅生活比不上從前。

正如今日好多俄羅斯人同東歐人好憎戈爾巴喬夫(1931-),話佢1991年一手將蘇聯大國解體,結果大家衰到今時今日、窮到今時今日,但當日結束蘇聯極權統治嘅戈爾巴喬夫,明明係一個偉人,明明係大家所擁護嘅,典解嘅?

香港都係一樣,唔再多講。衹能夠講,你以為山後邊有一個更美好嘅世界存在,從來只係人間嘅一廂情願。
極端的年代 71日
魯迅係新文學運動最重要一個人物,沒有之一,唯一可以同佢相提並論嘅只有胡適,但胡適係右派,魯迅係左派,魯迅寫嘅多部中短篇小說,徹底地喚醒咗中國人的反抗意識(或赤化),文字嘅力量喺從前非常強大,其實到咗今日都未變過,只不過係轉載文字嘅媒體日新月異而已。

魯迅原名周樹人(1881-1936),浙江紹興人,出生於一個家道中落嘅中產家庭,佢有個細佬叫周作人(1885-1967),同樣係新文學運動舉足輕重嘅大人物(個人認為民俗學家周作人成就比佢大佬大得多…兩兄弟亦係共產主義信徒),魯迅於1901年礦路學校畢業,之後考取獎學金,公費到日本讀醫,佢應該冇攞到個醫學學位,當年留學日本嘅留學生搞革命,亦都係常態同潮流(正經讀書就係笨Seven囉)。留學期間認識中華民族發明者章太炎,加入革命組織光復會,但係魯迅並唔係一個積極嘅革命者,鑑湖女俠秋瑾(1875-1907)就曾經喺「猛回頭」陳天華(1875-1905)嘅追悼會上痛駡魯迅膽小怕事、投降滿虜、賣友求榮。

後來魯迅返去中國,做中學教師,並冇參與過任何實質嘅革命活動(可能有,但史書上冇記載),1911年辛亥革命爆發後,偉人蔡元培出任教育總長,開始提攜光復會舊人,魯迅就喺個時候去咗北京,響蔡元培護蔭下有份政府嘅高薪厚職。中國共產主義天地雙龍之一陳獨秀創辦《新青年》,魯迅成為寫手及長期供稿人,五四運動、新文化運動嘅興起,直接將魯迅帶到人生嘅顛峰,成為新文化運動第一號旗手,亦成為最多人認識嘅中國作家、及歷史偉人。

魯迅思想左傾,信奉共產主義同馬克思主義,不過當時作為一個年青人偶像,擁有眾多fans,要走在時代尖端,一定要buy同sell馬克思主義,就算你唔信馬克思主義亦都要扮信,左傾係潮流,右傾係守舊,係中國20世紀20年代嘅社會風貌,一派左傾文人同埋文藝工作者電影工作者,亦都響當時中國最資本主義嘅自由城邦上海灘大放異彩,響紙醉金迷嘅資本主義世界擁抱共產主義馬克思主義,的確係一件非常浪漫嘅事情,魯迅只係其中一個。

成為大作家之後,魯迅不斷出版文學作品批判現實社會、批判資本主義世界,用今日嘅講法,佢「洗咗唔少年青人嘅腦」,令佢哋思想左傾。不過呢個並唔係罪行,因為大家都好樂意咁樣做,當時亦冇人知道共產主義世界真正來臨嘅時候,會係一個乜嘢嘅慘烈狀況。

有早知,就冇乞兒。世界運行其實好簡單,你只要知道聽日跑馬其中一場頭馬就乜都搞掂曬,所以作為預言家(馬評人股評人財經演員風水師算命師或政客),永遠有市場,世人永遠相信有人會「早知」,但真相其實係冇,否則世界上唔會有乞兒。

小説作為一種意識形態戰鬥兵器,響中國近代史上,中共第一號文膽陳伯達(1904-1989)未起朵之前,以魯迅用得最好,遇神殺神,遇佛殺佛,魯迅亦同孫文一樣,係國共兩黨兩邊都唔夠膽抹黑嘅歷史人物。

1000日元上嘅頭像日本文學家夏目漱石(1867-1916)影響魯迅好深,1905年夏目漱石出版最重要作品《我是貓》,大家不妨將魯迅嘅《吶喊》同《我是貓》比較吓,你就會知當時中國同日本文化嘅分野,同距離。(*此為大東亞共榮圈的註腳*)
極端的年代 71日
https://www.youtube.com/playlist?list=PL0RVUAILQUOvTo8JJrayjrvd_Nbjc-0Me

請加入常公子的近代史世界!

