【講故台】聽說她是一隻Hell雞…… by 排泄專家

排泄專家 · 2012-11-21T15:50:19.7570000Z

「你知唔知我哋個Hostel有Hall雞？」搭Lift時，Kevin突然間咁問我。「吓？乜原來真係有Hall雞㗎？」我驚奇地反問，我一直以為呢個只係都市傳說……突然間「叮」一聲，部Lift已經落到地下，Lift門徐徐打開咗，迎面而嚟嘅係一個米六左右、身形瘦削嘅女仔，我由下向上慢慢打量：黑色窄牛、白色Tee、若隱若現嘅粉藍Bra、一條雪白嘅頸、一頭淺啡色嘅短髮……直到我同佢有咗眼神交流，我望到佢眼入面有一絲不悅，直直咁睥住我，我迴避佢嘅眼神由佢身旁走過。喺Lift門關上前一刻，我回頭望咗佢一眼，佢仍然係望實我，直到Lift門完全關上，佢嘅眼神消失咗喺Lift嘅夾縫之間。「嘩Hi你！啱啱果條女咪就係我講果隻Hall雞囉，你仲咁拎大聲！」Kevin將個頭哄埋我耳邊講。「喂大佬我鬼知咩！又唔早響！不過條女又唔錯喎……」「呢條女叫Candy，讀緊Year two，我O Camp果陣聽啲師兄講嘅。」Kevin愈講愈大聲。「做咩咁興奮？你想叫咩？」我用手肘頂咗Kevin一吓。「梗係唔係啦！我洗叫雞？上堂啦HiHi！」果一次，係完咗啲O Camp之後，開學嘅第一日，我同佢嘅第一次邂逅……老實講，大學生活比我想像中更加平平無奇，因為我冇打算上庄、加入學生會之類，識嘅朋友亦都唔多，而Kevin係我喺O Camp識嘅第一個朋友，佢份人幾Out-going，同我恰恰相反，所以有唔少朋友。不過性格上大家又幾夾，所以好自然咁一齊玩。原本我嘅大學生活應該係好平平無奇，一帆風順，但呢個情況只係維持咗四日，直到星期五嘅一個Lecture，我又再遇到佢……