[HiHi]點算?貪得意淘寶買左把妖刀返黎，出左事！

三聯幫牟中三 4912日

小弟好鍾意淘寶，自從學識點用之後，我基本上冇係香港買過衫褲鞋襪，
然後，受到一眾巴打嘅啟發，我發覺原來淘寶真係乜X都有，
上至SmartPhone，下至俄羅斯食品，甚至連駱駝都有得買，
所以有時候當我係公司無乜野做時，成日都會偷偷地上去搵下唔同野，
久而久之，屋企自然多左好多奇奇怪怪嘅物品，
不過要講最奇怪，非今次莫屬。

由於早兩日同事講起風水野，話屋企擺咩可以擋煞，
俾個同事一挑，燃起左我去淘寶睇家居擺設嘅興致，
我由「擺設」開始睇，睇睇下轉左搵「中式擺設」、「辟邪擺設」，
最後，我竟然變左睇真刀同真劍。
原來大陸一個叫龍泉嘅地方出名盛產刀劍，淘寶上有好多鋪頭都話自己賣正宗龍泉寶劍，
所謂正宗，裡面有賣唔同朝代嘅劍，亦有日本武士刀，仲把把都叫村正，
最好笑嘅係，竟然連絕世好劍同雪飲狂刀都有！
我當堂嚇一跳，然後得啖笑，
一比一金屬打造、郭富城用過嘅絕世好劍都只係舊幾水人仔，
你都咪話唔抵，正當我諗緊好唔好整把之時，我被另一把刀吸引左目光。

三聯幫牟中三 4912日

呢把係一把日本武士刀，同其他嘅鋪頭唔同，
把刀唔單止唔新淨，刀柄上仲有好多歷史悠久嘅痕跡，
有睇開漫畫嘅都知道，萬幾套故事都用過舊刀做膽，
而呢一把刀，正正會令你諗起通靈王、浪客劍心、浪客行等等，
於是，我被圖片入面嘅二手刀深深吸引，手自動click向產品描述。
店主話，呢把刀只有一把，係真正日本古代嘅武士刀，
仲話物料、做工都係一等一，包保削鐵如泥咁話，
然後我望向價錢，
＄120，包郵。

「請問這把刀還有貨嗎？」
「有的，親」（我唔向左走向右走明點解一定要加個親字）
「送到香港幾錢？」
「包郵的親」
「香港都包？」
「是的親，只有一把哦，喜歡就拍吧」
「咁得意？有冇黃豆送呀？」
「有的親，十粒夠不夠？」

睇在十粒黃豆嘅份上，我狠狠地買左呢把刀，
自從沉淪係網上購物之後，我已經好耐冇感覺過買新野嘅興奮，
每次都係玩兩玩件新玩具，之後就扔埋一二邊，
久而久之，我買嘅野越黎越奇怪，直到今次買把真刀，我先感覺到等新野嘅樂趣，
就好似做得耐嘅AV女優，越玩就越重口味。
我以為把刀會用順豐送黎，但諗諗下香港好似唔入得呢Ｄ真刀，
所以都唔知佢要幾耐先可以運到黎，
點知，第二日我放工返到屋企冇幾耐，就有人按門鐘，
「先生，收貨。」送貨嘅戴住帽，將一個好長嘅盒交俾我，
「使唔使簽收？」我問，
「唔使。」講完之後個送貨員就走左。