#ChineseHistory #HongKong #China #History
極端的年代 70日
【常公子歷史頻道259回:斷送共和關 #真凶 蛋牛治】

今集分析殺死宋教仁嘅真正兇手,個人認為袁世凱機會唔大,因為如果真係袁世凱做,佢就係搦起舊石頭砸自己隻腳,袁世凱係聰明人,唔會咁蠢會做。所以我幾乎可以肯定,宋教仁係死於南方內鬥,亦即係話死於籠裏雞作反,好似陶成章一樣,死於革命黨內派系權力鬥爭,至於兇手係邊個?或者兇手背後仲有冇人?聰明嘅讀者,應該心知肚明,得罪方丈,從來沒有好下場。

凡事凡物,包括政治在內,最高境界係「表面做一套,內裏做一套」,表裡不分,你中有我,我中有你,敵我難分,只談利益,不談道德或原則,視為馬基維利主義者。現代世界,有兩位仁兄都玩呢招,一個叫特朗普,另一個叫金正恩,詐傻扮懵,口沒遮攔,不按常理出牌,其實精過冇尾蛇,最鍾意表面講一套,內裏做一套,當所有人係白癡,任佢魚肉。其實簡單終結一句:「就係要我摸你唔透」,從來不見底牌,就冇辦法預測佢下一步嘅行為,大數據時代,人類一切依從大數據,預測未來,制定應變方案,你依常理出牌,就即係俾敵人摸通你嘅一舉一動。

現代政治,在於解決當前問題,並非主要實踐意識形態理念。新冷戰時代唔同舊冷戰時代,時代進步咗,世界亦都複雜咗,如果你仲以為新冷戰時代係左右之爭,係共產主義門資本主義,你就大錯特錯。社會主義或共產主義理念基本上已經唔存在,共產主義運動一早響上世紀八十年代,戈爾巴喬夫掌政、及鄧小平開放改革後已經壽終正寢,從此只剩下外表軀殼,沒有靈魂存在。新冷戰格局,係中國想挑戰美國世界霸權,美國固然要維持世界霸主地位,中國亦要分一杯羹,或者只你唔想俾你成世揸住個春袋做人。

疫情快將結束,全世界開始解封,可以預見,一個全新嘅時代快將出現,有人好驚會係天翻地覆,中美之間會鬥個你死我活,但我可以講比大家知一定唔會發生,鬥還鬥,但絕對唔會撕破臉,亦冇必要撕破臉,動武打仗嘅代價非常昂貴,中國美國都唔會咁做,中國固然冇錢打,美國經過越戰嘅教訓亦都唔會貿然開拖,所以雙方只會維持「鬥而不破」嘅狀態,一直玩落去,至少玩到2047。

【#常公子近代史】語音導航!請大家幫手「#訂閱」我條常公子YoutubeChannel!同埋介紹多啲人睇睇!衝上3000訂戶!

http://yt1.piee.pw/RFR4W

最新上架【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】第三部《東方維多利亞女王之死》
https://play.google.com/store/books/details?id=GaGrDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常威近代史】第一部《大清亡國關慈禧蛋牛治》,全面開放,免費下載, #freedownload!
https://play.google.com/store/books/details?id=C3hjDwAAQBAJ
jk1207335 70日
多謝分享
極端的年代 69日
【常威近代史】(三百八十回)
大軍閥平反系列

依兩回,都有提及日本帝國嘅偉大戰略「大東亞共榮圈」,1920年代,中華民國國固然係立立亂,但當時中國嘅最大敵人日本,亦唔係想像中咁國泰民安,大正時代,要求人權法統、以及平等公義嘅訴求,同樣出現喺日本人身上。明治死後,最高威權瓦解,而繼任嘅大正天皇,毫無魅力,日本民間亦出現反抗情緒。

1918年,日本就曾經出現過一場「米騷動」,「米騷動」係繼1905年東京大騷亂之後,日本發生嘅一場最大型嘅暴動事件,事件起因,不外乎錢嘅問題(如果印銀紙可以解決問題世界上真係無問題),當時大米價格暴漲造成咗嚴重嘅經濟困難,由於當時政府法定收購價同民間自由市場價格有極大差距,日本農民對於嗰啲令大米價格失控嘅米商同埋政府官員產生了極大怨恨,第一次世界之後,米價不斷上昇,帶動通貨膨脹,連帶租金同埋各類消費品價格亦都急速上昇,人窮唔會志短,人窮就會暴動。

經濟問題由農村蔓延到城市,終於發生咗日本現代史上一次影響範圍、組織規模同埋暴力程度空前嘅大暴動。1918年7月,暴動首先係富山縣魚津市一個小漁村開始,起初當然係和平示威,但係事態好快就升級,演變成為罷工、罷市、搶劫、民眾衝擊警察局同政府機關,而且迅速蔓延,1918年9月中旬,全日本38座城市、153個鄉鎮以及177條村出現咗超過623次暴亂,參與者超過200萬人。

事後有研究指出,日本發生大型暴動亦同俄國1917年布爾什維克奪取政權有關,甚至有共產黨人透滲日本發動尋釁滋事同暴動,共産主義風潮,不但吹遍歐陸同響中華民國發芽生根,同時亦波及資本主義大國日本,牽動普羅大眾抗爭情緒。「米騷亂」一發不可收拾,日本政府採取大力鎮壓嘅處理方式,事後有超過25000人被捕,其中有8000人被唔同嘅罪名起訴,有唔少人甚至被判死刑。

情況同今日香港亦都好相似,根據資料,截止筆者執筆之時(2020年5月),香港一共有8000人因為去年至今嘅抗爭運動而被捕,如果你計返比例,同成個日本國土面積同人口比較,香港嘅情況其實都非常誇張。

不過日本同香港唔同,「米騷亂」發生後,有人要孭飛負責下臺,當時嘅首相寺內正毅同內閣於1918年9月29日集體辭職。亦因為呢件事,日本政治亦邁向另一個時代。

原敬(1856-1921)代替寺內正毅成為第19任新首相,源京係平民出生,佢做過記者、擔任國外交官,之後成為大阪每日新聞社嘅社長,佢亦係日本政黨「立憲政友會」(政友會)嘅創會會員,被日本人稱為「平民首相」,佢亦係一個天主教徒,聖名叫David。
極端的年代 69日
在任期間,原敬組織咗日本第一個政黨內閣,全面實現政黨政治模式,之前嘅日本,政壇係由明治維新之前已經存在嘅各藩主大名嘅後代同勢力所控制瓜分,即所謂「薩長藩閥」政治格局,其實係政治利益分贓,20世紀初,日本民選國會產生,前前後後要經過十幾年時間,加多場大型米動亂,日本先至正式走上自由民主法統議會之路,由此可見,自由並不會輕易得來,既得利益者唔會咁容易退下來,佢哋會同平民百姓磨爛席,所以時間好重要,毅力同耐性更加重要。

大家睇返歷史,自從19世紀60年代明治維新開始,要去到60年之後,日本先至開始行到政黨政治。當然行到政黨政治,民主風氣大盛,唔代表國家一帆風順,之後,由「政友會」主宰的日本政壇,甚至步上軍國主義嘅道路,原來由貴族主宰嘅政治秩序消失,取而代之嘅係民粹同軍人當道,最後帶領日本帝國走上二次世界大戰嘅不歸路,另一個「山後有美麗風景」嘅故事......

舊1000日本紙幣上頭像嘅夏目漱石,曾經咁樣寫過:「在(明治)天皇下葬的那天,我在書房裏傾聽大炮轟鳴,對我而言,它就像為一個世紀的消逝做最後的哀悼。」

明治時代,係一個日本邁出從傳統到現代第一步嘅偉大時代,被譽為「明治的驕傲」,「明治維新」喺世界歷史上一項難得一見的政治成就同奇蹟,不過作為一個寫歷史嘅人,我並唔會誇大明治天皇嘅能力,日本嘅崛起,源於打贏1895年一場「甲午戰爭」,同之後一場「日俄戰爭」,老實講,國力係用無數人命同鮮血換取返嚟。去到1921年,日本已經係世界上最強大嘅四個國家之一(美、英、法、日),同年響華盛頓舉行嘅「太平洋會議」,日本通過廢止1902年嘅英日雙邊同盟,軍事競賽上,船艦噸位同數目限制,日本亦唔同英國傾,而同美國傾,其實當時,響德國未重新崛起之前,日本同美國,先係世界上最強大嘅兩個國家。

「平民首相」原敬於1921年11月4號,響關西出席政友會活動時,在東京站丸之內南口大堂畀一個右翼青年中岡艮一襲擊身亡,終年65歲。佢係繼伊藤博文(1841-1909)之後,第二位喺任內被刺客行刺嘅日本首相,原敬之後,仲有濱口雄幸(1870-1931)同犬養毅(1855-1932)。

今集由中國近代史變咗日本近代史,Sorry!

#常威 #大軍閥平反系列  #大軍閥 #民國歷史
跳到頁尾